ବ୍ରହ୍ମପୁର ଅଫିସ,୧୫।୫: ରେଳ ବିଭାଗରେ ଚାକିରି ଦେବାକୁ କହି ଟଙ୍କା ଠକେଇ କରି ବିଚାର ବିଭାଗ ହାଜତରେ ଥିବା ଅଭିଯୁକ୍ତ ଗଣେଶ ହୋତାଙ୍କ ନାମରେ ପୁଣି ଦୁଇଟି ଅଭିଯୋଗ ହୋଇଛି। ଗୋଷାଣୀନୂଆଗଁା ଥାନାରେ ଅଭିଯୁକ୍ତ ଗଣେଶ କୁମାର ହୋତାଙ୍କ ନାମରେ ପୃଥକ ଭାବେ ଦୁଇଟି ଠକେଇ ମାମଲା ରୁଜୁ ହୋଇଛି। ପୋଲିସ ଏହି ମାମଲାରେ ଗଣେଶଙ୍କୁ ଯୋଡିବା ପାଇଁ କୋର୍ଟରେ ରିମାଣ୍ଡ ରିପୋର୍ଟ ଦେବ ବୋଲି କହିଛି।
ସୂଚନାଯୋଗ୍ୟ, ଆନ୍ଧ୍ରପ୍ରଦେଶର ଶ୍ରୀକାକୁଲମ୍ ଜିଲା ମେର୍ଦ୍ଧଆପୁଟ୍ ଥାନା ଅନ୍ତର୍ଗତ ପାଡ଼ାଗ୍ରାମର ପ୍ରଭାକର ମାଝିଙ୍କୁ ରେଳ ବିଭାଗରେ ଚାକିରି ଦେବାକୁ ଗଣେଶ ପ୍ରତିଶ୍ରୁତି ଦେଇଥିଲେ। ଏହି ବାବଦକୁ ପ୍ରଭାକରଙ୍କ କକା ଗିରି ମାଝିଙ୍କୁ ସେ ୯୮ ହଜାର ଟଙ୍କା ମାଗିଥିଲେ। ପରେ ଗିରି ପର୍ଯ୍ୟାୟ କ୍ରମେ ୧୯ ହଜାର ୫ ଶହ, ୩୧ ହଜାର ଓ ୧୫ ହଜାର ଏଭଳି ଫୋନ ପେ’ରେ ଟଙ୍କା ଦେବା ସହ ଗଣେଶଙ୍କ ହିଲପାଟଣା ଘରକୁ ଯାଇ ବିଭିନ୍ନ ସମୟରେ ମୋଟ ୯୮ ହଜାର ଟଙ୍କା ଦେଇଥିଲେ। ହେଲେ ଦୀର୍ଘ ଦିନ ପର୍ଯ୍ୟନ୍ତ ପ୍ରଭାକରଙ୍କୁ ରେଳ ବିଭାଗ ପକ୍ଷରୁ କୌଣସି ନିଯୁକ୍ତି ମିଳି ନ ଥିଲା। ଏନେଇ ପ୍ରଭାକର ଓ ଗିରି ବିଭିନ୍ନ ସମୟରେ ପଚାରିଥିଲେ ମଧ୍ୟ ଗଣେଶ ତାଙ୍କୁ ଠକିବାରେ ଲାଗିଥିଲେ। ସେହିପରି ଅନ୍ୟ ଏକ ଘଟଣାରେ ଲାଞ୍ଜିପଲ୍ଲୀ କେଶବନଗରର ଜି. ଜ୍ଞାନରଞ୍ଜନ ରେଡ୍ଡୀଙ୍କୁ ମଧ୍ୟ ରେଳ ବିଭାଗରେ ଚାକିରି କରାଇ ଦେବାକୁ କହି ଅଭିଯୁକ୍ତ ଗଣେଶ ମୋଟ ୩୩ ହଜାର ଟଙ୍କା ତାଙ୍କଠାରୁ ନେଇଥିଲେ। ଏନେଇ ଜ୍ଞାନରଞ୍ଜନ ବିଭିନ୍ନ ସମୟରେ ଗଣେଶଙ୍କୁ ଚାକିରି ବିଷୟରେ ପଚାରିବା ସହ ଟଙ୍କା ଫେରାଇବାକୁ କହିଥିଲେ। କିନ୍ତୁ ଅଭିଯୁକ୍ତ ତାଙ୍କ ଟଙ୍କା ଫେରସ୍ତ କରିବା ବଦଳରେ ତାଙ୍କୁ ଜୀବନରେ ମାରିଦେବାକୁ ଧମକଚମକ ଦେଇଥିଲେ। ଏହା ପରେ ସେ ଠକେଇର ଶିକାର ହୋଇଥିବା ଜାଣି ଗୋଷାଣୀନୂଆଗଁା ଥାନାରେ ଅଭିଯୋଗ କରିଥିଲେ। ଉଭୟଙ୍କ ଅଭିଯୋଗ ପରେ ପୋଲିସ ନଂ ୭୭/୨୨ ଏବଂ ୭୯/୨୨ରେ ପୃଥକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
ସୂଚନାଯୋଗ୍ୟ, ଗତ କିଛି ମାସ ପୂର୍ବେ ହିଲପାଟଣାର ଗୋଧୂଳି ନାୟକଙ୍କୁ ରେଳ ବିଭାଗରେ ଚାକିରି ଦେବାକୁ ପ୍ରତିଶ୍ରୁତି ଦେଇ ତାଙ୍କଠାରୁ ଗଣେଶ ୪୦ ହଜାର ଟଙ୍କା ଠକି ନେଇଥିଲେ। ଏହି ମାମଲାରେ ଗୋଷାଣୀନୂଆଗଁା ପୋଲିସ ଗତ ୧୨ ତାରିଖରେ ଗଣେଶଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।