ହିଞ୍ଜିଳିକାଟୁ,୩୧।୩(ଡି.ଏନ୍.ଏ.): ହିଞ୍ଜିଳି ଥାନା ତଥା ଶେରଗଡ଼ ବ୍ଲକ ଅନ୍ତର୍ଗତ ପିତଳ ଛକରେ ଗତ ୨୨ ତାରିଖ ରାତିରେ ସଂଘବଦ୍ଧ ଆକ୍ରମଣରେ ୪ ଭାଇଙ୍କ ମୃତ୍ୟୁ ଘଟିଥିଲା। ଏହି ଘଟଣାରେ ହିଞ୍ଜିଳି ପୋଲିସ ମଙ୍ଗଳବାର ମୁଖ୍ୟ ଅଭିଯୁକ୍ତଙ୍କ ସମେତ ୫ ଜଣଙ୍କୁ ଗିରଫ କରିଛି। ସେମାନେ ହେଲେ ହିଞ୍ଜିଳି ଥାନା ରାମଚନ୍ଦ୍ରପୁର ଗ୍ରାମର ଅମିୟ ସ୍ବାଇଁ ଓରଫ ସାଧୁ, ତାଙ୍କ ଗ୍ରାମର ବାହନପତି ବେହେରା, ଦୀପୁ ସେଠୀ, ଚିତ୍ରସେନ ସେଠୀ ଓ ସନ୍ତୋଷ ସ୍ବାଇଁ। ଅଭିଯୁକ୍ତମାନଙ୍କୁ ଶେରଗଡ଼ କୋର୍ଟ ଚାଲାଣ କରାଯାଇଥିଲା। ସେଠାରୁ ଆସିକା ଜେଲକୁ ପଠାଇ ଦିଆଯାଇଛି। ପିିତଳ ଛକ ଫାଷ୍ଟଫୁଡ ସେଣ୍ଟରରେ ସାମାନ୍ୟ କଥାକୁ ନେଇ ବଚସା ଓ ପରେ କମେଣ୍ଟମରାକୁ ନେଇ ନରେନ୍ଦ୍ରପୁର ଗ୍ରାମର ୪ ଭାଇ ରାଜା ସ୍ବାଇଁ, ଶମ୍ଭୁ ସ୍ବାଇଁ, ପାଣ୍ଡବ ସ୍ବାଇଁ ଓ ସେମାନଙ୍କ ମାଉସୀ ପୁଅ ନାବାଳକ ଚନ୍ଦନ ସ୍ବାଇଁଙ୍କୁ ହତ୍ୟା କରାଯାଇଥିଲା। ମଙ୍ଗଳବାର ହିଞ୍ଜିଳି ଥାନା ପରିସରରେ ଆୟୋଜିତ ଖବରଦାତା ସମ୍ମିଳନୀରେ ଗଞ୍ଜାମ ଏସ୍ପି ବ୍ରିଜେଶ କୁମାର ରଏ ଏହି ସୂଚନା ଦେଇଛନ୍ତି। ଏସ୍ପି ଆହୁରି ସୂଚନା ଦେଇଛନ୍ତି, ମୁଖ୍ୟ ଅଭିଯୁକ୍ତ ସାଧୁଙ୍କ ନାମରେ ହିଞ୍ଜିଳି ସମେତ ଶେରଗଡ଼, ଆସିକା ଆଦି ଥାନାରେ ହତ୍ୟା, ରାହାଜାନୀ, ଦାଦାବଟି ଆଦାୟ ଭଳି ବିଭିନ୍ନ ଆପରାଧିକ ମାମଲା ରହିଛି। ୨୨ତାରିଖ ସନ୍ଧ୍ୟାରେ ଫାଷ୍ଟଫୁଡ ସେଣ୍ଟରରେ ଶମ୍ଭୁଙ୍କ ସହ ସାଧୁ ଓ ବାହନପତି ଯୁକ୍ତିତର୍କ କରିଥିଲେ। ସାଧୁ ଉତ୍ତ୍ୟକ୍ତ ହେଉଥିବା ଦେଖି ଶମ୍ଭୁ ତାଙ୍କର ଅନ୍ୟ ଭାଇ ରାଜାଙ୍କୁ ଡାକିଥିଲେ। ଉଭୟଙ୍କୁ ମାରିଦେବା ଧମକ ଦେଇ ସାଧୁ ସେଠାରୁ ବାହନପତିଙ୍କୁ ନେଇ ପଳାଇଥିଲେ। ମଧ୍ୟରାତ୍ରିରେ ୨ଟି ସ୍କୁଟିରେ ସାଧୁ ଓ ଅନ୍ୟ ଅଭିଯୁକ୍ତମାନେ କାଠଫାଳିଆ, ଲୁହା ରଡ଼ ଓ ଅନ୍ୟାନ୍ୟ ମାରଣାସ୍ତ୍ର ଧରି ଫାଷ୍ଟଫୁଡ଼ ସେଣ୍ଟରକୁ ଆସିଥିଲେ। ଶମ୍ଭୁ ଓ ତାଙ୍କର ଅନ୍ୟ ୩ ଭାଇ ଦୋକାନ ବନ୍ଦ କରି ଘରକୁ ଯିବାକୁ ପ୍ରସ୍ତୁତ ହେଉଥିବା ବେଳେ ଅଭିଯୁକ୍ତମାନେ ସେମାନଙ୍କୁ ଅତର୍କିତ ଆକ୍ରମଣ କରିବାରୁ ସମସ୍ତଙ୍କ ମୃତ୍ୟୁ ଘଟିଥିଲା। ଘଟଣାରେ ଜଡ଼ିତ ଅନ୍ୟ ଜଣେ ଫେରାର ଅଛନ୍ତି। ତାଙ୍କୁ ଧରିବା ପାଇଁ ପୋଲିସର ଏକ ଟିମ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିବା ଏସପି ରଏ କହିଛନ୍ତି। ପିତଳ ଛକରେ ପୋଲିସ ଫାଣ୍ଡି ସ୍ଥାପନ ଦାବି ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଜଣାଯାଇଛି। ଫାଣ୍ଡି ପ୍ରତିଷ୍ଠା ପର୍ଯ୍ୟନ୍ତ ସେଠାରେ ପୋଲିସ ମୁତୟନ କରାଯିବ ବୋଲି ଏସ୍ପି ରଏ କହିଛନ୍ତି।
