ଓ୍ବେଲିଂଟନ,୬।୩(ଏପି): ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଟି୨୦ ମ୍ୟାଚ୍ରେ ଭ୍ରମଣକାରୀ ଅଷ୍ଟ୍ରେଲିଆ ୫୦ ରନରେ ବିଜୟୀ ହୋଇଛି। ଫଳରେ ୫ ମ୍ୟାଚ୍ ବିଶିଷ୍ଟ ଏହି ସିରିଜ ୨-୨ ସମାନ ସ୍ତରରେ ପହଞ୍ଚିଛି। ସ୍ଥାନୀୟ ଓ୍ବେଷ୍ଟପ୍ୟାକ ଷ୍ଟାଡିୟମରେ ଶୁକ୍ରବାର ଖେଳାଯାଇଥିବା ଏହି ମ୍ୟାଚ୍ରେ ଟସ୍ ଜିତି ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୨୦ ଓଭରରେ ୬ ଉଇକେଟ ହରାଇ ୧୫୬ ରନ ସଂଗ୍ରହ କରିଥିଲା। ଜବାବରେ ନ୍ୟୁଜିଲାଣ୍ଡ ୧୮.୫ ଓଭରରେ ୧୦୬ ରନରେ ଅଲଆଉଟ ହୋଇ ପରାସ୍ତ ହୋଇଥିଲା। ୫୫ ବଲରୁ ୫ ଚୌକା ଓ ୪ ଛକା ସହ ୭୯ ରନର ଅପରାଜିତ ଇନିଂସ ଖେଳିଥିବା ଅଷ୍ଟ୍ରେଲିଆ ଅଧିନାୟକ ଆରୋନ ଫିଞ୍ଚ୍ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। ପୂର୍ବରୁ ଏହି ଗ୍ରାଉଣ୍ଡରେ ଅଷ୍ଟ୍ରେଲିଆ ତୃତୀୟ ଟି୨୦ରେ ନ୍ୟୁଜିଲାଣ୍ଡକୁ ୬୪ ରନରେ ପରାସ୍ତ କରିଥିଲା।
ଫିଞ୍ଚ୍ଙ୍କୁ ବାଦ୍ ଦେଲେ ଅଷ୍ଟ୍ରେଲିଆ ତରଫରୁ ଅନ୍ୟମାନେ ଅବଶ୍ୟ ବଡ଼ ସ୍କୋର ହାସଲ କରି ନ ଥିଲେ। ଏହି କ୍ରମରେ ଓପନର ମାଥ୍ୟୁ ଓ୍ବେଡ୍ ୧୪, ଜୋଶ ଫିଲିପ୍ ୧୩, ଗ୍ଲେନ ମ୍ୟାକ୍ସଓ୍ବେଲ ୧୮, ମାର୍କସ ଷ୍ଟୋଇନିସ ୧୯ ରନ ସଂଗ୍ରହ କରିଥିଲେ। ଆଷ୍ଟନ ଅଗର ଖାତା ଖୋଲିପାରି ନ ଥିବା ବେଳେ ମିଚେଲ ମାର୍ଶ ୬ ରନକରି ଆଉଟ ହୋଇଥିଲେ। ଝେ ରିଚାର୍ଡସନ ୪ ରନକରି ଅପରାଜିତ ହୋଇଥିଲେ। ବୋଲିଂରେ ସ୍ପିନର ଇଶ୍ ସୋଧି ସର୍ବାଧିକ ୩, ଟ୍ରେଣ୍ଟ ବୋଲ୍ଟ ୨ ଓ ମିଚେଲ ସାଣ୍ଟନର ଗୋଟିଏ ଉଇକେଟ ଅକ୍ତିଆର କରିଥିଲେ।
୧୫୭ ରନ ବିଜୟ ଲକ୍ଷ୍ୟର ପିଛା କରି ନ୍ୟୁଜିଲାଣ୍ଡ ନିୟମିତ ଅନ୍ତରରେ ଉଇକେଟ ହରାଇଥିଲା। ଦଳର ୮ଜଣ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁ ପାରି ନ ଥିଲେ। ଓପନର ତଥା ଉଇକେଟକିପର ଟିମ ସେଇଫର୍ଟ ୧୯, ଡେଭନ କନ୍ଓ୍ବେ ୧୭ ଓ କାଏଲ ଜେମିସନ ସର୍ବାଧିକ ୩୦ (୧୮ ବଲ, ୫ ଚୌକା) ରନ ସଂଗ୍ରହ କରିଥିଲେ। ଅଷ୍ଟ୍ରେଲିଆ ତରଫରୁ ବୋଲିଂରେ ଦ୍ରୁତ ବୋଲର କେନ୍ ରିଚାର୍ଡସନ ୩ ଉଇକେଟ ଅକ୍ତିଆର କରିଥିଲେ। ୩ ସ୍ପିନର ଆଷ୍ଟନ ଅଗର, ଆଡାମ ଜାମ୍ପା ଓ ଗ୍ଲେନ୍ ମ୍ୟାକ୍ସଓ୍ବେଲ୍ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ୨୦ ଓଭରରେ ୧୫୬/୬
(ଆରୋନ ଫିଞ୍ଚ୍- ୭୯*, ଷ୍ଟୋଇନିସ- ୧୯, ମ୍ୟାକ୍ସଓ୍ବେଲ- ୧୮, ଓ୍ବେଡ- ୧୪, ସୋଧି- ୩/୩୨, ବୋଲ୍ଟ- ୨/୨୭)।
ନ୍ୟୁଜିଲାଣ୍ଡ ୧୮.୫ ଓଭରରେ ୧୦୬ ଅଲଆଉଟ
(ରିଚାର୍ଡସନ- ୩/୧୯, ଅଗର- ୨/୧୧, ଜାମ୍ପା- ୨/୨୪, ମ୍ୟାକ୍ସଓ୍ବେଲ- ୨/୧୪)।