ଯାଜପୁର ଅଫିସ,୧୬ା୫: ରାଜ୍ୟରେ ଖାଉଟିଙ୍କୁ ମାପ ଓ ଓଜନରେ ବ୍ୟାପକ ଠକେଇର ଶିକାର ହେବାକୁ ପଡୁଛି। ଏହାକୁ ନିୟନ୍ତ୍ରଣ କରିବାକୁ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ଅଧୀନ ବୈଧମାପ ବିଜ୍ଞାନ ବା ଲିଗାଲ ମେଟ୍ରୋଲୋଜି(ଏଲ୍ଏମ୍) ନିର୍ଦ୍ଦେଶାଳୟ ପକ୍ଷରୁ ବିଭିନ୍ନ ସମୟରେ ଚଢାଉ କରାଯିବା ସହ ତଦନ୍ତ ନିର୍ଦ୍ଦେଶ ହେଉଛି। ଅଥଚ ବିଭାଗୀୟ ଅଧିକାରୀଙ୍କ ଆନ୍ତରିକତାର ଅଭାବ ଯୋଗୁ ଚଢାଉ ଏବଂ ରାଜସ୍ବ ଆଦାୟ ଅଶାନୁରୂପ ହୋଇପାରୁନାହିଁ। ୨୦୨୧-୨୨ ବର୍ଷରେ ଧାର୍ଯ୍ୟଲକ୍ଷ୍ୟ ୧୫.୭୫ କୋଟିରୁ ୧୪.୧୨ କୋଟି ଟଙ୍କାର (୮୯.୬୬%) ରାଜସ୍ବ ଆଦାୟ ହୋଇପାରିଛି। ଏଥିରେ କେବଳ ଢେଙ୍କାନାଳ, ଗଜପତି, କେନ୍ଦ୍ରାପଡ଼ା, ମୟୂରଭଞ୍ଜ, ନବରଙ୍ଗପୁର, ନୟାଗଡ଼ ଓ ନୂଆପଡା ଜିଲାରେ ଧାର୍ଯ୍ୟଲକ୍ଷ୍ୟଠାରୁ ଅଧିକ ସଫଳତା ମିଳିଛି। ବଲାଙ୍ଗୀର ଜିଲାରେ ସର୍ବନିମ୍ନ ୬୮.୭୭% ରାଜସ୍ବ ଆଦାୟ ହୋଇଛି। ସେହିପରି ବେପାରୀଙ୍କୁ ଯାଞ୍ଚ (ଭେରିଫିକେଶନ ଅଫ ଟ୍ରେଡର୍ସ) କ୍ଷେତ୍ରରେ ଅନୁଗୋଳ, ବଲାଙ୍ଗୀର, ଦେବଗଡ଼, ଢେଙ୍କାନାଳ, ଯାଜପୁର, କଳାହାଣ୍ଡି ଓ ସୋନପୁର ଜିଲାର ସଫଳତା ଗତବର୍ଷ ଅପେକ୍ଷା ନୈରାଶ୍ୟଜନକ ରହିଛି। ଆଇନ ଉଲ୍ଲଂଘନକାରୀ ବେପାରୀଙ୍କୁ ଚିହ୍ନଟ କରି ମାମଲା ରୁଜୁ କ୍ଷେତ୍ରରେ ଭଦ୍ରକ, ବଲାଙ୍ଗୀର, ବୌଦ୍ଧ, କଟକ, ଢେଙ୍କାନାଳ, ଯାଜପୁର, ଝାରସୁଗୁଡା, କଳାହାଣ୍ଡି, କନ୍ଧମାଳ, ରାୟଗଡ଼ା ଓ ସୋନପୁର ଜିଲାର ସଫଳତା ଆଶାନୁରୂପ ହୋଇପାରିନାହିଁ। ଏହିକ୍ରମରେ ଦାୟିତ୍ୱରେ ଥିବା ଅଧିକାରୀମାନଙ୍କୁ ସେମାନଙ୍କ କାର୍ଯ୍ୟ ସମ୍ପାଦନାରେ ଉନ୍ନତି ଆଣିବାକୁ ଗତ ସମୀକ୍ଷା ବୈଠକରେ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି। ସେହିପରି ୨୦୨୨-୨୩ ଆର୍ଥିକ ବର୍ଷ ପାଇଁ ବିଭାଗ ପକ୍ଷରୁ ୧୬.୫ କୋଟି ଟଙ୍କା ରାଜସ୍ବ ଆଦାୟ କରିବାକୁ ଲକ୍ଷ୍ୟଧାର୍ଯ୍ୟ ହୋଇଛି।
ବ୍ୟବସାୟିକ ଅନୁଷ୍ଠାନ, ଶିଳ୍ପାଞ୍ଚଳ ଓ ଖଣିରେ ଥିବା ୱେବ୍ରିଜ, ବଜାର, ସୁନା ଦୋକାନ, ପରିବା, ରାଶନ ଦୋକାନ, ପେଟ୍ରୋଲ ଟାଙ୍କି ଇତ୍ୟାଦିରେ ଓଜନ ଓ ମାପରେ ବ୍ୟାପକ ଅନିୟମିତତା ହେଉଛି ବୋଲି ଅଭିଯୋଗ ହୋଇଆସୁଛି। ଓଜନ ଯନ୍ତ୍ରର ଉପଯୁକ୍ତ ଭାବେ ସିଲ୍ ଓ କ୍ରମାଙ୍କ କାର୍ଯ୍ୟ ହେଉ ନ ଥିବା ଅଭିଯୋଗ ହେଉଥିବାରୁ ନିରୀକ୍ଷଣ କରି ଆଇନ ଅନୁସାରେ ପଦକ୍ଷେପ ଗ୍ରହଣ କରିବାକୁ ରାଜ୍ୟ ଲିଗାଲ ମେଟ୍ରୋଲୋଜି ନିର୍ଦ୍ଦେଶାଳୟ ପକ୍ଷରୁ ନିର୍ଦ୍ଦେଶ ଜାରି ହୋଇ ଆସୁଛି। ହେଲେ ସେହି ବ୍ୟବସ୍ଥାର ସୁଧାର ହେଉ ନାହିଁ। ଫଳରେ ଖାଉଟିମାନେ ବିଭିନ୍ନ ସମୟରେ ଶୋଷଣର ଶିକାର ହେଉଛନ୍ତି।