ବାଉଁଶୁଣୀ,୨୯ା୭(ଡି.ଏନ୍.ଏ.): ମନ୍ତ୍ରୀଙ୍କ ଗାଡିକୁ ପିଛା କରିବା ଅଭିଯୋଗରେ ବୁଧବାର ରାତିରେ ପୋଲିସଠାରୁ ମାଡ ଖାଇ ୪ ଜଣ ଯୁବକ ମନମୁଣ୍ଡା ଥାନାରେ ଅଟକ ରହିବା ଘଟଣା ଗୁରୁବାର ଭିନ୍ନ ମୋଡ ନେଇଛି। ତଦନ୍ତରୁ ସତ୍ୟାସତ୍ୟ ଜଣାପଡିବା ପରେ ସେମାନଙ୍କୁ ପୋଲିସ ଛାଡି ଦେଇଛି।
ମିଳିଥିବା ସୂଚନା ଅନୁଯାୟୀ, ବୁଧବାର ରାତିରେ ମନ୍ତ୍ରୀ ପଦ୍ମନାଭ ବେହେରା ଭୁବନେଶ୍ବରରୁ ବୌଦ୍ଧ ଜିଲା ମନମୁଣ୍ଡା ଥାନା ଦେଇ ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥରେ ନିଜ ନିର୍ବାଚନମଣ୍ଡଳୀ ବୀରମହାରାଜପୁର ଯାଉଥିଲେ। ଏହି ସମୟରେ ଚାରିଛକରୁ ଏକ କଳା ରଙ୍ଗର ହୁଣ୍ଡାଇ କାରରେ ୪ ଜଣ ଯୁବକ ବସି ଆଗରେ ଯାଉଥିବା ମନ୍ତ୍ରୀ ବେହେରାଙ୍କ ଗାଡିର ପଛେ ପଛେ ଆସୁଥିଲେ । ବୌଦ୍ଧ ଜିଲାର ଚାରିଛକରୁ ମନମୁଣ୍ଡା ପର୍ଯ୍ୟନ୍ତ ଦୀର୍ଘ ୮୦ କିମି ଦୂର ମନ୍ତ୍ରୀଙ୍କ ଗାଡି ପଛରେ ଯୁବକଙ୍କ କାର୍ ଆସୁଥିବାରୁ ପାଇଲଟିଂ ଗାଡ଼ିରେ ଥିବା ପୋଲିସ ସନ୍ଦେହରେ ସେମାନଙ୍କୁ ଅଟକାଇ ମାଡ଼ ମାରି ମନମୁଣ୍ଡା ଥାନାରେ ଜିମା ଦେଇଥିଲା। ମନମୁଣ୍ଡା ଥାନା ଆଇଆଇସି ଗୋପୀନାଥ ପ୍ରଧାନ ୪ ଯୁବକଙ୍କୁ ପଚରାଉଚୁରା କରିବା ପରେ ସେମାନେ ସମସ୍ତେ ବଲାଙ୍ଗୀର ସହରର ଓ ବ୍ୟବସାୟୀ ବୋଲି ଜଣାପଡିଥିଲା। ସେମାନଙ୍କ କୌଣସି ମନ୍ଦ ଉଦ୍ଦେଶ୍ୟ ନ ଥିବା ଜାଣି ପୋଲିସ ସେମାନଙ୍କୁ ଛାଡି ଥିଲା।
