ଭୁବନେଶ୍ୱର,୨।୧୨ (ବ୍ୟୁରୋ): ଆଇଏଫ୍ଏସ୍ ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶଙ୍କ କଳା କାରନାମା ଶେଷ ହେବାର ନାଁ ଧରୁନାହିଁ। ଠକେଇ ଅଭିଯୋଗରେ ଉଭୟଙ୍କ ବିରୋଧରେ ଆଉ ଏକ ମାମଲା ରୁଜୁ ହୋଇଛି। ମିଛ ପ୍ରମାଣପତ୍ର ମାଧ୍ୟମରେ ଫ୍ଲାଇଟ ବୁକିଂ କରି ସ୍କାଏ କିଙ୍ଗ ସଂସ୍ଥାକୁ ଠକିଥିବା ନେଇ ମଙ୍ଗଳବାର ଖାରବେଳନଗର ଥାନାରେ ଏହି ମାମଲା ରୁଜୁ କରାଯାଇଛି। ସ୍କାଏ କିଙ୍ଗ ସଂସ୍ଥାର ମ୍ୟାନେଜିଂ ପାର୍ଟନର ପ୍ରଭାସ କୁମାର ଚୌଧୁରୀ ଏହି ଅଭିଯୋଗ ଆଣିଛନ୍ତି। ଏ ନେଇ ପୋଲିସ ଆଇପିସି ଧାରା ୪୧୯, ୪୨୦, ୪୬୮, ୪୭୧, ୫୦୬ ଓ ୩୪ରେ ଏକ କେସ୍ (ନଂ. ୨୯୩/୨୦) ରୁଜୁ କରିଛି । ଅଭିଯୋଗ ଅନୁଯାୟୀ, ଆକାଶ ପାଠକ ନିଜକୁ ଟାଟା ମୋଟର୍ସର ଏମ୍ଡି ବୋଲି ପରିଚୟ ଦେବା ସହ ଜାଲ ପ୍ରମାଣପତ୍ର ଦେଖାଇ ଜନପଥର ଓସିଏଚ୍ସି କମ୍ପ୍ଲେକ୍ସରେ ଥିବା ‘ସ୍କାଏ କିଙ୍ଗ’ ଟ୍ରାଭେଲ ଏଜେନ୍ସିକୁ ଇମେଲ କରିଥିଲେ। ୨୦୨୦ ଜୁନରେ ସେ ଏକ ଚାଟାର୍ଡ ଫ୍ଲାଇଟ ବୁକିଂ କରିବାକୁ କହିଥିଲେ। ସ୍କାଏ କିଙ୍ଗ ପକ୍ଷରୁ ମଧ୍ୟ ଏକ ଫ୍ଲାଇଟ ବୁକିଂ କରାଯାଇଥିଲା। ଏ ବାବଦରେ ମୋଟ ୨କୋଟି ୭୮ ଲକ୍ଷ ୩୯ ହଜାର ୮୭ ଟଙ୍କା ବିଲ୍ ହୋଇଥିଲା। ତେବେ ଆକାଶ ସ୍କାଏ କିଙ୍ଗକୁ ୨କୋଟି ୧୩ଲକ୍ଷ ୨୨ ହଜାର ୮୫୪ ଟଙ୍କା ଦେଇଥିଲେ। ବାକି ୬୫ଲକ୍ଷ ୧୬ ହଜାର ୨୩୩ ଟଙ୍କା ଫାଙ୍କିଦେଇଥିଲେ। ସ୍କାଏ କିଙ୍ଗ ପକ୍ଷରୁ ତାଙ୍କୁ ବାକିଥିବା ଟଙ୍କା ବାରମ୍ବାର ମଗାଯାଇଥିଲେ ମଧ୍ୟ ସେ ଦେଇ ନ ଥିଲେ। ଓଲଟି ଆକାଶ ତାଙ୍କୁ ଧମକାଇଥିଲେ। ଏଥିରେ ତାଙ୍କ ବାପା ଅଭୟକାନ୍ତ ମଧ୍ୟ ସହଯୋଗ କରିଥିଲେ।
