ନୂଆଦିଲ୍ଲୀ,୮।୧୨: ରେଳ ଲାଇନ କଡ଼ରେ ଥିବା ଝୁମ୍ପୁଡ଼ି ବସ୍ତି ବାସିନ୍ଦାଙ୍କ ଥଇଥାନ ଲାଗି ନୀତି ନିର୍ଦ୍ଧାରଣ କରିବାକୁ ସୁପ୍ରିମ୍କୋର୍ଟ କହିଛନ୍ତି। ପଞ୍ଜାବ ଏବଂ ହରିୟାଣାରେ ବାସ କରୁଥିବା ଝୁମ୍ପୁଡ଼ି ବାସିନ୍ଦାଙ୍କ ଲାଗି ଉପଯୁକ୍ତ ପଦକ୍ଷେପ ଗ୍ରହଣ କରିବା ଲାଗି ଶୀର୍ଷକୋର୍ଟ କେନ୍ଦ୍ର ସରକାରଙ୍କୁ କହିଛନ୍ତି। ଏଭଳି ସମସ୍ୟା ସାରା ଭାରତରେ ଲାଗି ରହିଛି ବୋଲି ବିଚାରପତି ଏ.ଏମ୍. ଖାନଓ୍ବିଲକରଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି। ଏହାର ସମାଧାନ ଲାଗି ଥଇଥାନ ନୀତି ଅପରିହାର୍ଯ୍ୟ ହୋଇ ପଡ଼ିଛି।
ଖଣ୍ଡପୀଠ ଏନେଇ ସୋଲିସିଟର ଜେନେରାଲ ତୁଷାର ମେହେଟ୍ଟାଙ୍କର ସହାୟତା ଲୋଡ଼ିଛନ୍ତି। ଏହି ପ୍ରସଙ୍ଗ ଜନହିତ ସହ ଜଡ଼ିତ। ମାତ୍ର ଏହାର ସମାଧାନ ପାଇଁ ନିଗମ, ରାଜ୍ୟ ଏବଂ ରେଳ ବିଭାଗ ପକ୍ଷରୁ ପଦକ୍ଷେ ଗ୍ରହଣରେ ଅବହେଳା ପ୍ରଦର୍ଶନ କରାଯାଉଥିବା ସର୍ବୋଚ୍ଚ ନ୍ୟାୟାଳୟ କହିଛନ୍ତି। ସୋଲିସିଟର ଜେନେରାଲ ଏନେଇ କହିଛନ୍ତି ଯେ, ରେଳମନ୍ତ୍ରୀ ଏବଂ ଅନ୍ୟ ଉଚ୍ଚ ଅଧିକାରୀଙ୍କ ସହିତ ଆଲୋଚନା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ। ଡିସେମ୍ବର ୧୪ ସୁଦ୍ଧା ଖଣ୍ଡପୀଠଙ୍କ ପକ୍ଷରୁ ଏ ସମ୍ପର୍କିତ ସମାଧାନ ଲୋଡ଼ା ଯାଇଛି।