ନୂଆପଡ଼ା,୨୬।୮(ମକାରୁ ବେମାଲ): ନୂଆପଡ଼ା ଜିଲାରେ ପୁଣି ମାଓବାଦୀମାନେ ତାଙ୍କର ଉପସ୍ଥିତି ଜାହିର କରିଛନ୍ତି। ନୂଆପଡ଼ା ସଦର ମହକୁମାଠାରୁ ୧୦ କି.ମି. ଦୂର ସୁନାବେଡା ଅଭୟାରଣ୍ୟ ଭିତରେ କେରମେଲି ପଞ୍ଚାୟତ ଗୋଲାବନ୍ଧ ଗାଁରେ ଗୁରୁବାର ବିଳମ୍ବିତ ରାତିରେ ମାଓବାଦୀମାନେ ବିଏସ୍ଏନ୍ଏଲ୍ କମ୍ପାନୀରେ କାମ କରୁଥିବା ଏକ ଜେସିବିକୁ ପୋଡିବା ସହ ଫରେଷ୍ଟ ବିଟ୍ ହାଉସକୁ ବୋମା ପକାଇ ଉଡ଼ାଇ ଦେଇଛନ୍ତି। ଫରେଷ୍ଟ ହାଉସର ମୁଖ୍ୟ ଗେଟ ତାଲା ଭାଙ୍ଗି ଭିତରେ ଥିବା କାଗଜାତ ପୋଡି ଦେଇଥିବା ବେଳେ କବାଟ ଝରକା ସବୁ ଭାଙ୍ଗି ଚୂରମାର କରି ଦେଇଛନ୍ତି। ଘଟଣାସ୍ଥଳରେ ପଲିଥିନରେ ଲାଲ ରଙ୍ଗରେ ହିନ୍ଦୀ ଭାଷାରେ ଲେଖା ଥିବା ଭିନ୍ନ ଭିନ୍ନ ପୋଷ୍ଟର ଛାଡି ଯାଇଛନ୍ତି। କେନ୍ଦ୍ରରେ ଭାଜପା ସରକାର, ଓଡ଼ିଶାରେ ବିଜେଡି ଓ ଛତିଶଗଡରେ କଂଗ୍ରେସ ସରକାରଙ୍କ ସାମ୍ରାଜ୍ୟବାଦକୁ ବିରୋଧ କରିବା ସହ ଜଳ, ଜମି, ଜଙ୍ଗଲ ଆନ୍ଦୋଳନକୁ ଜୋରଦାର କରିବା ପାଇଁ ପୋଷ୍ଟରରେ ଆହ୍ବାନ କରାଯାଇଛି। କେନ୍ଦ୍ର, ଛତିଶଗଡ ଏବଂ ଓଡିଶା ସରକାର ମିଶି ସୁନାବେଡା ଅଭୟାରଣ୍ୟ ଓ ଛତିଶଗଡ ଉଦନ୍ତୀ ଅଭୟାରଣ୍ୟ ଭିତରେ ବିପ୍ଲବୀ ଆନ୍ଦୋଳନକୁ ହଟାଇବା ପାଇଁ ବିରୋଧ କରୁଛନ୍ତି। ଆମର ପିଏଲଜିଏ ଉପରେ ଜାରି କରିଥିବା ଦମନ ଲୀଳାକୁ ବିରୋଧ କରି ଅଗଷ୍ଟ ୨୫କୁ ଛତିଶଗଡର ଗରିଆବନ୍ଧ, ଧମତରୀ, କାଙ୍କେର ଜିଲା ଏବଂ ଓଡିଶାର ନୂଆପଡା, ନବରଙ୍ଗପୁରରେ ବିରୋଧୀ ଦିବସ ରୂପେ ପାଳନ କରାଯାଇଛି ବୋଲି ପୋଷ୍ଟରରେ ଉଲ୍ଲେଖ ରହିଛି। ପୋଷ୍ଟରେ ତଳେ ଭାକପା (ମାଓବାଦୀ) ମୈନପୁର-ନୂଆପଡା ଡିଭିଜନ କମିଟି ଅଗଷ୍ଟ ୨୦୨୩ ବୋଲି ଲେଖା ଅଛି। ଏ ସଂକ୍ରାନ୍ତରେ ନୂଆପଡା ଆରକ୍ଷୀ ଅଧୀକ୍ଷକ ଗୁନ୍ଦାଳା ରେଡ୍ଡୀ ରାଘବେନ୍ଦ୍ରଙ୍କୁ ପଚାରିବାରୁ ଗୋଲାବନ୍ଧଠାରେ ବନ୍ୟଜନ୍ତୁ ବିଭାଗ ଫରେଷ୍ଟ ବିଟ ଓ ପାଖରେ ଥିବା ଏକ ଜେସିବିକୁ ପୋଡି ଦେଇଥିବା ଖବର ଆସିଛି। ଆମର ଟିମ୍ ମଧ୍ୟ ଯାଇ ସାରିଲେଣି। ଡଗ୍ ସ୍କ୍ବାଡ ସହ ୨୧୬ ବାଟାଲିୟାନ ସିଆର୍ପିଏଫ୍, ଏସ୍ଓଜି ଓ ଡିଏଏଫ୍ ଟିମ ଯାଇଛନ୍ତି। କେଉଁ ସାହାଯ୍ୟରେ ବିଟକୁ ଉଡ଼ାଯାଇଛି, ଆମର ଡଗ୍ ସ୍କ୍ବାଡ ତଦନ୍ତ କରି ଫେରିବା ପରେ ଜଣାପଡ଼ିବ। କୋମ୍ବିଂ ଅପରେଶନକୁ ବ୍ୟାପକ କରାଯାଇଛି ବୋଲି କହିଛନ୍ତି।