ଭୁବନେଶ୍ୱର,୫।୧୨: ଜୁନିୟର ହକି ବିଶ୍ୱକପରେ ଗତ ସଂସ୍କରଣର ଚାମ୍ପିୟନ ଭାରତ ଏଥର ୪ର୍ଥ ସ୍ଥାନରେ ରହି ପ୍ରତିଯୋଗିତା ଶେଷ କରିଛି। କଳିଙ୍ଗ ଷ୍ଟାଡିୟମରେ ରବିବାର ଅନୁଷ୍ଠିତ ଏଫ୍ଆଇଏଚ୍ ଓଡ଼ିଶା ହକି ପୁରୁଷ ଜୁନିୟର ବିଶ୍ୱକପର ବ୍ରୋଞ୍ଜ ପଦକ ମ୍ୟାଚରେ ଭାରତ ୧-୩ ଗୋଲରେ ଫ୍ରାନ୍ସ ନିକଟରୁ ହାରିଯାଇଛି। ସୁଯୋଗର ସଦ୍ବ୍ୟବହାର କରି ନ ପାରିବା ଘରୋଇ ଦଳପାଇଁ ମହଙ୍ଗା ପଡ଼ିଛି। ଭାରତ ପକ୍ଷରୁ ଓଡ଼ିଆ ଖେଳାଳି ସୁଦୀପ ଚିରମାକୋ ଏକମାତ୍ର ଗୋଲଟି ଦେଇଥିବାବେଳେ ଅଧିନାୟକ ଟିମୋଥି କ୍ଲିିମେଣ୍ଟଙ୍କ ହ୍ୟାଟ୍ରିକ ଫ୍ରାନ୍ସକୁ ବିଜୟ ସ୍ବାଦ ଚଖାଇଥିଲା। ଚଳିତ ବିଶ୍ୱକପରେ ଫ୍ରାନ୍ସ ନିକଟରୁ ପରାଜୟ ସହ ଭାରତ ଅଭିଯାନ ଆରମ୍ଭ କରିଥିଲା। ସମାନ ପ୍ରତିଦ୍ୱନ୍ଦ୍ୱୀଙ୍କଠାରୁ ପରାସ୍ତ ହୋଇ ଅଭିଯାନ ଶେଷ କରିଛି। ମ୍ୟାଚ ଆରମ୍ଭରେ ଅର୍ଥ ସଚିବ ବିଶାଳ କୁମାର ଦେବ ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଡିଜି ସନ୍ଦୀପ ପ୍ରଧାନ ଅତିଥିଭାବେ ଯୋଗ ଦେଇଥିଲେ। ହ୍ୟାଟ୍ରିକ ଗୋଲ ସ୍କୋରର କ୍ଲିମେଣ୍ଟ ପ୍ଲେୟର ଅଫ୍ ଦି ମ୍ୟାଚ ପୁରସ୍କାର ପାଇଥିଲେ। ୨୦୧୩ରେ ରନର୍ସଅପ୍ ହୋଇଥିବା ଫ୍ରାନ୍ସ ପ୍ରଥମଥର ପାଇଁ ତୃତୀୟ ସ୍ଥାନ ଅଧିକାର କରିଛି। ଜୁନିୟର ହକି ବିଶ୍ୱକପରେ ଫ୍ରାନ୍ସର ଏହା ଦ୍ୱିତୀୟ ଶ୍ରେଷ୍ଠ ସଫଳତା।