ରାଉରକେଲା,୫ା୭(ସଙ୍ଗୀତା ଜେନା): ପିଡିଏସ୍ ଚାଉଳ ଓଜନରେ ହେରଫେର କରାଯାଉଥିବା ଭାଜପା ପକ୍ଷରୁ ଅଭିଯୋଗ କରାଯାଇଛି। ଏଥିରେ କୋଟି କୋଟି ଟଙ୍କାର ରାଜସ୍ବ ଲୁଟ ହେଉଛି। କେନ୍ଦ୍ର ସରକାର ଗରିବଙ୍କୁ ମାଗଣାରେ ଚାଉଳ ଯୋଗାଉଥିବା ବେଳେ ଏହାକୁ ରାଜ୍ୟ ସରକାର, ଯୋଗାଣ ଅଧିକାରୀ, ଚାଉଳ ଯୋଗାଣ ଠିକାଦାର, ପରିବହନ ଠିକାଦାର ଆଦି ମିଳିମିଶି ତୋଷରପାତ କରୁଛନ୍ତି। ଏଥିରେ ରାଜ୍ୟ ସରକାରଙ୍କ ସମ୍ପୃକ୍ତି ରହୁଥିବା ବୁଧବାର ଭାଜପା ରାଜ୍ୟ ପ୍ରବକ୍ତା ଧୀରେନ ସେନାପତି ସେକ୍ଟର-୩ ଭାଜପା କାର୍ଯ୍ୟାଳୟରେ ଆୟୋଜିତ ଖବତଦାତା ସମ୍ମିଳନୀରେ ଅଭିଯୋଗ କରିଛନ୍ତି।
ଧୀରେନଙ୍କ ସୂଚନା ଅନୁଯାୟୀ, ମିଲର୍ସମାନଙ୍କଠାରୁ ପିଡ଼ିଏସ୍ ଚାଉଳ ବୋଝେଇ କରି ୨-୩ ଟ୍ରକ ରାଉରକେଲାକୁ ଆସିଥିଲା ମଙ୍ଗଳବାର। ଉକ୍ତ ଟ୍ରକଗୁଡ଼ିକ ଇଣ୍ଡଷ୍ଟ୍ରିଆଲ ୱେ ବ୍ରିଜ ନାମକ ଏକ ଘରୋଇ ଓଜନ ସଂସ୍ଥାକୁ ଓଜନ ପାଇଁ ଆସିଥିଲା। ଏଥିରେ କେହି ସରକାରୀ କର୍ମଚାରୀ ଉପସ୍ଥିତ ନ ଥିଲେ। ଏ ଘଟଣାକୁ ଖୋଦ୍ ସେନାପତି ଦେଖିଥିଲେ। ଟ୍ରକଗୁଡ଼ିକ ମିଲର୍ସରୁ ପ୍ରତ୍ୟକ୍ଷ ଭାବେ ଏଫସିଆଇ ଯିବାର ଅଛି ବୋଲି ସେ ଜାଣିବାକୁ ପାଇଥିଲେ। ଏ ସମ୍ପର୍କରେ ଯୋଗାଣ ବିଭାଗ ଇନସ୍ପେକ୍ଟରଙ୍କୁ ସେନାପତି ପଚାରିଥିଲେ ହେଲେ ସେ ନୀରବ ରହିଥିଲେ। ପରେ ସପ୍ଲାଇ ଇନସ୍ପେକ୍ଟର ଭାବରେ ପରିଚୟ ଦେଇଥିବା ବ୍ୟକ୍ତିଙ୍କୁ ପଚରାଯିବାରୁ ସେ ଅଶ୍ରାବ୍ୟ ଭାଷାରେ ଗାଳିଗୁଲଜ କରିଥିଲେ। ତେବେ ଏପରି ଘଟଣାରୁ ମିଲର୍ସ, ଗାଡ଼ିଚାଳକ, ସ୍ଥାନୀୟ ଯୋଗାଣ ବିଭାଗର ମଧୁଚନ୍ଦ୍ରିକା ହୋଇ ହରିଲୁଟ ହେଉଥିବା ସେ କହିଛନ୍ତି। ଘଟଣାର ନିରପେକ୍ଷ ତଦନ୍ତ କରି ଦୋଷୀଙ୍କ ପ୍ରତି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ୫-ଟି ସଚିବ ଏବଂ ଜିଲାପାଳ ଏହି ସମ୍ପର୍କରେ ସ୍ପଷ୍ଟ କରନ୍ତୁ ବୋଲି ଖବରଦାତା ସମ୍ମିଳନୀରେ ଦାବି କରାଯାଇଛି। ଖବରଦାତା ସମ୍ମିଳନୀରେ ଭାଜପା ସଭାନେତ୍ରୀ ଲତିକା ପଟ୍ଟନାୟକ, କାର୍ଯ୍ୟକାରିଣୀ ସଦସ୍ୟ ପ୍ରମିଳା ଦାସ, ନିହାର ରାୟ, ପୂର୍ଣ୍ଣିମା କେର୍କେଟା, ଗଙ୍ଗାଧର ଦାଶ ପ୍ରମୁଖ ଉପସ୍ଥିତ ଥିଲେ।
