ଗଞ୍ଜାମ,୧୭।୫(ଡି.ଏନ୍.ଏ.): ନିଖୋଜ ଥିବା ପୂର୍ବତନ ବିଧାୟକ ସରୋଜ ପାଢ଼ୀଙ୍କ ଠିକଣା ମିଳିଛି। ରାମେଶ୍ବରମରେ ଥିବା ନେଇ ପରିବାର ଲୋକଙ୍କୁ ନିଜେ ସୂଚନା ଦେଇଛନ୍ତି। ବ୍ୟସ୍ତ ବିବ୍ରତ ନ ହେବା ପାଇଁ ସେ କହିଛନ୍ତି । ପରିବାର ଲୋକଙ୍କ ସୂଚନା ପରେ ପୋଲିସ ଟିମ ରାମେଶ୍ବରମ ଯିବ।
ସୂଚନାନୁସାରେ, ଗତ ୧୨ ତାରିଖରୁ ସରୋଜ ନିଖୋଜ ଥିବା ନେଇ ଭୁବନେଶ୍ବର କ୍ୟାପିଟାଲ ଥାନାରେ ଏତଲା ଦିଆଯାଇଥିଲା । ଘରୁ ବାହାରକୁ ଯାଇ ଆଉ ଫେରି ନ ଥିବା ସେ ଅଭିଯୋଗ କରିଥିଲେ । ତାଙ୍କୁ ବାରମ୍ବାର ମୋବାଇଲରେ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ଫୋନ ସୁଇଚ୍ ଅଫ ଥିବା ସେ କହିଥିଲେ । ସରୋଜ ୨୦୦୪ରେ ସ୍ବାଧୀନ ଭାବେ ଲଢିବା ସହ ବିଜେଡିର ସହଯୋଗୀ ସଦସ୍ୟ ଭାବେ ଆସକାରୁ ବିଧାୟକ ନିର୍ବାଚିତ ହୋଇଥିଲେ ।