କଟକ ଅଫିସ,୧୪।୭: ମହାମାରୀ କରୋନା ଯୋଗୁ ସାଢ଼େ ୩ମାସରୁ ଅଧିକ ସମୟ ହେଲା ରାଜ୍ୟର ପ୍ରାୟତଃ ସମସ୍ତ କୋର୍ଟ କାର୍ଯ୍ୟ ପ୍ରଭାବିତ ହୋଇଛି। କମ୍ ତଥା ଅତି ଜରୁରି ମାମଲାର ଶୁଣାଣି ହେଉଥିବାରୁ ଅନେକ ଆଇନ୍ଜୀବୀ ରୋଜଗାର ହରାଇଛନ୍ତି। ସେମାନଙ୍କ ପକ୍ଷେ ଘର ଚଳାଇବା କଷ୍ଟକର ହୋଇପଡ଼ିଛି। ଅପରପକ୍ଷେ ଆର୍ଥତ୍କ ଦୁର୍ବଳ ଶ୍ରେଣୀର ଆଇନ୍ଜୀବୀଙ୍କୁ ସହାୟତା ପ୍ରଦାନ ପାଇଁ ଗତ ଏପ୍ରିଲ୍ ପହିଲାରୁ ଓଡ଼ିଶା ରାଜ୍ୟ ଆଇନ୍ଜୀବୀ ପରିଷଦ ଅଣ୍ଟା ଭିଡ଼ିଛି। ଏଥିଲାଗି ଆଶାୟୀ ଆଇନ୍ଜୀବୀଙ୍କଠାରୁ ଦରଖାସ୍ତ ଗ୍ରହଣ କରାଯାଇଛି। ରାଜ୍ୟର ପ୍ରାୟ ୧୫ ହଜାର ଅର୍ଥାତ ୫୦ ପ୍ରତିଶତ ଆଇନ୍ଜୀବୀ ଆବେଦନ କରିଛନ୍ତି। କିନ୍ତୁ ଏଯାଏ ସହାୟତା ମିଳିନି। କେବେ ମିଳିବ ତାହା ଅନିଶ୍ଚିତତାରେ। ଏଭଳି ସ୍ଥିତିରେ ରାଜ୍ୟ ସରକାରଙ୍କ ମୁଣ୍ଡରେ ଦାୟିତ୍ୱ ଲଦିଛି ଆଇନ୍ଜୀବୀ ପରିଷଦ। ଅନ୍ୟ ରାଜ୍ୟ ସରକାର ସହାୟତା ଦେଉଥିବାରୁ ଓଡ଼ିଶା ସରକାର ମଧ୍ୟ ଏ ଦିଗରେ ଆଗେଇ ଆସୁ ବୋଲି ପରିଷଦ ଦାବି କରିଛି।
ରୋଜଗାର ହରାଇ ଦୁଃଖକଷ୍ଟରେ ଦିନ କାଟୁଥିବା ଆଇନ୍ଜୀବୀଙ୍କ ମଧ୍ୟରେ ସହାୟତା ନ ମିଳିବାକୁ ନେଇ ଅସନ୍ତୋଷ ଦାନା ବାନ୍ଧିବାରେ ଲାଗିଛି। ଏପ୍ରିଲ୍ ୧ରେ ରାଜ୍ୟ ଆଇନ୍ଜୀବୀ ପରିଷଦର ସ୍ବତନ୍ତ୍ର କମିଟି ବୈଠକରେ ଏ ନେଇ ଆଲୋଚନା ହୋଇଥିଲା। ପରିଷଦ ପକ୍ଷରୁ ଜରୁରିକାଳୀନ ଆର୍ଥତ୍କ ସହାୟତା ନିୟମ-୨୦୨୦ ପ୍ରସ୍ତୁତ କରାଯାଇଥିଲା। କେବଳ କରୋନା ନୁହଁ, ଭବିଷ୍ୟତରେ ଯଦି କୌଣସି ପ୍ରକାର ପ୍ରାକୃତିକ ଦୁର୍ବିପାକ ଦେଖାଦିଏ, ଯାହା ଦ୍ୱାରା ଆଇନ୍ଜୀବୀଙ୍କ ରୋଜଗାର ପ୍ରଭାବିତ ହୁଏ, ତେବେ ଏହି ନିୟମ ଅନୁଯାୟୀ ଆର୍ଥତ୍କ ସହାୟତା ଦେବା ପାଇଁ ଏହି ନିୟମରେ ବ୍ୟବସ୍ଥା ରହିଛି। ଏହି ନିୟମକୁ ଅନୁମୋଦନ ପାଇଁ ବାର୍ କାଉନସିଲ୍ ଅଫ୍ ଇଣ୍ଡିଆକୁ ପଠାଯାଇଥିଲା। ମେ’ ୫ରେ କାଉନସିଲ୍ ଏହାକୁ ଅନୁମୋଦନ କରିବା ପରେ ସହାୟତା ମିଳିବା ନେଇ ଆଶା ଦେଖାଦେଇଥିଲା। ଫଳରେ ଆଶାୟୀ ଆଇନଜୀବୀମାନେ ନିଜ ଓକିଲ ସଂଘ ଜରିଆରେ ଆବେଦନ କରିଥିଲେ। ତେବେ ବର୍ତ୍ତମାନ ସୁଦ୍ଧା ସହାୟତା ମିଳି ନ ଥିବାରୁ ନିକଟରେ ଅନୁଷ୍ଠିତ ପରିଷଦର ସ୍ବତନ୍ତ୍ର କମିଟି ବୈଠକରେ ଏନେଇ ଆଲୋଚନା ହୋଇଥିଲା। କର୍ନାଟକ, ଦିଲ୍ଲୀ, ତେଲଙ୍ଗାନା, ଆନ୍ଧ୍ରପ୍ରଦେଶ ଏବଂ ମହାରାଷ୍ଟ୍ର ଭଳି ଓଡ଼ିଶା ସରକାର ଆଇନ୍ଜୀବୀଙ୍କୁ ସହାୟତା ଦେବା ଉଚିତ ବୋଲି ମତ ପ୍ରକାଶ ପାଇଥିଲା। ସରକାର ତୁରନ୍ତ ପରିଷଦର ଆଇନ୍ଜୀବୀ କଲ୍ୟାଣ କର୍ପସ ପାଣ୍ଠିକୁ ଆର୍ଥତ୍କ ସହାୟତା ଯୋଗାଇ ଦେଲେ ଆଇନ୍ଜୀବୀମାନେ ଉପକୃତ ହେବେ ବୋଲି ପରିଷଦ ପକ୍ଷରୁ କୁହାଯାଇଛି।