ୱାଶିଂଟନ,୧୮ ।୩: ପ୍ରତିବନ୍ଧ ହଟାଯିବା ପରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ ପୁଣିଥରେ ଫେସବୁକକୁ ଫେରିଛନ୍ତି । ଟ୍ରମ୍ଫ ଶୁକ୍ରବାର ପ୍ରଥମ ପୋଷ୍ଟ କରିଛନ୍ତି । ସେଥିରେ ସେ ଲେଖିଛନ୍ତି, ‘ଆଇ ଆମ ବ୍ୟାକ’ । ସୂଚନାଯୋଗ୍ୟ, ୬ ଜାନୁୟାରୀ ୨୦୨୧ରେ ହୋଇଥିବା କ୍ୟାପିଟଲ ହିଲ ଦଙ୍ଗାକୁ ଉସକାଇବା ଭଳି ପୋଷ୍ଟକୁ ନେଇ ମେଟା ଡୋନାଲ୍ଡ ଟ୍ରମ୍ଫଙ୍କ ଫେସବୁକ ଆକାଉଣ୍ଟକୁ ନିଲମ୍ବିତ କରିଥିଲା ।
ଚଳିତ ବର୍ଷ ଜାନୁୟାରୀରେ ମେଟା ଟ୍ରମ୍ଫଙ୍କ ଆକାଉଣ୍ଟକୁ ପୁଣିଥରେ ଚଲାଇବାକୁ ଘୋଷଣା କରିଥିଲା । ମେଟା କହିଥିଲା ଆଗାମୀ କିଛି ସପ୍ତାହରେ ଟ୍ରମ୍ଫଙ୍କ ଫେସବୁକ ଓ ଇନଷ୍ଟାଗ୍ରାମ ଆକାଉଣ୍ଟକୁ ପୁଣି ଆରମ୍ଭ କରାଯିବ ।
ସୂଚନାଯୋଗ୍ୟ, ଆମେରିକା ସଂସଦରେ ୬ ଜାନୁୟାରୀ, ୨୦୨୧ରେ ହୋଇଥିବା ଆକ୍ରମଣ ପରେ ଫେସବୁକ ଡୋନାଲ୍ଡ ଟ୍ରମ୍ଫଙ୍କୁ ବ୍ୟାନ କରିଦେଇଥିଲା । କାରଣ ଟ୍ରମ୍ଫ ତାଙ୍କ ପୋଷ୍ଟରେ ଦାବି କରିଥିଲେ କି ୨୦୨୦ ରାଷ୍ଟ୍ରପତି ନିର୍ବାଚନ ସମୟରେ ବଡ ସଂଖ୍ୟାରେ ମତଦାନରେ ଘୋଟାଲା ହୋଇଛି । ଏହାପରେ ଫେସବୁକ ହିଂସାକୁ ଉସକାଇବା ଅଭିଯୋଗରେ ଡୋନାଲ୍ଡ ଟ୍ରମ୍ଫଙ୍କ ଆକାଉଣ୍ଟକୁ ନିଲମ୍ବିତ କରିଥିଲା ।
