କୋଡ଼ପଡ଼ା/ଆନନ୍ଦପୁର,୭ା୪(ଡି.ଏନ୍.ଏ./ସ୍ବ.ପ୍ର): କେନ୍ଦୁଝର ଜିଲା ଘସିପୁରା ପୋଲିସ ଠକେଇ ଅଭିଯୋଗରେ ଶୁକ୍ରବାର ଜଣେ ଯୁବକଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଉକ୍ତ ଥାନା ଅନ୍ତର୍ଗତ ବସନ୍ତପୁରା ଗ୍ରାମର ଗୋବିନ୍ଦ ହାସଦା ଓରଫ ମୁନା (୨୭)। ଅଭିଯୁକ୍ତ ୨୦୨୩ ଫେବୃୟାରୀ ୨୪ ତାରିଖରେ ବୀର ଗୋବିନ୍ଦପୁର ଗ୍ରାମର ଭୀମସେନ ମାଝିଙ୍କ ଝିଅ ସୁମତୀ ମାଝି (୨୭)ଙ୍କୁ ପୋଲିସ ଚାକିରି କରାଇଦେବାକୁ କହି ୨ ଲକ୍ଷ ୪୯ ହଜାର ୬ ଶହ ଟଙ୍କା ନେଇଥିଲେ। ଚାକିରି କରାଇ ଦେବାର ପ୍ରତିଶ୍ରୁତି ଦେଇ ଠକି ଚାଲିଥିଲେ। ଘଟଣା ନେଇ ସୁମତୀ ଘସିପୁରା ଥାନାରେ ଅଭିଯୋଗ କରିବା ପରେ ପୋଲିସ (ନଂ.୧୦୭/୨୩)ରେ ଏକ ମାମଲା ରୁଜ କରି ତଦନ୍ତ ଆରମ୍ଭ କରିଥିଲା। ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି। ଘଟଣାର ଅଧିକ ତଦନ୍ତ ଚାଲିଥିବା ଘସିପୁରା ଅତିରିକ୍ତ ଥାନା ଅଧିକାରୀ ବିକ୍ରମ ଭୁୟାଁ କହିଛନ୍ତି।