ମୈନପୁରୀ,୨୭।୧୦: ଉତ୍ତରପ୍ରଦେଶର ମୈନପୁରୀରେ ଭାଇ ଦୁଜରେ ଏକ ଦୁଃଖଦ ଘଟଣା ଘଟିଛି। ଘରେ ତିଆରି ହୋଇଥିବା ଚା’ ପିଇ ୨ଶିଶୁଙ୍କ ସମେତ ୪ଜଣଙ୍କ ମୃତ୍ୟୁ ଘଟିଛି। ଏଥିସହ ଅନ୍ୟଜଣଙ୍କ ଅବସ୍ଥା ଗୁରୁତର ରହିଛି। ସୂଚନାଯୋଗ୍ୟ, ନଗଲା କହ୍ନି ଗ୍ରାମରେ ରହୁଥିବା ଶିବାନନ୍ଦନଙ୍କ ଘରେ ଗୁରୁବାର ସକାଳେ ଭାଇ ଦୁଜ ପର୍ବ ପାଇଁ ପ୍ରସ୍ତୁତି ଚାଲିଥିଲା। ଫିରୋଜାବାଦରେ ରହୁଥିବା ତାଙ୍କ ଶ୍ୱଶୁର ରବିନ୍ଦ୍ର ସିଂହ ମଧ୍ୟ ଘରକୁ ଆସିଥିଲେ। ସମସ୍ତେ ଏକାଠି ଚା’ ପିଇଥିଲେ। ଚା’ ପିଇବା ପରେ ହଠାତ୍ ଶ୍ୱଶୁର ରବିନ୍ଦ୍ରଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଯିବା ସହ ଅଚେତ ହୋଇପଡ଼ିଥିଲେ। ଏହାପରେ ଶିବାନନ୍ଦନଙ୍କ ୬ବର୍ଷର ପୁଅ ଶିବାଙ୍ଗ ଓ ୫ବର୍ଷର ପୁଅ ଦିବ୍ୟାଂଶଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଯାଇଥିଲା। ସେମାନଙ୍କୁ ପରିବାରଲୋକେ ତୁରନ୍ତ ହସ୍ପିଟାଲକୁ ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟପଟେ ଶିବାନନ୍ଦନ ଓ ସୋବରନ ସିଂହଙ୍କ ଅବସ୍ଥା ମଧ୍ୟ ଗୁରୁତର ହୋଇପଡ଼ିଥିବା ବେଳେ ତାଙ୍କୁ ସୈଫଇ ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା। ହେଲେ ଚିକିତ୍ସାଧିନ ଅବସ୍ଥାରେ ସୋବରନଙ୍କ ମୃତ୍ୟୁ ଘଟିଛି। ୪ଜଣଙ୍କ ମୃତ୍ୟୁ ଖବର ଶୁଣି ପରିବାରଲୋକ ଓ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ଖବର ପାଇ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ତେବେ ଚା’ପତି ସ୍ଥାନରେ କୌଣସି କୀଟନାଶକ ଦ୍ରବ୍ୟ ପଡ଼ିଯାଇଥିବାରୁ ଏମାନଙ୍କର ମୃତ୍ୟୁ ଘଟିଛି ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି।
