ମାର୍ଗାଓ, ୧୬ା୨ (ପି.ଟି.): ଏସ୍ସି ଇଷ୍ଟବେଙ୍ଗଲର ହାଇପ୍ରୋଫାଇଲ ଇଂଲିଶ କୋଚ୍ ରୋବି ଫାଉଲରଙ୍କୁ ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ତରଫରୁ ସୋମବାର କାରଣ ଦର୍ଶାଅ ନୋଟିସ୍ ହେବାରୁ ତାଙ୍କ ଅଡୁଆ ବଢିଯାଇଛି। ତାଙ୍କୁ ଶୃଙ୍ଖଳା କମିଟି ଆଗରେ ହାଜର ହେବାକୁ ପଡ଼ିବ। ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ)ରେ ଗତ ଶୁକ୍ରବାର ଭାସ୍କୋସ୍ଥିତ ତିଳକ ମୈଦାନ ଷ୍ଟାଡିୟମରେ ହାଇଦ୍ରାବାଦ ଏଫ୍ସି ବିପକ୍ଷ ମ୍ୟାଚ ପରେ ଫାଓଲରଙ୍କର ବିପକ୍ଷ ଦଳର ଖେଳାଳିମାନଙ୍କ ସହ ବଚସା ହୋଇଥିଲା। ସେମାନଙ୍କ ବିରୋଧରେ ସେ ଖରାପ ଭାଷା ପ୍ରୟୋଗ କରିଥିଲେ। ଏପରିକି ଭାରତୀୟ ରେଫରିଙ୍କୁ ସେ ଅପମାନିତ କରି ଟିପ୍ପଣୀ ଦେଇଥିଲେ। ମ୍ୟାଚଟି ୧-୧ରେ ଅମୀମାଂସିତ ଭାବେ ଶେଷ ହୋଇଥିଲା। ଫାଓଲର ଷ୍ଟାଣ୍ଡରୁ ଖେଳ ଦେଖୁଥିଲେ। ସେ ଦୋଷୀ ସାବ୍ୟସ୍ତ ହେବାରୁ ଫେବୃୟାରୀ ୩ରେ ତାଙ୍କୁ ୪ଟି ମ୍ୟାଚ୍ରୁ ସସ୍ପେଣ୍ଡ କରାଯିବା ସହ ୫ ଲକ୍ଷ ଟଙ୍କା ଜରିମାନା ହୋଇଥିଲା। ପୂର୍ବତନ ବିଶ୍ୱକପ୍ ଖେଳାଳି କିନ୍ତୁ ସଫେଇ ଦେଇଥିଲେ ସେ କୌଣସି ଜାତିଆଣ ଟିପ୍ପଣୀ ଦେଇ ନାହାନ୍ତି। ଫେବୃୟାରୀ ୨୩ରେ ତାଙ୍କ ଦଳର ନର୍ଥଇଷ୍ଟ ୟୁନାଇଟେଡ୍ ଏଫ୍ସି ବିପକ୍ଷ ଲିଗ୍ ମ୍ୟାଚ୍ ପର୍ଯ୍ୟନ୍ତ ସେ ସସ୍ପେଣ୍ଡ ରହିବେ।
