କାଇରୋ,୨୯।୮: ଗୋଡ଼ ଥିବା ତିମି ମାଛ କଥା ଶୁଣିଲେ ଯେ କେହି ଆଶ୍ଚର୍ଯ୍ୟ ହେବା ସ୍ବାଭବିକ। ତେବେ ଇଜିପ୍ଟର ଫାୟୋମ୍ ସ୍ଥିତ ମରୂଭୂମିରୁ ଏଭଳି ତିମି ମାଛର ପ୍ରାୟ ୪ କୋଟି ୩୦ ଲକ୍ଷ ବର୍ଷ ତଳର ଜୀବାଶ୍ମ ମିଳିଛି। ଜୀବାଶ୍ମରୁ ଜଣାପଡ଼ିଛି ଏହି ତିମି ମାଛର ୪ଟି ଗୋଡ଼ ଥିଲା। ଏହା ପାଣିରେ ପହଁରି ପାରିବା ସହିତ ଭୂଭାଗରେ ମଧ୍ୟ ଚାଲି ପାରୁଥିଲା। ଏହାକୁ ଫିଓମିସେଟସ୍ ଅନୁବିସ୍ ଭାବେ ନାମିତ କରାଯାଇଛି। ଆନୁବିସ୍ ହେଉଛନ୍ତି ପ୍ରାଚୀନ ମିଶରର ମୃତ୍ୟୁର ଦେବତା। ଏହାର ଓଜନ ୬୦୦ କିଲୋଗ୍ରାମ୍ ଏବଂ ଲମ୍ବ ୩ ମିଟର ହେବ ବୋଲି ଜୀବାଶ୍ମରୁ ଅନୁମାନ କରାଯାଇଛି। ମନସୁରା ବିଶ୍ୱିଦ୍ୟାଳୟର ବୈଜ୍ଞାନିକ ଅବଦୁଲା ଗୋହରଙ୍କ ଅନୁସାରେ ଏହି ପ୍ରଜାତିର ତିମି ମାଛ ଅତି ପ୍ରାଚୀନ ସମୟରେ ଦେଖାଯାଉଥିଲେ। ସୂଚନାଯୋଗ୍ୟ, ଫାୟୋମ୍ ସ୍ଥିତ ମରୁଭୂମିରେ ୫ କୋଟି ୬୦ ଲକ୍ଷ ବର୍ଷରୁ ୩ କୋଟି ୩୯ ଲକ୍ଷ ବର୍ଷର ପୁରାତନ ଜୀବାଶ୍ମ ମିଳିଥାଏ। ତେଣୁ ଏହାକୁ ଜୀବାଶ୍ମର ଗନ୍ତାଘର ବୋଲି କୁହାଯାଇଥାଏ।