![](https://www.dharitri.com/wp-content/uploads/2023/08/89.jpg)
କୋକସରା,୯ା୮(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଲକ ଆମପାଣିଠାରେ ଥିବା ଭାରତୀୟ ଷ୍ଟେଟ୍ ବ୍ୟାଙ୍କ ସହ ଅନୁବନ୍ଧିତ ବଡ଼ ପୋଡ଼ାଗୁଡ଼ା ଗ୍ରାହକ ସେବାକେନ୍ଦ୍ର ପରିଚାଳକ ଜଗଦୀଶ ଚନ୍ଦ୍ର ସିଂ ଗ୍ରାହକ ଓ ସରକାରଙ୍କ ବିଭିନ୍ନ ଯୋଜନାରେ ଜମା ହୋଇଥିବା ହିତାଧିକାରୀଙ୍କ ଲକ୍ଷାଧିକ ଟଙ୍କା ଜାଲିଆତି କରି ଉଠାଇ ଫେରାର ଘଟଣାରେ ଷ୍ଟେଟ୍ବ୍ୟାଙ୍କ କର୍ତ୍ତୃପକ୍ଷଙ୍କ ଅଭିଯୋଗ ପରେ ମାମଲା ରୁଜୁ କରି ତଦନ୍ତ ଆଗକୁ ବଢ଼ାଇଛି ଆମପାଣି ପୋଲିସ।
ସୂଚନାନୁଯାୟୀ, ଆମପାଣି ଷ୍ଟେଟ୍ବ୍ୟାଙ୍କ ଅଧୀନରେ ଥିବା ବଡ଼ ପୋଡ଼ାଗୁଡ଼ା ଗ୍ରାହକ ସେବାକେନ୍ଦ୍ରର ପରିଚାଳକ ଜଗଦୀଶ ଚନ୍ଦ୍ର ସିଂ ଜମାକାରୀଙ୍କ ଅଜାଣତରେ ଆଧାର ସଂଯୋଗ ଥିବା ବାୟୋମେଟ୍ରିକ୍ ଆଙ୍ଗୁଠି ଟିପ ନେଇ ପ୍ରାୟ ୨୭ ଜଣଙ୍କ ୮ ଲକ୍ଷ ୪୪ ହଜାର ୫ ଶହ ଟଙ୍କା ଉଠାଣ କରି ଫେରାର ଥିବା ନେଇ ଷ୍ଟେଟ୍ବ୍ୟାଙ୍କ ଆମପାଣି ଶାଖା ପକ୍ଷରୁ ମଙ୍ଗଳବାର ଆମପାଣି ଥାନାରେ ଅଭିଯୋଗ ହେବାପରେ ପୋଲିସ ଏହି ମାମଲାରେ ଥାନା କେସ୍ ନମ୍ବର ୭୧/୨୩ରେ ଏକ ଠକେଇ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଅନ୍ୟପକ୍ଷରେ ଏହି ଘଟଣାକୁ ସପ୍ତାହେରୁ ଅଧିକ ସମୟ ହୋଇଥିବା ବେଳେ ଜଗଦୀଶ ଚନ୍ଦ୍ର ସିଂ ବର୍ତ୍ତମାନ ସୁଦ୍ଧା ଫେରାର ରହିଛନ୍ତି।