ସମ୍ବଲପୁର,୧୯।୧୧(ବ୍ୟୁରୋ): ସମ୍ବଲପୁର ଜିଲା ଚାଆଁରପୁର ଅଞ୍ଚଳରେ ଚାଷୀମାନେ ୯ ଗାଡି ଧାନ ଅଟକ ରଖି ଯୋଗାଣ ବିଭାଗକୁ ଜିମା ଦେଇଥିଲେ। ମିଲ ଭିତରେ ମଧ୍ୟ ୭ ଗାଡିରେ ଧାନ ରହିଥିଲା। ଯୋଗାଣ ବିଭାଗର ଏକ ଟିମ୍ ଧାନ ଜବତ କରି ସ୍ଥାନୀୟ ନାରାୟଣୀ ମିଲ୍ରେ ଜିମା ଦେଇଥିଲା। ଏହାକୁ ନେଇ ତଦନ୍ତ ଆରମ୍ଭ ହୋଇଥିଲା। ତଦନ୍ତ ପରେ ଜିଲାପାଳଙ୍କ ପାଖରେ ଯୋଗାଣ ବିଭାଗ ପକ୍ଷରୁ ରିପୋର୍ଟ ଦାଖଲ କରାଯାଇଛି। ମିଲ ଭିତରୁ ଧାନ ଗାଡି ଜବତ ହୋଇଥିଲେ ମଧ୍ୟ ଏଥିରେ ବେପାରୀଙ୍କୁ ଦାୟୀ କରାଯାଇଛି। ଏଥିରେ ୪ ଜଣ ବେପାରୀଙ୍କ ନାମରେ ଅଭିଯୋଗ କରିଛି ଯୋଗାଣ ବିଭାଗ।
ଅନ୍ୟପଟେ ମିଲ୍ ମାଲିକଙ୍କୁ ସୁରକ୍ଷା ଦେବାକୁ ଯାଇ ଯୋଗାଣ ବିଭାଗ ରିପୋର୍ଟରେ ଚଞ୍ଚକତା କରିଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ମିଲ୍ ଭିତରକୁ ଧାନ କିଭଳି ଗଲା। ମିଲ ମାଲିକଙ୍କ ଜାଣତରେ ଧାନ ଗାଡି ଭିତରେ ରହିଥିଲା। ଚାଷୀମାନେ ଧରି ଯୋଗାଣ ବିଭାଗ ପାଖରେ ଅଭିଯୋଗ କଲା ପରେ ମଧ୍ୟ ମିଲ ମାଲିକଙ୍କୁ କ୍ଲିନ ଚିଟ୍ ଦିଆଯାଇଛି। ମାର୍କେଟ ଖୋଲିବା ପୂର୍ବରୁ ମିଲର୍ସମାନେ ଗତବର୍ଷର ଚାଉଳ ଦେବାକୁ ଚୋରାରେ ଧାନ କିଣୁଛନ୍ତି। ଚାଷୀମାନେ ଅଭାବୀ ବିକ୍ରିର ଶିକାର ହେଉଛନ୍ତି। ପୂର୍ବରୁ ମିଲରେ କେତେ ଧାନ ଥିଲା ଏବେ କେତେ ରହିଛି, ଉକ୍ତ ଧାନ କେଉଁ କିସମ ଓ କେତେ ପୁରୁଣା ଏସବୁ ତଦନ୍ତ ହେବା ଆବଶ୍ୟକ ବୋଲି ଚାଷୀମାନେ ଦାବି କରିଛନ୍ତି। ସୂଚନାଯୋଗ୍ୟ, ନଭେମ୍ବର ୧୪ରେ ଚାଷୀମାନେ ୯ ଗୋଟି ଧାନ ବୋଝେଇ ଗାଡି ଅଟକ ରଖିଥିଲେ। ଯୋଗାଣ ବିଭାଗର ଏକ ସ୍ବତନ୍ତ୍ର ଟିମ୍ ତିନୋଟି ମିଲ୍ ଯାଞ୍ଚ କରିଥିଲେ। ଦୁଇଟି ମିଲରୁ ଦୁଇଟି ଲେଖାଏ ଓ ଗୋଟିଏ ମିଲରୁ ୫ଟି ଗାଡ଼ି ଜବତ କରିଥିଲେ। ଏହାମଧ୍ୟରେ ଚାଉଁରପୁର ନିକଟରେ ଥିବା ଚନ୍ଦ୍ରମା ରାଇସ୍ ମିଲ, ସମଲେଶ୍ୱରୀ ଗ୍ରାମଉଦ୍ୟୋଗ, ଏମ୍ଏସ୍ ଫୁଡ ମିଲ ରହିଥିଲା। ଏ ସମ୍ପର୍କରେ ଜିଲା ମୁଖ୍ୟ ଯୋଗାଣ ଅଧିକାରୀ ରାମଚନ୍ଦ୍ର ଟୁଡୁ କହିଛନ୍ତି, ସ୍ବତନ୍ତ୍ର ଟିମ୍ ଦେଇଥିବା ରିପୋର୍ଟ ଜିଲାପାଳଙ୍କ ପାଖରେ ଦାଖଲ କରାଯାଇଛି। ଏଥିରେ ବେପାରୀଙ୍କ ସମ୍ପୃକ୍ତି ଥିବା ଜଣାପଡିଛି। ସେମାନଙ୍କ ନାମରେ ମାମଲା ରୁଜୁ କରାଯାଇଛି। ଜିଲାପାଳଙ୍କ ନିର୍ଦ୍ଦେଶ କ୍ରମେ ପରବର୍ତ୍ତି ପଦକ୍ଷେପ ଗ୍ରହଣ କରାଯିବ ବୋଲି କହିଥିଲେ।