ଖୋର୍ଦ୍ଧା ଅଫିସ,୨୯ା୭: ମୋବାଇଲ ଫୋନ ଫାଇନାନ୍ସରେ କରାଇ ଦେବାକୁ କହି କୋଟିଏ ଟଙ୍କାରୁ ଊର୍ଦ୍ଧ୍ୱ ଠକେଇ ହୋଇଛି। ଖୋର୍ଦ୍ଧା ଟାଉନ ଥାନା ଅଞ୍ଚଳର ଏଭଳି ଅଭିଯୋଗ ଆସିଛି। ଫାଇନାନ୍ସ କମ୍ପାନୀର କେତେଜଣ ଅସାଧୁ କର୍ମଚାରୀ ଏବଂ ମୋବାଇଲ ଦୋକାନୀ ମିଳିମିଶି ଏହି ଟଙ୍କା ଲୁଟ୍ କରିଥିବା କେତେଜଣ ଗ୍ରାହକ ଅଭିଯୋଗ ଆଣିଛନ୍ତି। ଅଭିଯୋଗ ଆଧାରରେ ପୋଲିସ ମୋବଇଲ ଦୋକାନର ଦୁଇ କର୍ମଚାରୀଙ୍କୁ ଅଟକ ରଖିଛି। ତେବେ ଏହି ଘଟଣାରେ ଅନ୍ୟ କେଉଁମାନଙ୍କ ସମ୍ପୃକ୍ତି ରହିଛି ପୋଲିସ ତାହାର ଖୋଲାତାଡ ଜାରି ରଖିଛି। ଗୁରୁବାର ପୋଲିସ ଖୋର୍ଦ୍ଧା ସମେତ, ଜଟଣୀ, ଭୁବନେଶ୍ୱର ଏବଂ ନୟାଗଡ ରାଜସୁନାଖଳାରେ ଅଞ୍ଚଳରେ ଚଢ଼ାଉ କରିଥିବା ଜଣାପଡିଛି। ଏହି ଠକେଇରେ ଜଣେ କାଉନସିଲରଙ୍କ ଭାଇ ସମ୍ପୃକ୍ତି ରହିଥିବା ନେଇ ଚର୍ଚ୍ଚା ହେଉଛି। ସୂଚନାଥାଉ କି, ଖୋର୍ଦ୍ଧା ସହରରେ ଜଣେ ଯୁବକଙ୍କ ଏକ ମୋବାଇଲ ଦୋକାନ ରହିଛି। ଦାମୀ ମୋବାଇଲ ଫାଇନାନ୍ସରେ କରାଇ ଦେବାକୁ କହି ଯୁବକ ଜଣଙ୍କ ଖୋର୍ଦ୍ଧା ସମେତ ଜଟଣୀ ଅଞ୍ଚଳର ଏକାଧିକ ଗ୍ରାହକଙ୍କୁ ନିଜ ଜାଲରେ ଫସାଇ ଆବଶ୍ୟକୀୟ କାଗଜପତ୍ର ସହ ଅଗ୍ରିମ ଟଙ୍କା ନେଇଥିଲେ। ଏଥିସହ ଗ୍ରାହକଙ୍କୁ ଖାଲି ମୋବାଇଲ ଖୋଳ ଧରାଇ ଦୋକାନ ଆଗରେ ଫଟୋ ଉଠାଇବା ସହ ସପ୍ତାହକ ପରେ ଫାଇନାନ୍ସ ହୋଇଗଲେ ମୋବାଇଲ ଆସି ନେଇଯିବ ବୋଲି କହିଥିଲେ। କିନ୍ତୁ ପରବର୍ତ୍ତୀ ସମୟରେ ଗ୍ରାହଙ୍କୁ ମୋବାଇଲ ମିଳି ନ ଥିଲା। ହେଲେ ଉକ୍ତ ଫାଇନାନ୍ସ ସଂସ୍ଥା ପକ୍ଷରୁ ଇଏମଆଇ ଭରିବା ଲାଗି ଗ୍ରାହକଙ୍କ ମୋବାଇଲକୁ ମେସେଜ ଆସିଥିଲା। ଏନେଇ କେତେଜଣ ଗ୍ରାହକ ସମ୍ପୃକ୍ତ ଦୋକାନ ମାଲିକଙ୍କୁ ପଚାରିଥିଲେ। ମୋବାଇଲ ପାଇନଥିବା ବେଳେ କିପରି ଇଏମଆଇ ଭରିବାକୁ ମେସେଜ ଆସୁଛି, ବୋଲି ପ୍ରଶ୍ନ କରିଥିଲେ। ପରେ ଦୋକାନୀ ଓ ଗ୍ରାହକଙ୍କୁ ବଚସା ହୋଇଥିଲା। ପରବର୍ତ୍ତୀ ସମୟରେ ସମ୍ପୃକ୍ତ ଦୋକାନୀ ମାଲିକ ଫେରାର ହୋଇଯାଇଥିବା ଖବରପାଇ ଠକେଇର ଶିକାର ହୋଇଥିବା ଏକାଧିକ ଗ୍ରାହକ ଟାଉନ ଥାନାରେ ଅଭିଯୋଗ କରିଥିଲେ। ଦୋକାନୀ ମାଲିକଙ୍କ ଭାଇ ପ୍ରଭାବଶାଳୀ ଲୋକ ହୋଇଥିବାରୁ ଚାପରେ ପୋଲିସ ଗିରଫ କରୁ ନ ଥିବା ଗ୍ରାହକାମାନେ ଗଣମାଧ୍ୟମ ଆଗରେ କହିଛନ୍ତି। ତୁରନ୍ତ ସେମାନଙ୍କୁ ଗିରଫ କରାନଗଲେ, ଆଗାମୀ ଦିନରେ ଏସପି ଅଫିସ ଘେରାଉ କରିବେ ବୋଲି ଚେତାବନୀ ଦେଇଛନ୍ତି। ଏନେଇ ସଦର ଏସଡିପିଓ ସୁଶୀଲ ମିଶ୍ର କୁହନ୍ତି, ଘଟଣାର ତଦନ୍ତ ଜାରି ରହିଛି। ତଦନ୍ତରେ ବାଧା ଉପୁଜିବା ଆଶଙ୍କାରେ କୌଣସି ତଥ୍ୟ ଦେବାକୁ ମନା କରିଛନ୍ତି।