ଚଣ୍ଡିଗଡ଼,୧୧।୬: ପଞ୍ଜାବ ଏବଂ ହରିୟାଣାର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା ଲାଗି ରହିଛି। ଏଭଳିସ୍ଥିତିରେ ପଞ୍ଜାବର ପଟିଆଲା ଜିଲାରେ ଗୋଟିଏ ପରିବାରର ୪ ଜଣ ଏବଂ ଅନ୍ୟ ଜଣେ ବାଇକ୍ ଆରୋହୀଙ୍କ ମୃତ୍ୟୁ ଘଟିଛି। ବର୍ଷା ଯୋଗୁ ସୈଦଖେରି ଗ୍ରାମରେ ଏକ ଘର କାନ୍ଥ ଭୁଶୁଡ଼ିପଡ଼ିବାରୁ ପରିବାରର ୨ ଶିଶୁଙ୍କ ସମେତ ୪ ଜଣଙ୍କ ମୃତ୍ୟୁ ହୋଇଥିବା ଏସ୍ପି ସନ୍ଦିପ୍ କୁମାର ଗର୍ଗ କହିଛନ୍ତି। ଅନ୍ୟ ଘଟଣାରେ ବାଇକ୍ ଚାଳକ ବର୍ଷା ବେଳେ ଏକ କଣ୍ଟେନର ତଳେ ଆଶ୍ରୟ ନେଇଥିଲେ। ହେଲେ କଣ୍ଟେନର ଢଳିପଡ଼ିବାରୁ ଏଥିରେ ଚାପି ହୋଇ ତାଙ୍କର ମୃତ୍ୟୁ ଘଟିଛି। ଗୁରୁବାରଠାରୁ ବର୍ଷା ସାଙ୍ଗକୁ ଜୋର୍ରେ ପବନ ବହୁଥିବାରୁ ଅନେକ ଅଞ୍ଚଳରେ ଗଛ ଏବଂ ବିଦ୍ୟୁତ୍ ଖୁଣ୍ଟ ଉପୁଡ଼ିପଡ଼ିଛି।