ଭୁବନେଶ୍ୱର,୧୫।୨(ବ୍ୟୁରୋ): ଭୁବନେଶ୍ୱରରେ ଜମି କିଣି ଦେବାକୁ କହି ୩୩ଲକ୍ଷ ଟଙ୍କା ଠକି ନେଇଥିବା ଅଭିଯୋଗରେ ରବିବାର ଖଣ୍ଡଗିରି ଥାନା ପୋଲିସ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ କେନ୍ଦ୍ରାପଡ଼ା ଅଞ୍ଚଳର ସଂଗ୍ରାମ ମହ୍ଲ(୪୨)। ସେ କିଛିଦିନ ହେବ ଭୁବନେଶ୍ୱର ବରମୁଣ୍ଡା ଜଗନ୍ନାଥ ବିହାରରେ ରହୁଥିଲେ। ଏଥିରେ ସମ୍ପୃକ୍ତ ଥିବା ସଂଗ୍ରାମଙ୍କ ଶ୍ୱଶୁର ଫେରାର ହୋଇଯାଇଛନ୍ତି। ତାଙ୍କୁ ଗିରଫ କରିବା ପାଇଁ ପୋଲିସ ଅଧିକ ତଦନ୍ତ କରୁଛି। ସୂଚନା ଅନୁଯାୟୀ, ଏକାମ୍ରକାନନରେ ଘରବାଡ଼ି ଜାଗା କରାଇ ଦେବାକୁ କହି ପ୍ରଶାନ୍ତ କୁମାର ବାଗ ନାମକ ଜଣେ ବ୍ୟକ୍ତିଙ୍କଠାରୁ ୨୦୦୩ରେ ସଂଗ୍ରାମ ଓ ତାଙ୍କ ଶ୍ୱଶୁର ୩୩ଲକ୍ଷ ଟଙ୍କା ନେଇଥିଲେ। ପରେ ତାଙ୍କୁ ଜମି ଦେଇ ନ ଥିଲେ କି ଟଙ୍କା ଫେରାଇ ନ ଥିଲେ। ଏ ନେଇ ପ୍ରଶାନ୍ତ ତାଙ୍କ ନିକଟକୁ ବାରମ୍ବାର ଯିବାପରେ ୨୦୦୮ରେ ୨ ମାସ ମଧ୍ୟରେ ଟଙ୍କା ଫେରାଇ ଦେବାକୁ ଅଭିଯୁକ୍ତଦ୍ୱୟ ଏକ ଏଗ୍ରିମେଣ୍ଟ କରିଥିଲେ। ମାତ୍ର ଅଭିଯୁକ୍ତଦ୍ୱୟ ୨୦୧୫ରେ ୨ଲକ୍ଷ ଟଙ୍କା ଓ ୨୦୧୬ରେ ୫୦ହଜାର ଟଙ୍କା ପ୍ରଶାନ୍ତକୁ ଦେଇଥିଲେ। ଏହାପରଠାରୁ ଆଉ ଟଙ୍କା ନ ଦେଇ ବାରମ୍ବାର ଫାଙ୍କୁଥିଲେ। ଶୁକ୍ରବାର ପ୍ରଶାନ୍ତ ଟଙ୍କା ମାଗିବାକୁ ଅଭିଯୁକ୍ତଙ୍କ ଘରକୁ ଯାଇଥିବାବେଳେ ପ୍ରଶାନ୍ତଙ୍କୁ ଗାଲିଗୁଲଜ କରିବା ସହ ଟଙ୍କା ମାଗିଲେ ଜୀବନରୁ ମାରିଦେବାକୁ ଧମକ ଦେଇଥିଲେ। ଏ ନେଇ ପ୍ରଶାନ୍ତ ଥାନାର ଦ୍ୱାରସ୍ଥ ହୋଇଥିଲେ।
