ନୂଆଦିଲ୍ଲୀ, ୨୦ା୪ (ପି.ଟି.)-ପୋଲାଣ୍ଡର କିଲ୍ସିଠାରେ ଚାଲିଥିବା ଉଭୟ ପୁରୁଷ ଓ ମହିଳା ଓ୍ବାଲର୍ଡ ୟୁଥ୍ ବକ୍ସିଂ ଚାମ୍ପିୟନଶିପ୍ରେ ଏସିଆନ ଚାମ୍ପିୟନ ଭିନ୍କା ଓ ଅଲଫିୟା ପଠାନଙ୍କ ସମେତ ଭାରତର ୪ ବକ୍ସର ସେମିଫାଇନାଲରେ ପ୍ରବେଶ ସହ ପଦକ ପକ୍କା କରିଛନ୍ତି। ସେମିଫାଇନାଲରେ ପ୍ରବେଶ କରିଥିବା ଅନ୍ୟ ଦୁଇ ବକ୍ସର ହେଲେ ଗୀତିକା ଓ ପୁନମ। ସମସ୍ତେ ଅତି କମ୍ରେ ଦେଶ ପାଇଁ ଏକ ବ୍ରୋଞ୍ଜ ପଦକ ଜିତିପାରିବେ। ପାନିପତ ବକ୍ସର ଭିନିକା ୬୦କେଜି କାଟେଗୋରିରେ କଲମ୍ବିଆ ପ୍ରତିଦ୍ୱନ୍ଦ୍ୱୀ କାମିଲୋ କାମେଲାଙ୍କୁ ୫-୦ରେ ହରାଇ ଦେଇଥିବାବେଳେ ୨୦୧୯ ଏସିଆନ ଜୁନିୟର ଚାମ୍ପିୟନ ଅଲଫିୟା (+୮୧) ସମାନ ପଏଣ୍ଟ ବ୍ୟବଧାନରେ ହଙ୍ଗେରିଆନ ବକ୍ସର ରେକା ହଫ୍ମ୍ୟାନଙ୍କୁ ପରାସ୍ତ କରିଥିଲେ। ୫୭କେଜି ଶ୍ରେଣୀରେ ପୁନମ କାଜାଖସ୍ତାନର ନାଜର୍କେ ସେରିକ୍ଙ୍କ ବିପକ୍ଷରେ ୫-୦ରେ ବିଜୟ ହାସଲ କରି ସେମିଫାଇନାଲରେ ପ୍ରବେଶ କରିଛନ୍ତି। ଗୀତିକା
(୪୮କେଜି) ତାଙ୍କ ପ୍ରତିଦ୍ୱନ୍ଦ୍ୱୀଙ୍କ ବିରୋଧରେ ପ୍ରାଧାନ୍ୟ ବିସ୍ତାର କରିଥିଲେ। ରୋମାନିଆର ଏଲିଜାବେଥ ଓଷ୍ଟାନଙ୍କ ବିରୋଧରେ ଗୋଟିକ ପରେ ଗୋଟିଏ ପଞ୍ଚ୍ ମାରି ତାଙ୍କୁ କୌଣସି ସୁଯୋଗ ଦେଇ ନ ଥିଲେ। ରେଫରି ବାଧ୍ୟ ହୋଇ ପ୍ରଥମ ରାଉଣ୍ଡ ପରେ ମୁକାବିଲାକୁ ସ୍ଥଗିତ ରଖିଥିଲେ। ହରିୟାଣା ବକ୍ସରଙ୍କୁ ସେ ବିଜେତା ଘୋଷଣା କରିଥିଲେ। ଭାରତର ଅନ୍ୟ ଜଣେ ମହିଳା ବକ୍ସର ଖୁସୀ (୮୧କେଜି) ତୁର୍କୀର ବୁସ୍ରା ଇସିଲଦାରଙ୍କ ବିପକ୍ଷ ତାଙ୍କ କ୍ୱାର୍ଟରଫାଇନାଲ ବାଉଟ ହାରିଯାଇଥିଲେ।
ବିଭାଗରେ ମନୀଷ (୭୫କେଜି) ଓ ସୁମିତ୍ (୬୯କେଜି) ଯଥାକ୍ରମେ ଜୋର୍ଡାନର ଅବ୍ଦଲ୍ଲା ଆଲ୍ଲାରାଗ ଏବଂ ସ୍ଲୋଭାକିଆର ଲାଦିସ୍ଲାମ ହୋର୍ଭାଥ୍ଙ୍କୁ ସମାନ ୫-୦ ପଏଣ୍ଟରେ ପରାସ୍ତ କରି ସେମାନଙ୍କ କାଟେଗୋରିରେ କ୍ୱାର୍ଟରଫାଇନାଲକୁ ଉନ୍ନୀତ ହୋଇଥିଲେ। ଅନ୍ୟପକ୍ଷରେ ଆକାଶ ଗୋର୍ଖା (୬୦କେଜି) ଓ ଭିନିତ୍ (୮୧କେଜି) ସେମାନଙ୍କ ପ୍ରିକ୍ୱାର୍ଟର ବାଉଟ୍ରେ ପରାଜୟ ସହ ଅଭିଯାନ ଶେଷ କରିଛନ୍ତି।
