ଗାନ୍ଧୀନଗର, ୪।୧୧:ଗୁଜରାଟର ଅମରେଲୀ ଜିଲା ରାନ୍ଧିୟା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଏକ କାର୍ ମଧ୍ୟରେ ୪ ଜଣ ଶିଶୁଙ୍କର ଶ୍ୱାସରୁଦ୍ଧ ହୋଇ ମୃତ୍ୟୁଘଟିଛି। ମୃତ ୪ ଶିଶୁ ମଧ୍ୟପ୍ରଦେଶର ଧର ନିବାସୀ ଏକ କୃଷି ଶ୍ରମିକ ଦମ୍ପତିଙ୍କର ହୋଇଥିବା ନେଇ ଅମରେଲୀ ଉପ ଆରକ୍ଷୀ ଅଧୀକ୍ଷକ(ଡିଏସ୍ପି) ଚିରାଗ ଦେଶାଇ ସୋମବାର ଏହି ସୂଚନା ଦେଇଛନ୍ତି। ଏହି ଦମ୍ପତି ରବିବାର ସକାଳେ ନିଜର ୪ ପିଲାଙ୍କୁ ଘରେ ଛାଡ଼ି କାମ ପାଇଁ ଚାଷଜମିକୁ ଯାଇଥିଲେ। ଏତିକିବେଳେ ତାଙ୍କ ଘର ନିକଟରେ ପାର୍କ ହୋଇଥିବା ଏକ କାର୍ ମଧ୍ୟରେ ସେମାନଙ୍କର ୪ ପିଲା ଖେଳିବା ପାଇଁ ପଶିଯାଇଥିଲେ। କାର୍ ମଧ୍ୟରେ ଶିଶୁମାନେ ଖେଳୁଥିବା ଜାଣି ନ ପାରି ଏହାର ମାଲିକ କାର୍କୁ ଲକ୍ କରିଦେଇଥିଲେ। ଦୀର୍ଘ ସମୟ ଧରି କାର୍ ମଧ୍ୟରେ ବନ୍ଦ ରହିବାରୁ ଶ୍ୱାସରୁଦ୍ଧ ଘଟି ସମସ୍ତ ୪ ଶିଶୁଙ୍କର ମୃତ୍ୟୁ ଘଟିଥିବା ପୋଲିସ ସୂଚନା ଦେଇଛି। ୪ ମୃତ ଶିଶୁଙ୍କର ବୟସ ୨ରୁ ୭ ବର୍ଷ ମଧ୍ୟରେ ହେବ। ରବିବାର ସାରେ କାମ ସାରି ଘରକୁ ଫେରିବା ପରେ ଯାଇ ମୃତ ୪ ପିଲାଙ୍କ ଅଭିଭାବକ ସେମାନଙ୍କର ମୃତ୍ୟୁ ଖବର ପାଇଥିଲେ। ଘଟଣାକୁ ନେଇ ଅମେରେଲୀ ପୋଲିସ ଏକ ଦୁର୍ଘଟଣାଜନିତ ମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି।