କଟକ ଅଫିସ,୨୧ା୩: କେୱାଇସି ଅପଡେଟ୍ ଆଳରେ ରେଭେନ୍ଶା ବିଶ୍ୱବିଦ୍ୟାଳୟର ପ୍ରଫେସର ଜୟଦେବ ଜେନାଙ୍କଠାରୁ ୩ ଲକ୍ଷ ୯୯ ହଜାର ୯୯୬ ଟଙ୍କା ଠକି ନେବା ଅଭିଯୋଗରେ କଟକ ସାଇବର ଥାନା ପୋଲିସ ଆଉ ଜଣେ ଅଭିଯୁକ୍ତଙ୍କୁ ଗିରଫ କରି ରବିବାର କୋର୍ଟଚାଲାଣ କରିଛି। ସେ ହେଲେ ବାଲେଶ୍ୱର ଜିଲା ବାଲିଆପାଳ ଅଞ୍ଚଳର ଦୀପକ କୁମାର ଦାସ(୨୯)। ତାଙ୍କଠାରୁ ୧ ଲକ୍ଷ ୮ ହଜାର ୯୮୦ ଟଙ୍କା, ୧୧ ମୋବାଇଲ, ବିଭିନ୍ନ ବ୍ୟାଙ୍କର ୩୬ଟି ଏଟିଏମ୍ କାର୍ଡ, ଏକ ଲାପ୍ଟପ୍, ହାର୍ଡଡିସ୍କ, ୧୧୬ଟି ସିମ୍କାର୍ଡ ଓ ୪ଟି ପେନ୍ଡ୍ରାଇଭ ଜବତ କରାଯାଇଛି। ଏହି ଘଟଣାରେ ପୋଲିସ ଦୀପକଙ୍କ ସହଯୋଗୀ ବାଲେଶ୍ୱର ଜିଲା ରୂପ୍ସା ଥାନା ଓଡିଆପଡାର ସୁଶାନ୍ତ ବେହେରା ଓ ସିଙ୍ଗଲା ଥାନା ନବରା ଗ୍ରାମର ଶଙ୍କର ଦାସ ଅଧିକାରୀଙ୍କୁ ଗତ ୧୭ ତାରିଖରେ ଗିରଫ କରି କୋର୍ଟ ଚାଲାଣ କରିଥିଲା।
ପୋଲିସ ସୂଚନା ଅନୁଯାୟୀ, ଗତମାସ ୨୮ ତାରିଖରେ ପ୍ରଫେସର ଜେନାଙ୍କ ମୋବାଇଲକୁ ଏକ ନିର୍ଦ୍ଦିଷ୍ଟ ନମ୍ବରରୁ କଲ୍ ଅସିଥିଲା। ଅଭିଯୁକ୍ତ ଜଣକ ବିଏସ୍ଏନ୍ଏଲ୍ର କର୍ମଚାରୀ ବୋଲି ପରିଚୟ ଦେଇଥିଲେ। ତାଙ୍କୁ କେୱାଇସି ଅପ୍ଡେଟ୍ କରାଇବା ପାଇଁ ପ୍ଲେଷ୍ଟୋରରୁ ଟିମ୍ ଭ୍ୟୁଆର ଆପ୍ ଓ ଅଟୋମେଟିକ୍ ଏସ୍ଏମ୍ଏସ୍ ଫରୱାର୍ଡ ଆପ୍ ଡାଉନଲୋଡ କରିବାକୁ କହିଥିଲେ। ନଚେତ ତାଙ୍କ ସିମ୍ ବନ୍ଦ ହୋଇଯିବ କହିଥିଲେ। ଏଥିସହ ତାଙ୍କ ମୋବାଇଲ ନମ୍ବରକୁ ଅନ୍ଲାଇନ୍ରେ ୧୦ ଟଙ୍କା ପଠାଇବାକୁ କହିଥିଲେ ା ପ୍ରଫେସର ଜେନା ଆପ୍ ଦୁଇଟି ଡାଉନ୍ ଲୋଡ୍ କରିବା ସହ ତାଙ୍କ ନମ୍ବରକୁ ଟଙ୍କା ପଠାଇଥିଲେ। ପରେ ତାଙ୍କ ଫୋନରେ ଥିବା ଅଟୋମେଟିକ ଏସ୍ଏମ୍ଏସ୍ ଫରୱାର୍ଡ ଆପ୍ ଜରିଆରେ ଅଭିଯୁକ୍ତ ତାଙ୍କ ଏସ୍ବିଆଇ ୟୋନୋ ଆପ୍ର ଏମ୍ପିନ ଏବଂ ଓଟିପି ହାସଲ କରିନେଇଥିଲେ। ପରେ ତାଙ୍କ ଆକାଉଣ୍ଟରୁ ୩ ଲକ୍ଷ ୯୯ ହଜାର ୯୯୬ ଟଙ୍କା ଉଠାଯାଇଥିଲା।