ନୂଆଦିଲ୍ଲୀ, ୮।୪(ପି.ଟି.)- ଭାରତୀୟ ମହିଳା ଟେନିସ ତାରକା ସାନିଆ ମିର୍ଜା ସରକାରଙ୍କ ଟାର୍ଗେଟ ଅଲିମ୍ପିକ୍ ପୋଡିୟମ ସ୍କିମ୍ (ଟପ୍ସ)ରେ ସାମିଲ ହୋଇଛନ୍ତି। ୪ ବର୍ଷ ବ୍ୟବଧାନରେ ସାନିଆ ଏହି କାର୍ଯ୍ୟକ୍ରମରେ ପୁଣି ସାମିଲ ହୋଇଛନ୍ତି। ଏଠାରେ ଅନୁଷ୍ଠିତ ୫୬ତମ ମିଶନ ଅଲିମ୍ପିକ୍ ସେଲ୍ର ବୈଠକରେ ସାନିଆଙ୍କୁ ସାମିଲ ସମ୍ପର୍କରେ ନିଷ୍ପତ୍ତି ନିଆଯାଇଥିଲା। ଏକାଧିକ ବିଭାଗରେ ଗ୍ରାଣ୍ଡସ୍ଲାମ ବିଜୟିନୀ ୩୪ ବର୍ଷୀୟା ସାନିଆ ଏହାପୂର୍ବରୁ ଶେଷଥର ପାଇଁ ୨୦୧୭ରେ ଏହି ସ୍କିମ୍ରେ ସାମିଲ ହୋଇଥିଲେ। ଏହାପରେ ଆହତ ସମସ୍ୟା ଯୋଗୁ ବାଦ୍ ପଡ଼ିଥିଲେ। ର଼୍ୟାଙ୍କିଙ୍ଗ୍ ଦୃଷ୍ଟିରୁ ସାନିଆ ଟୋକିଓ ଅଲିମ୍ପିକ୍ସରେ ଖେଳିବାକୁ ଯୋଗ୍ୟତା ଅର୍ଜନ କରିଛନ୍ତି। ଗର୍ଭାବସ୍ଥା ପାଇଁ ସେ ବ୍ରେକ୍ ନେଇଥିବାବେଳେ ତାଙ୍କ ବିଶ୍ୱ ର଼୍ୟାଙ୍କିଙ୍ଗ୍ ଏବେ ୧୫୭ ରହିଛି। ମାତ୍ର ଡବ୍ଲ୍ୟୁଟିଏ ନିୟମ ଅନୁସାରେ ଯଦି କୌଣସି ଖେଳାଳି ଆହତ ସମସ୍ୟା କିମ୍ବା ଗର୍ଭାବସ୍ଥା ପାଇଁ ୬ ମାସରୁ ଊର୍ଦ୍ଧ୍ୱ ଟେନିସରୁ ଦୂରେଇ ରୁହେ ସେ କ୍ଷେତ୍ରରେ ସେମାନେ ସ୍ପେଶାଲ ର଼୍ୟାଙ୍କିଙ୍ଗ୍ ବା ପ୍ରୋଟେକ୍ଟେଡ ର଼୍ୟାଙ୍କିଙ୍ଗ୍ ପାଇଁ ଆବେଦନ କରିପାରିବେ। ସେ କ୍ଷେତ୍ରରେ ସେମାନେ ଖେଳିଥିବା ପୂର୍ବ ଟୁର୍ନାମେଣ୍ଟର ର଼୍ୟାଙ୍କ୍ ବିଚାରକୁ ନିଆଯିବ। ସାନିଆ ଶେଷଥର ପାଇଁ ୨୦୧୭ ଅକ୍ଟୋବରରେ ଚାଇନା ଓପନରେ ଖେଳିଥିଲେ। ସେତେବେଳେ ସେ ବିଶ୍ୱ ର଼୍ୟାଙ୍କିଙ୍ଗ୍ର ୯ମ ସ୍ଥାନରେ ଥିଲେ। ତେଣୁ ସ୍ପେଶାଲ ର଼୍ୟାଙ୍କିଙ୍ଗ୍ (୯ମ) ଭିତ୍ତିରେ ସେ ଅଲିମ୍ପିକ୍ସ ଯୋଗ୍ୟତା ପାଇଛନ୍ତି। କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ଡବ୍ଲ୍ୟୁଟିଏ ପକ୍ଷରୁ ସ୍ପେଶାଲ ର଼୍ୟାଙ୍କିଙ୍ଗ୍ ପ୍ରଚଳନ କରାଯାଇଛି। ଗର୍ଭାବସ୍ଥା ପାଇଁ ସାନିଆ ୨ ବର୍ଷ ଟେନିସରୁ ଦୂରେଇ ରହିଥିଲେ। ପୁତ୍ରସନ୍ତାନ ଜନ୍ମ ହେବା ପରେ ଗତବର୍ଷ ସେ ଟେନିସ କୋର୍ଟକୁ ପ୍ରତ୍ୟାବର୍ତ୍ତନ କରି ସିଜନ ପ୍ରାରମ୍ଭ ହୋବାର୍ଟ ଅନ୍ତର୍ଜାତୀୟ ଡବ୍ଲ୍ୟୁଟିଏ ଇଭେଣ୍ଟ ଖେଳିଥିଲେ। ୟୁକ୍ରେନର ନାଦିଆ କିଚେନକ୍ଙ୍କୁ ସାଥିକରି ସେ ମହିଳା ଡବଲ୍ସ ଟାଇଟଲ ଜିତିଥିଲେ।