ପୁରୁଷୋତ୍ତମପୁର,୨୦।୬(ଡି.ଏନ୍.ଏ.): ବର୍ତ୍ତମାନର ବାଚସ୍ପତି ତଥା ପୂର୍ବତନ ମନ୍ତ୍ରୀଙ୍କ ନାଁ କହି ଜଣେ ରାଜନୈତିକ ବ୍ୟକ୍ତି ତଥା ହୋଟେଲ ମାଲିକଙ୍କଠାରୁ ୭୦ ହଜାର ଟଙ୍କା ଠକେଇ ହୋଇଛି। ଟଙ୍କା ଠକେଇ ଅଭିଯୋଗରେ ଗଞ୍ଜାମ ଜିଲା ପୁରୁଷୋତ୍ତମପୁର ପୋଲିସ ବୌଦ୍ଧରୁ କିନ୍ନର ସଂଘ ସଭାପତି ସୌମ୍ୟରଞ୍ଜନ ପ୍ରଧାନ (୩୦)ଙ୍କୁ ରବିବାର ଗିରଫ କରିଛି। ତାଙ୍କଠାରୁ ଗୋଟିଏ ଏଟିଏମ୍ କାର୍ଡ, ଚେକ୍ ବୁକ, ମୋବାଇଲ ଫୋନ୍ ଓ ୪୦ ହଜାର ଟଙ୍କା ଜବତ କରାଯାଇଥିବା ପୋଲିସ ସୂଚନା ଦେଇଛି।
ପୁରୁଷୋତ୍ତମପୁର ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ଡିପିଓ ସୂର୍ଯ୍ୟମଣି ପ୍ରଧାନ ଓ ଆଇଆଇସି ପ୍ରିୟସ ରଞ୍ଜନ ଛୋଟରାୟ କହିଛନ୍ତି, ତାରାତାରିଣୀଠାରେ ଥିବା ଲକ୍ଷ୍ମୀପ୍ରିୟା ହୋଟେଲର ମାଲିକ ଲକ୍ଷ୍ମୀ ନାରାୟଣ ସାହୁଙ୍କୁ ଅଭିଯୁକ୍ତ ସୌମ୍ୟ ମେ ୨୦ ତାରିଖରେ ଫୋନ କରି ନିଜକୁ ପୂର୍ବତନ ମନ୍ତ୍ରୀ ବିକ୍ରମ କେଶରୀ ଆରୁଖଙ୍କ ପର୍ସନାଲ ଆସିଷ୍ଟାଣ୍ଟ ଅନିଲ ପଟ୍ଟନାୟକ ବୋଲି ପରିଚୟ ଦେଇ କଥା ହୋଇଥିଲେ। କିଛି ସମୟ ପରେ ପୂର୍ବତନ ମନ୍ତ୍ରୀଙ୍କ ଅବିକଳ ସ୍ବରରେ କଥା ହୋଇ ଭଲମନ୍ଦ ପଚାରି ବୁଝିଥିଲେ। ହୋଟେଲକୁ ଜଣେ ତନ୍ତ୍ର ସାଧିକା ମା’ ଯିବେ। ତାଙ୍କ ଦ୍ୱାରା ଏକ ପୂଜା କରାଇଲେ ବ୍ୟବସାୟ ଭଲ ହେବ ବୋଲି କହି ୨୪ ତାରିଖରେ ଆଉ ଏକ ଫୋନ ନମ୍ବର ଦେଇଥିଲେ। ଉକ୍ତ ଫୋନ ନମ୍ବରରୁ ଅଭିଯୁକ୍ତ ଜଣକ ମହିଳାଙ୍କ ସ୍ବରରେ କଥା ହୋଇ ପୂଜା ଆୟୋଜନ ପାଇଁ ଟଙ୍କା ମାଗିଥିଲେ। ହୋଟେଲ ମାଲିକ ଏଥିରେ ପ୍ରଲୋଭିତ ହୋଇ ସେ ଦେଇଥିବା ୨ଟି ବ୍ୟାଙ୍କ ଆକାଉଣ୍ଟରେ ୭୦ ହଜାର ଟଙ୍କା ପଠାଇଥିଲେ। ଅଭିଯୁକ୍ତ ପୁଣି ମନ୍ତ୍ରୀଙ୍କ ସ୍ବରରେ କଥା ହୋଇ ହୋଟେଲ ମାଲିକଙ୍କୁ ବ୍ରହ୍ମପୁର ସର୍କିିଟ ହାଉସକୁ ଡକାଇଥିଲେ। ହୋଟେଲ ମାଲିକ ସେଠାକୁ ଯାଇ ମନ୍ତ୍ରୀଙ୍କୁ ଅପେକ୍ଷା କରିିଥିଲେ। ଦୀର୍ଘ ସମୟ ଅପେକ୍ଷା ପରେ ନ ଆସିବାରୁ ସେ ଉକ୍ତ ନମ୍ବରକୁ ଫୋନ କରିଥିଲେ ମଧ୍ୟ ଅଭିଯୁକ୍ତ ଆଉ ଫୋନ ଉଠାଇ ନ ଥିଲେ। ଶେଷରେ ନିରାଶ ହୋଇ ଗତ ୨୯ତାରିଖରେ ଥାନାରେ ଅଭିଯୋଗ କରିଥିଲେ। ପୋଲିସ ନଂ.୨୮୭/୨୨ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଅଭିଯୁକ୍ତଙ୍କ ଫୋନ ଟ୍ରାକିଙ୍ଗ କରି ଶେଷରେ ବୌଦ୍ଧରୁ ସୌମ୍ୟଙ୍କୁ ଠାବ କରିଥିଲା। ସୌମ୍ୟଙ୍କ ନିଜ ଘର ଅନୁଗୋଳ ଜିଲା କିଶୋରନଗର ଥାନା ଅନ୍ତର୍ଗତ ରଣିଆକଟା ଗ୍ରାମରେ। ସେ ଜଣେ କିନ୍ନର ହୋଇଥିବା ହେତୁ ବୌଦ୍ଧ ଏନଏସି ୱାର୍ଡ ନଂ୧ରେ କିନ୍ନର ସଂଘର ସଭାପତି ଭାବେ ରାମେଶ୍ବର ବିହାରରେ ରହୁଥିଲେ। ପୋଲିସ ସେଠାରୁ ତାଙ୍କୁ ଗିରଫ କରି ପୁରୁଷୋତ୍ତମପୁର ଥାନାକୁ ଆଣିଥିଲା। ତଦନ୍ତ ପରେ ରବିବାର ତାଙ୍କୁ କୋର୍ଟ ଚାଲାଣ କରାଯାଇଛି। ପୂର୍ବରୁ ସୌମ୍ୟଙ୍କ ନାମରେ ଭୁବନେଶ୍ବରର ବିଭିନ୍ନ ଥାନାରେ ମଧ୍ୟ ଏଭଳି ଠକେଇ ମାମଲା ରହିଥିବା ଏସ୍ଡିପିଓ ପ୍ରଧାନ କହିଛନ୍ତି।