ବରଗଡ଼ ଅଫିସ୍,୧୪।୧୧: ବରଗଡ଼ ଜିଲା ବିଜେପୁର-ପଦ୍ମପୁର ରାସ୍ତା ଏବଂ ଭଟଲି-ଅମ୍ବାଭୋନା ରାସ୍ତାରେ ରବିବାର ପୃଥକ ଭାବେ ୨ଟି ସଡ଼କ ଦୁର୍ଘଟଣା ଘଟିଛି। ଦୁର୍ଘଟଣାରେ ୪ଜଣଙ୍କ ମୃତ୍ୟୁ ଘଟିଛି।
ଭୋର୍ରେ ବିଜେପୁର-ପଦ୍ମପୁର ରାସ୍ତାର ଦୁବଲାବାହାଲ ନିକଟରେ କାଠପଟା ବୋଝେଇ ଏକ ପିକଅପ୍ ଭ୍ୟାନ(ନଂ.ଓଆର୧୫ଜି ୩୧୫୧) ରାସ୍ତା ପାର୍ଶ୍ୱରେ ଥିବା ଏକ ଇଟା ଗଦା ଉପରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଥିଲା। ଫଳରେ ଘଟଣାସ୍ଥଳରେ ୨ଜଣଙ୍କ ମୃତ୍ୟୁ ହୋଇଥିଲା। ମୃତକ ହେଲେ ତାଲପଦର ଗ୍ରାମର ଗଦନ ସାହୁ ଏବଂ କାର୍ତ୍ତିକ ବାଗ। ଖବର ପାଇ ମେଲଛାମୁଣ୍ଡା ଥାନା ପୋଲିସ ଘଟଣାସ୍ଥଳକୁ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପଠାଯାଇଥିଲା । ତେବେ ଦୁର୍ଘଟଣାଗ୍ରସ୍ତ ଗାଡ଼ିରେ ଆସୁଥିବା କାଠପଟା କେଉଁଠୁ ଆସି କେଉଁଠାକୁ ଯାଉଥିଲା, ତାହା ସ୍ପଷ୍ଟ ହୋଇ ନ ଥିବାବେଳେ ଏହା ଚୋରା ଚାଲାଣ ହେଉଥିବା ନେଇ ଅଞ୍ଚଳରେ ଚର୍ଚ୍ଚା ଜୋର୍ ଧରିଛି । ପୋଲିସ ଦୁର୍ଘଟଣାଗ୍ରସ୍ତ ପିକ୍ଅପ୍ ଭ୍ୟାନକୁ ଜବତ କରି ଅଧିକ ତଦନ୍ତ କରୁଛି।
ସେହିପରି ଅପରାହ୍ନରେ ଭଟଲି-ଅମ୍ବାଭୋନା ରାସ୍ତାର ସୁକୁଡ଼ାରେ ଏକ ବାଇକ୍(ନଂ.ଓଡ଼୦୮ଏଚ୍ ୯୧୭୦) ରାସ୍ତା ପାର୍ଶ୍ୱରେ ଥିବା ବିଦ୍ୟୁତ୍ ଖୁଣ୍ଟରେ ପିଟି ହୋଇ ଦୁର୍ଘଟଣା ଗ୍ରସ୍ତ ହୋଇଥିଲା। ଏଥିରେ ୨ ବାଇକ୍ ଆରୋହୀଙ୍କ ମୃତ୍ୟୁ ଘଟିଥିଲା। ମୃତକ ହେଲେ ବରଗଡ଼ ଗଣପତି ହୋଟେଲ ପଛପଟ ନୂଆଖୁଲିପଡ଼ାର ଆୟୁଷ ଅଗ୍ରୱାଲ(୨୨) ଓ ନୂଆପଡ଼ା ଜିଲା କୋମନା ଥାନା କଣ୍ଡେତୋରା ଗ୍ରାମର ପ୍ରିୟାଂଶୁ ପଣ୍ଡା(୨୨) । ଉଭୟେ ବାଇକ୍ ଯୋଗେ ଅମ୍ବାଭୋନା କେଦାରନାଥ ମନ୍ଦିର ଦର୍ଶନ କରିବାକୁ ଯାଇଥିଲେ। ଫେରିବା ବାଟରେ ଦୁର୍ଘଟଣା ଘଟିଥିଲା। ଭଟଲି ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
