ନୟାଗଡ଼ ଅଫିସ,୧୪।୫:ପ୍ରତି ପଞ୍ଚାୟତରେ ସୋସାଇଟି କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେବା ପରେ ନୟାଗଡ଼ ଜିଲାରେ ନୂଆ ସୋସାଇଟି ପଞ୍ଜୀକରଣ କରାଯାଇଛି। ଜିଲାରେ ୧୮ଟି ନୂଆ ସୋସାଇଟି ପଞ୍ଜୀକରଣ ହୋଇଛି । ତେବେ ଏଥିରୁ ରଣପୁର ବ୍ଲକର ଚମ୍ପାପେଡି, ଚମ୍ପାଗଡ଼ ଓ ଜଙ୍କିଆ ସୋସାଇଟି ପଞ୍ଜୀକରଣରେ ଜାଲିଆତି ହୋଇଥିବା ଅଭିଯୋଗ ହୋଇଛି । ରଣପୁର ବିଧାୟକ ସତ୍ୟନାରାୟଣ ପ୍ରଧାନ ଏନେଇ ରାଜ୍ୟ ସମବାୟ ନିବନ୍ଧକ ଓ ବିଭାଗୀୟ ମନ୍ତ୍ରୀଙ୍କୁ ଅଭିଯୋଗ କରିବା ପରେ ତଦନ୍ତ ଆରମ୍ଭ ହୋଇଛି । ନୟାଗଡ଼ ଉପସମବାୟ ନିବନ୍ଧକ ଏହାର ପ୍ରାଥମିକ ତଦନ୍ତ ରିପୋର୍ଟ ଦାଖଲ କରିଛନ୍ତି । ଅନ୍ୟପକ୍ଷେ ପ୍ରତି ପଞ୍ଚାୟତରେ ସୋସାଇଟି କରିବା ପାଇଁ ରାଜ୍ୟ ସରକାର ଘୋଷଣା କରିଥିବାବେଳେ ନୂଆ ସୋସାଇଟି ବିଜ୍ଞପ୍ତି ପରେ ବି ଜିଲାର ୧୯ ପଞ୍ଚାୟତରେ ଆଦୌ ସୋସାଇଟି ନ ଥିବା ଜଣାପଡିଛି । ଜିଲାର ୮ଟି ବ୍ଲକରେ ୧୯୪ ପଞ୍ଚାୟତ ରହିଛି । ତେବେ ୧୯୪ ପଞ୍ଚାୟତରେ ପୂର୍ବରୁ ୧୫୭ ସୋସାଇଟି ରହିଥିଲା । ରାଜ୍ୟ ସରକାର ପ୍ରତି ପଞ୍ଚାୟତରେ ସୋସାଇଟି କରିବା ପାଇଁ ଘୋଷଣା କରିବା ପରେ ନୟାଗଡ଼ ଜିଲାର ରଣପୁର ବ୍ଲକରେ ୧୧, ଖଣ୍ଡପଡ଼ା ବ୍ଲକରେ ୧, ଦଶପଲ୍ଲା ବ୍ଲକରେ ୧, ନୂଆଗଁା ବ୍ଲକରେ ୧, ଓଡ଼ଗଁା ବ୍ଲକରେ ୨, ନୟାଗଡ଼ ବ୍ଲକରେ ୨ ଏପରି ୧୮ ସୋସାଇଟି ପଞ୍ଜୀକରଣ ହୋଇଛି । ଜିଲାରେ ୧୮ ନୂଆ ସୋସାଇଟି ହେବା ପରେ ଜିଲାରେ ସୋସାଇଟି ସଂଖ୍ୟା ୧୭୫ରେ ପହଞ୍ଚିଛି ।
ଜିଲା ନୟାଗଡ଼, ସୋସାଇଟି ଖୋର୍ଦ୍ଧାରେ: ନୟାଗଡ଼ ଜିଲାର ରଣପୁର ବ୍ଲକରେ ୨୧ ସୋସାଇଟି ରହିଥିବାବେଳେ ଏଥିରୁ ୧୮ ସୋସାଇଟି ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ ଅଧୀନରେ ରହିଛି । ଏବେ ୧୧ଟି ନୂଆ ସୋସାଇଟି ପରେ ୨୯ ସୋସାଇଟି ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ ଅଧୀନରେ ରହିବ । ତେବେ ପ୍ରଶ୍ନ ଉଠୁଛି ନୟାଗଡ଼ ଜିଲା ପୁରୀଠାରୁ ଅଲଗା ହେବା ପରେ ଧିରେ ଧିରେ ସବୁ ଅଫିସ ନୟାଗଡ଼କୁ ଫେରୁଛି । ତେବେ ନୟାଗଡ଼ ଜିଲା ରଣପୁର ବ୍ଲକର ସୋସାଇଟି କାହିଁକି ଖୋର୍ଦ୍ଧା ଜିଲାରେ ରହିବ । କେତେଦିନ ଧରି ଗୋଟିଏ ଜିଲାରେ ଦୁଇ ଜିଲା ପ୍ରଶାସନର ଦୈତ୍ୟ ଶାସନ ଚାଲିବ। ଚାଷୀମାନେ କାହିଁକି ଅଯଥାରେ ହଇରାଣ ହେବେ। ସରକାର ରଣପୁରର ସୋସାଇଟିକୁ କାହିଁକି ନୟାଗଡ଼ କେନ୍ଦ୍ର ସମବାୟ ବ୍ୟାଙ୍କ ଅଧୀନରେ ରଖୁ ନାହାନ୍ତି । ଏନେଇ ପ୍ରୟାସ ହେବାରେ ଅସୁବିଧା କେଉଁଠି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ା
ରଣପୁରର ୩ ସୋସାଇଟି ନୟାଗଡ଼ରେ: ରଣପୁରର ଦର୍ପନାରାୟଣପୁର, ଡମସାହି, ରଙ୍କଦେଉଳି ପରି ୩ ସୋସାଇଟି ନୟାଗଡ଼ କେନ୍ଦ୍ର ସମବାୟ ବ୍ୟାଙ୍କ ଅଧୀନରେ ରହିଛି। ରଣପୁର ବ୍ଲକର ସ୍ଥିତିକୁ ଅନୁଧ୍ୟାନ କଲେ ଏଠାରେ କି ପ୍ରକାରର ଶାସନ ଚାଲିଛି ବୁଝା ପଡୁନାହିଁ । ନୂଆ ସୋସାଇଟି ପରେ ରଣପୁର ବ୍ଲକରେ ସୋସାଇଟି ସଂଖ୍ୟା ୩୨ରେ ପହଞ୍ଚିଛି । ଏନେଇ ସହକାରୀ ସମବାୟ ନିବନ୍ଧକ(ଏଆରସିଏସ୍) ହାଡୁବନ୍ଧୁ ମହାକୁଡ଼ କୁହନ୍ତି, ରଣପୁରର ୩ ସୋସାଇଟି ଉପରେ ରଣପୁର ବିଧାୟକ ଅଭିଯୋଗ କରିବା ପରେ ରାଜ୍ୟ ସମବାୟ ନିବନ୍ଧକଙ୍କ ନିର୍ଦ୍ଦେଶରେ ତଦନ୍ତ ଚାଲିଛି । ନୟାଗଡ଼ର ଉପସମବାୟ ନିବନ୍ଧକ ଭାସ୍କର ପାଣିଗ୍ରାହୀ ଏହାର ତଦନ୍ତ କରୁଛନ୍ତି । ନୂଆ ସୋସାଇଟି ପରେ ଜିଲାରେ ସୋସାଇଟି ସଂଖ୍ୟା ୧୫୭ ବଦଳରେ ୧୭୫ରେ ପହଞ୍ଚିଛି। ତେବେ ଏଥିରୁ ରଣପୁର ବ୍ଲକର ୨୯ ସୋସାଇଟି ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କ ଅଧୀନରେ କାମ କରିବ।