ଭଗବାନଙ୍କ ସୃଷ୍ଟିରେ ପ୍ରକୃତିରାଣୀର ସୌନ୍ଦର୍ଯ୍ୟ କୌଣସି ବିସ୍ମୟଠାରୁ କମ୍ ନୁହେଁ । ଏମିତି ଏକ ଅବିଶ୍ୱସନୀୟ ପ୍ରାକୃତିକ ସୌନ୍ଦର୍ଯ୍ୟ ରହିଛି ଦକ୍ଷିଣ ଆମେରିକାର ପେରୁଠାରେ। ଏହା ଏକ ଝରଣା; ଯାହାର ନା ହେଉଛି ‘କାଟାରାଟା ଭେଲୋ ଦେ ଲା ନୋଭିଆ’। କିନ୍ତୁ ବର୍ତ୍ତମାନ ଏହା ‘ଓ୍ବାଟରଫଲ୍ ଅଫ୍ ଦ ବ୍ରାଇଡ୍’ ନାମରେ ବେଶ୍ ପରିଚିତ । ଆଉ ଏପରି ନାମକରଣ ପଛର କାରଣ ହେଉଛି ଉକ୍ତ ଝରଣାଟି ଦୂରରୁ ନବବଧୂ ପରି ଧଳା ଗାଉନ୍ ପିନ୍ଧିଥିବା ଏକ ମହିଳା ଭଳି ଦେଖାଯାଇଥାଏ । ଖାସ୍ ସେଥିପାଇଁ ଏଠାରେ ପର୍ଯ୍ୟଟକଙ୍କର ବେଶ୍ ଭିଡ଼ ଜମିଥାଏ। ତେବେ ଏହି ଝରଣାଟି ୨୦୦ଫୁଟ୍ ଉଚ୍ଚରୁ ଛୋଟ ଛୋଟ ଗୁମ୍ଫା ଦେଇ ଝରି ଆସିଛି ସତ, କିନ୍ତୁ ୫୦ ଫୁଟ୍ ଉଚ୍ଚରୁ ହିଁ ଏହାର ପ୍ରକୃତ ଆକୃତି ଦେଖିବାକୁ ମିଳେ। ସୂଚନାନୁଯାୟୀ, ୨୦୧୮ ମସିହାରୁ ଏହି ଝରଣାଟି ଲୋକମାନଙ୍କ ଦୃଷ୍ଟି ଆକର୍ଷଣ କରିବା ସହ କ୍ରମେ ଏହାର ଫଟୋ ଓ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏଥିସହିତ ଏହି ସ୍ଥାନକୁ ଯିବା ପାଇଁ ଏବେ ଗୁଗଲ ମ୍ୟାପ୍ରେ ଲୋକେସନ୍ ମଧ୍ୟ ଦେଖିବାକୁ ମିଳିଲାଣି ।