ଜୟପୁର,୧୪।୩:କରଣୀ ସେନାର ପ୍ରତିଷ୍ଠାତା ଲୋକେନ୍ଦ୍ର ସିଂ କଲଭିଙ୍କ ହୃଦଘାତରେ ଦେହାନ୍ତ ହୋଇଛି। ଜୟପୁର ସ୍ଥିତ ଏସଏମଏସ ହସ୍ପିଟାଲର ଡାକ୍ତରମାନେ ଏହା ନିଶ୍ଚିତ କରିଛନ୍ତି। ତାଙ୍କର ମୃତଦେହ ଶେଷ ଦର୍ଶନ ପାଇଁ ରାଜପୁତ ଭବନ ଜୟପୁରରେ ରଖାଯିବ। ଏହାପରେ ତାଙ୍କ ଜନ୍ମ ଗାଁ କଲଭି ଗ୍ରାମରେ ଅନ୍ତିମ ସଂସ୍କାର କରାଯିବ।
ଗତ ଦେଢ ଦଶନ୍ଧି ଧରି କଲଭି ତାଙ୍କ ସମାଜର ଅନେକ ପ୍ରସଙ୍ଗରେ ସ୍ବର ଉତ୍ତୋଳନ କରିଥିଲେ। ତାଙ୍କର ଉତ୍ତେଜନାମୂଳକ ଭାଷଣ ପ୍ରତିଦିନ ଚର୍ଚ୍ଚାରେ ଥିଲା। ସେ କରଣୀ ସେନାର ପ୍ରତିଷ୍ଠାତା ମଧ୍ୟ ଥିଲେ। ପ୍ରାୟ ସାଢେ ୧୮ ବର୍ଷ ପୂର୍ବେ ସେ କରଣୀ ସେନା ଗଠନ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ। ବଲିଉଡ ଚଳଚ୍ଚିତ୍ର ପଦ୍ମାବତକୁ ବିରୋଧ କରୁଥିବାବେଳେ ସେ ଫିଲ୍ମର ନିର୍ଦ୍ଦେଶକ ସଞ୍ଜୟ ଲୀଲା ବଂଶାଲୀ ଏବଂ ଅଭିନେତ୍ରୀ ଦୀପିକା ପାଦୁକୋନଙ୍କୁ ଧମକ ଦେଇଥିଲେ।
ତାଙ୍କ ପିତା କଲ୍ୟାଣ ସିଂ କଲଭୀ ରାଜ୍ୟ ତଥା କେନ୍ଦ୍ରରେ ମନ୍ତ୍ରୀ ଥିଲେ। ଲୋକେନ୍ଦ୍ର ସିଂ ନିଜକୁ ଜଣେ କୃଷକ ନେତା ବୋଲି କହୁଥିଲେ। ୧୯୯୩ରେ ମଧ୍ୟ ସେ ନାଗାରୁ ଜଣେ ସ୍ବାଧୀନ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ପରାସ୍ତ ହୋଇଥିଲେ। ଏହା ପରେ, ୧୯୯୮ ଲୋକ ସଭା ନିର୍ବାଚନରେ ସେ ବାରମର-ଜୈସଲମେର ଆସନରୁ ଭାଜପା ଟିକେଟରେ ଭାଗ୍ୟ ପରୀକ୍ଷା କରିଥିଲେ ମଧ୍ୟ ପୁନର୍ବାର ପରାଜୟର ସମ୍ମୁଖୀନ ହୋଇଥିଲେ।