ଭୁବନେଶ୍ୱର,୨୧।୭ (ବ୍ୟୁରୋ): ରାଜ୍ୟ ସରକାରଙ୍କ ଦୁର୍ନୀତି ନିବାରଣ ବିଭାଗ ଭିଜିଲାନ୍ସର ବିଶ୍ୱସନୀୟତା ଓ ନିରପେକ୍ଷତା ଉପରେ ପ୍ରଶ୍ନ ଉଠାଇଛନ୍ତି ରାଜ୍ୟ ମାନବିକ ଅଧିକାର କମିଶନ (ଓଏଚ୍ଆରସି)। ଭିଜିଲାନ୍ସ ଓ୍ବିଙ୍ଗ୍ର କେତେଜଣ ଅଧିକାରୀଙ୍କ ବିରୋଧରେ ମିଥ୍ୟା ମାମଲା ନେଇ ପ୍ରମାଣ ମିଳିବା ପରେ କମିଶନ କଡା ଆଭିମୁଖ୍ୟ ଗ୍ରହଣ କରିଛନ୍ତି। ମିଥ୍ୟା ଲାଞ୍ଚ ମାମଲାରେ ଢେଙ୍କାନାଳ ଜିଲା କାମାକ୍ଷାନଗର ଏନ୍ଏସିର ତତ୍କାଳୀନ ଜେଇଙ୍କୁ ଗିରଫ କରିଥିବା ଭିଜିଲାନ୍ସର ପୂର୍ବତନ ଡିଏସ୍ପି ହିମାଂଶୁ ଶେଖର ମିଶ୍ରଙ୍କ ଉପରେ କମିଶନ ୫ ଲକ୍ଷ ଟଙ୍କା ଜରିମାନା କରିଛନ୍ତି। ଏହି ଜରିମାନା ଟଙ୍କା କ୍ଷତିପୂରଣ ବାବଦକୁ ଉକ୍ତ ଯନ୍ତ୍ରୀଙ୍କୁ ୨ ମାସ ମଧ୍ୟରେ ଦେବାକୁ କମିଶନ ଭିଜିଲାନ୍ସ ବିଭାଗକୁ ନର୍ଦ୍ଦେଶ ଦେଇଛନ୍ତି। ଏଥିସହ ଏହି ଘଟଣାରେ ସମ୍ପୃକ୍ତ ଦୁଇ କନ୍ଷ୍ଟେବଳ ଓ ଜଣେ ହୋମ୍ଗାର୍ଡଙ୍କ ଉପରେ କଟକଣା ଲଗାଇଛନ୍ତି। ଅନ୍ୟ ମାମଲାଗୁଡିକରେ ସେମାନଙ୍କୁ ସାମିଲ ନ କରିବାକୁ କହିଛନ୍ତି। ଏଭଳି ଷଡ଼ଯନ୍ତ୍ର ରଚିଥିବା ଠିକାଦାରଙ୍କୁ ମଧ୍ୟ କଳା ତାଲିକାଭୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ସେହିଭଳି ମିଥ୍ୟା ସାକ୍ଷୀ ଦେଇଥିବା ଡିଏସ୍ଡବ୍ଲ୍ୟୁଓ ଅଫିସ୍ର କ୍ଲର୍କ ଓ ପିଅନଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଜିଲା ସମାଜ ମଙ୍ଗଳ ଅଧିକାରୀଙ୍କୁ କମିଶନ ନିର୍ଦ୍ଦେଶ ଦେଇଛନ୍ତି।
ଅଭିଯୋଗକାରୀ ରାଜେନ୍ଦ୍ର ପ୍ରସାଦ ମିଶ୍ର କାମାକ୍ଷାନଗର ଏନ୍ଏସି କାର୍ଯ୍ୟାଳୟରେ ଜୁନିୟର ଇଞ୍ଜିନିୟର (ଜେଇ) ଥିଲେ। ଏକ ପ୍ରକଳ୍ପ କାମ ଖରାପ କରିବାରୁ ଠିକାଦାର ସୁରେଶ ନାୟକଙ୍କୁ ଉକ୍ତ କାର୍ଯ୍ୟ କରିବାକୁ ଜେଇ ରାଜେନ୍ଦ୍ର ଅନୁମତି ଦେଇ ନ ଥିଲେ। ଫଳରେ ସୁରେଶ ରାଗ ରଖି ଜେଇଙ୍କୁ ମିଛ ମାମଲାରେ ଫସାଇବା ପାଇଁ ଷଡ଼ଯନ୍ତ୍ର କରିଥିଲେ। ସେ ଭିଜିଲାନ୍ସ ଡିଏସ୍ପି ହିମାଂଶୁଙ୍କ ସହ ମିଶି ତାଙ୍କୁ ଗିରଫ ଯୋଜନା କରିଥିଲେ। ୨୦୧୭ ମାର୍ଚ୍ଚ ୨୪ରେ ଡିଏସ୍ପି ହିମାଂଶୁଙ୍କ ନେତୃତ୍ୱରେ କନ୍ଷ୍ଟେବଳ ଉଦ୍ଧବ ଚରଣ ଲେଙ୍କା, ଶ୍ରୀନିବାସ ବିଶ୍ୱାଳ ଓ ହୋମ୍ଗାର୍ଡ ସୁରେନ୍ଦ୍ର ଧଳ ଜେଇ ରାଜେନ୍ଦ୍ରଙ୍କ ଚାମ୍ବରକୁ ପଶି ତାଙ୍କ ଟେବୁଲ ଡ୍ରରେ ଟଙ୍କା ରଖିଥିଲେ। ପରେ ମିଥ୍ୟା ଲାଞ୍ଚ ମାମଲାରେ ତାଙ୍କୁ ଗିରଫ କରାଯାଇଥିଲା। ଏହାସହ ଭିଜିଲାନ୍ସର ଉପସ୍ଥିତିରେ ଠିକାଦାର ଜେଇଙ୍କୁ ମଧ୍ୟ ଲୁହାରଡ଼ରେ ମାଡ଼ ମାରିଥିବା ଅଭିଯୋଗ ନେଇ ରାଜେନ୍ଦ୍ର ଓଏଚ୍ଆର୍ସିଙ୍କ ଦ୍ୱାରସ୍ଥ ହୋଇଥିଲେ। କମିଶନ ଘଟଣାକୁ ଗୁରୁତ୍ୱର ସହ ଗ୍ରହଣ କରି ଯାଞ୍ଚ ନିର୍ଦ୍ଦେଶ ଦେଇଥିଲେ। ଜେଇଙ୍କ ଚାମ୍ବରରେ ଲାଗିଥିବା ସିସିଟିଭି ଫୁଟେଜ ଓ ତଦନ୍ତବେଳେ ଏହି ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଥିଲା। ମିଥ୍ୟା ମାମଲା ନେଇ କମିଶନ ସ୍ପଷ୍ଟ ହେବା ପରେ ସୋମବାର ଏହି ରାୟ ଦେଇଛନ୍ତି।