କୋଲକାତା,୪।୨(ପି.ଟି.): ଇଷ୍ଟ ବେଙ୍ଗଲ ଫୁଟ୍ବଲ କ୍ଲବର ହାଇପ୍ରୋଫାଇଲ କୋଚ୍ ରୋବି ଫୋଲର ଚଳିତ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ରେ ଭାରତୀୟ ରେଫରିଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇ ୪ଟି ମ୍ୟାଚ୍ରୁ ବାସନ୍ଦ ହୋଇଛନ୍ତି। ଏଥିସହ ତାଙ୍କ ଉପରେ ୫ ଲକ୍ଷ ଟଙ୍କାର ଜରିମାନା ଧାର୍ଯ୍ୟ କରାଯାଇଛି। ତେବେ ମୋ ମନ୍ତବ୍ୟରେ କୌଣସି ବର୍ଣ୍ଣବୈଷମ୍ୟ ଆକ୍ଷେପ ନ ଥିଲା ବୋଲି ଫୋଲର ସ୍ପଷ୍ଟ କରିଛନ୍ତି। ରେଫରିଙ୍କ ନିଷ୍ପତ୍ତିରେ ସେ ଅସନ୍ତୋଷ ଜାହିର କରିଥିଲେ। ଜାନୁୟାରୀ ୨୯ରେ ଏଫ୍ସି ଗୋଆ ବିପକ୍ଷରେ ଇଷ୍ଟ ବେଙ୍ଗଲ ୧-୧ ଗୋଲରେ ମ୍ୟାଚ୍ ଡ୍ର ରଖିଥିଲା। ଏଥିରେ ଫୋଲର ନୈରାଶ୍ୟ ଜାହିର କରିଥିଲେ। ସେ ରେଫରିଙ୍କ ନିଷ୍ପତ୍ତିରେ ଅସନ୍ତୋଷ ବ୍ୟକ୍ତ କରିଥିଲେ। ରେଫରି ଇଂଲଣ୍ଡ ବିରୋଧୀ କିମ୍ବା ଇଷ୍ଟବେଙ୍ଗଲ ବିରୋଧୀ ହୋଇପାରନ୍ତି ବୋଲି ସେ ମନ୍ତବ୍ୟ ଦେଇଥିଲେ। ପୂର୍ବରୁ ମଧ୍ୟ ଏହି ଲିଭରପୁଲ ଲିଜେଣ୍ଡ ରେଫରିଙ୍କ ନିଷ୍ପତ୍ତିକୁ ନେଇ ଏକାଧିକ ବାର ଅସନ୍ତୋଷ ଜାହିର କରିଛନ୍ତି। ଅଲ୍ ଇଣ୍ଡିଆ ଫୁଟ୍ବଲ ଫେଡେରେଶନ (ଏଆଇଏଫ୍ଏଫ୍) ଶୃଙ୍ଖଳାଗତ କମିଟି ତାଙ୍କୁ ଦଣ୍ଡିତ କରିଛି।
