ନୂଆଦିଲ୍ଲୀ,୨୪।୬: ୟୁନିସେଫ୍ ଏକ ଚାଞ୍ଚଲ୍ୟକର ରିପୋର୍ଟ ପ୍ରକାଶ କରିଛି। ରିପୋର୍ଟ ଅନୁଯାୟୀ ୨୦୨୨ମସିହାରେ ୪୩.୩କୋଟି ଶିଶୁଙ୍କୁ ବାଧ୍ୟତାମୂଳକ ବିସ୍ଥାପନର ଶିକାର ହେବାକୁ ପଡିଥିଲା। ସଦ୍ୟତମ ରିପୋର୍ଟ ଅନୁଯାୟୀ, ଜବରଦସ୍ତ ବିସ୍ଥାପିତ କରାଯାଇଥିବା ଶିଶୁଙ୍କ ସଂଖ୍ୟା ଗତ ଦଶନ୍ଧି ମଧ୍ୟରେ ଦ୍ୱିଗୁଣିତ ହୋଇଛି।
ରିପୋର୍ଟ ଅନୁଯାୟୀ, ବନ୍ୟା, ବାତ୍ୟା ଓ ମରୁଡ଼ି ଆଦି ପ୍ରାକୃତିକ ବିପର୍ଯ୍ୟୟ ହେତୁ ୧.୨କୋଟି ବିସ୍ଥାପିତ ଶିଶୁ ନିଜ ଘର ଛାଡିବାକୁ ବାଧ୍ୟ ହୋଇଛନ୍ତି। ଏହି ପ୍ରାକୃତିକ ବିପର୍ଯ୍ୟୟରେ ୨୦୨୨ମସିହାରେ ହୋଇଥିବା ପାକିସ୍ତାନର ବନ୍ୟା ପରିସ୍ଥିତି ଏବଂ ଆଫ୍ରିକାର ହର୍ନରେ ମରୁଡ଼ି ଅନ୍ତର୍ଭୁକ୍ତ।
ୟୁନିସେଫର କାର୍ଯ୍ୟନିର୍ବାହୀ ନିର୍ଦ୍ଦେଶକ କ୍ୟାଥରିନ ରସେଲଙ୍କ ଅନୁଯାୟୀ, ବିସ୍ଥାପିତ ଶିଶୁଙ୍କ ଏହି ସଂଖ୍ୟା ସମଗ୍ର ବିଶ୍ୱରେ ଚାଲିଥିବା ବିବାଦ, ହିଂସା ଏବଂ ପ୍ରାକୃତିକ ବିପର୍ଯ୍ୟୟ ସହିତ ସିଧାସଳଖ ଜଡିତ। ଏହି ସମସ୍ୟା ଶରଣାର୍ଥୀ ତଥା ଆଭ୍ୟନ୍ତରୀଣ ବିସ୍ଥାପିତ ଶିଶୁମାନଙ୍କର କଲ୍ୟାଣ, ଶିକ୍ଷା ତଥା ସାମଗ୍ରିକ ବିକାଶର ସୁରକ୍ଷା ପାଇଁ ଅନେକ ସରକାରଙ୍କ ଦ୍ୱାରା କରାଯାଇଥିବା ଅପର୍ଯ୍ୟାପ୍ତ ପ୍ରୟାସକୁ ମଧ୍ୟ ସୂଚିତ କରେ।
ୟୁନିସେଫ ଅନୁଯାୟୀ, ବିସ୍ଥାପିତ ୪୩.୩କୋଟି ଶିଶୁଙ୍କ ମଧ୍ୟରୁ ୬୦ ପ୍ରତିଶତ ହିଂସା ଏବଂ ବିବାଦର ଶିକାର ହୋଇଛନ୍ତି। ୟୁକ୍ରେନରେ ହୋଇଥିବା ଯୁଦ୍ଧ ଦୁଇ ଲକ୍ଷରୁ ଅଧିକ ୟୁକ୍ରେନ ପିଲାଙ୍କୁ ସେମାନଙ୍କ ପିତାମାତା ଏବଂ ପରିବାରଠାରୁ ଅଲଗା ହୋଇ ନିଜ ଦେଶ ଛାଡି ପଳାଇବାକୁ ବାଧ୍ୟ କରିଛି। ଏହି ଯୁଦ୍ଧରେ ଏକ ଲକ୍ଷରୁ ଅଧିକ ପିଲା ସ୍ଥାୟୀ ଭାବରେ ବିସ୍ଥାପିତ ହୋଇଛନ୍ତି। ଏଥିସହ ଶରଣାର୍ଥୀ ଏବଂ ଆଶ୍ରୟ ଖୋଜୁଥିବା ପିଲାଙ୍କ ସଂଖ୍ୟା ହେଉଛି ୧୭.୫କୋଟି। କେବଳ ସୁଦାନରେ ଏହି ବିବାଦ ହେତୁ ଏପର୍ଯ୍ୟନ୍ତ ପ୍ରାୟ ୯.୫ ଲକ୍ଷ ପିଲା ବିସ୍ଥାପିତ ହୋଇଛନ୍ତି।