ନୂଆଦିଲ୍ଲୀ,୮।୩ : ଭାରତରେ କରୋନାର ତୃତୀୟ ଲହର କ୍ରମାଗତ ଭାବରେ ଦୁର୍ବଳ ହେଉଛି। ବର୍ତ୍ତମାନ ସାରା ଦେଶରେ କରୋନା ସକ୍ରିୟ ମାମଲା ମଧ୍ୟ ୫୦ ହଜାରକୁ ଖସି ଆସିଛି। ଏଭଳି ପରିସ୍ଥିତିରେ କରୋନା ସମ୍ବନ୍ଧରେ ସ୍ବାସ୍ଥ୍ୟ ବିଶେଷଜ୍ଞମାନଙ୍କ ପକ୍ଷରୁ ଜାରି ହୋଇଥିବା ରିପୋର୍ଟ କୁହାଯାଇଛି ଯେ, ଦେଶରେ କରୋନା ମହାମାରୀ ସଂକ୍ରମଣର ବଳ କମିବାରେ ଲାଗିଛି।
ଏପିଡେମୋଲୋଜିଷ୍ଟ ଡାକ୍ତର ଟି. ଜ୍ୟାକବ ଜନ କହିଛନ୍ତି ଯେ ଭାରତରେ କରୋନାର ତୃତୀୟ ଲହର ଏହାର ଶେଷ ପର୍ଯ୍ୟାୟରେ ଅଛି ଏବଂ ବର୍ତ୍ତମାନ କରୋନାର ଚତୁର୍ଥ ଲହର ଆସିବାର ଆଶଙ୍କା କମ୍ ରହିଛି। ନୂଆ ଭାରିଆଣ୍ଟ୍ ଆସିଲେ ହୁଏତ ପୁଣି ସଂକ୍ରମଣ ହେବାର ଆଶଙ୍କା ରହିଛି। ମାତ୍ର ନିକଟ ଭବିଷ୍ୟତରେ ଏହା ସମ୍ଭବ ନୁହେଁ ବୋଲି ସେ କହିଛନ୍ତି।
ମଙ୍ଗଳବାର ଦିନ ଆସିଥିବା କରୋନା ରିପୋର୍ଟ ଅନୁଯାୟୀ, ଗତ ୨୪ ଘଣ୍ଟାରେ ୩୯୯୩ ନୂଆ କରୋନା ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ଗତ ୬୬୨ ଦିନ ମଧ୍ୟରେ ମଙ୍ଗଳବାରର ଏହି ସଂଖ୍ୟା ସର୍ବନିମ୍ନସ୍ତରରେ ରହିଛି। ୨୦୨୨ ଜାନୁୟାରୀ ୨୧ଠାରୁ, କରୋନା ମାମଲାରେ ହ୍ରାସ ଘଟିବାରେ ଲାଗିଛି। ସେହି ସମୟରେ ଦେଶରେ ସମୁଦାୟ କରୋନା ମାମଲା ୩ ଲକ୍ଷ ୪୭ ହଜାର ୨୫୪ ଥିଲା। ଯାହା ବର୍ତ୍ତମାନ ଏହା ୫୦ ହଜାର ତଳେ ରହିଛି। ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚର ଭିରୋଲୋଜି ସେଣ୍ଟରର ପୂର୍ବତନ ନିର୍ଦ୍ଦେଶକ ଡାକ୍ତର ଟି. ଜ୍ୟାକବ ଜନ କହିଛନ୍ତି ଯେ ଦେଶରେ କରୋନାର ତୃତୀୟ ଲହର ଦୁର୍ବଳ ହେଉଛି।
ଏହି ଆକଳନରୁ ଏହା ସ୍ପଷ୍ଟ ହୋଇଛି ଯେ ମହାମାରୀ ବର୍ତ୍ତମାନ ଏକ ଏଣ୍ଡେମିକ୍(ଶେଷ ପର୍ଯ୍ୟାୟ)ରେ ପହଞ୍ଚିଛି। କରୋନାଙ୍କ ଅବସ୍ଥା ବିଷୟରେ ବର୍ଣ୍ଣନା କରି ସେ କହିଛନ୍ତି, ମହାମାରୀ ବର୍ତ୍ତମାନ ଦୁର୍ବଳ ହୋଇ ଏଣ୍ଡେମିକରେ ପରିଣତ ହେବାରେ ଲାଗିଛି। ଗତ ୪ ସପ୍ତାହ ଧରି ନୂଆ କରୋନା ଆକ୍ରାନ୍ତଙ୍କ ସଂଖ୍ୟାରେ ହ୍ରାସ ଘଟିଛି। ଆସନ୍ତା ସପ୍ତାହରେ ପରିସ୍ଥିତି ଆହୁରି ବଦଳିଯିବ।
ଏଣ୍ଡେମିକ ହେଉଛି ଏକ ଅବସ୍ଥା ଯେଉଁଥିରେ ଲୋକମାନେ ଭୂତାଣୁ ସହ ଜୀଇଁବାରେ ସକ୍ଷମ ହୋଇଥାନ୍ତି। ଏହାର ମୁକାବିଲା ପାଇଁ ସେମାନଙ୍କ ଶରୀରରେ ଆଣ୍ଟିବଡି ବିକଶିତ ହୋଇ ସାରିଥାଏ।
ସେ କହିଛନ୍ତି ଯେ ବର୍ତ୍ତମାନ ପର୍ଯ୍ୟନ୍ତ ମିଳିଥିବା କରୋନାର ବିଭିନ୍ନ ଭାରିଆଣ୍ଟ୍ରୁ ଯଦି ଏକ ନୂତନ ଭାରିଆଣ୍ଟ୍ର ବିକଶିତ ହୁଏ, ତେବେ ସ୍ଥିତି ପୁଣି ବଦଳିପାରେ।