ନୂଆଦିଲ୍ଲୀ,୧।୧୨: ବର୍ଷର ଶେଷ ମାସ ଡିସେମ୍ବର ଆରମ୍ଭ ହୋଇଯାଇଛି। ଚଳିତ ମାସରେ ଅନେକ କାର୍ଯ୍ୟ କରିବାର ଶେଷ ତାରିଖ ମଧ୍ୟ ରହିଛି, ଯେଉଁଥିରେ ଆପଣଙ୍କ ଆଧାର ସମ୍ବନ୍ଧୀୟ କାର୍ଯ୍ୟ ରହିଛି। ମାଗଣାରେ ହେଉଥିବା ଆଧାର କାର୍ଡ ଅପଡେଟ ଡେଡଲାଇନ୍ ଚଳିତ ମାସରେ ଶେଷ ହେଉଛି।
ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ (ୟୁଆଇଡିଏଆଇ) ମାଗଣାରେ ଆଧାର ଅପଡେଟ କରିବାର ଶେଷ ତାରିଖ ୧୪ ଡିସେମ୍ବର ୨୦୨୪ ରଖିଛି। ପୂର୍ବରୁ ଏହା ୧୪ ସେପ୍ଟେମ୍ବର ରହିଥିଲା ବେଳେ ପରେ ତିନିମାସ ବୃଦ୍ଧି କରାଯାଇଥିଲା। ନିର୍ଦ୍ଧାରିତ ତାରିଖ ପରେ ଆପଣଙ୍କୁ ଜରୁରୀ ଅପଡେଟ କରିବାକୁ ଟଙ୍କା ଦେବାକୁ ହେବ।
ଆଧାର ସମ୍ବନ୍ଧିତ କୌଣସି ଅପଡେଟ କରିବା ପାଇଁ ଏବେ ୫୦ ଟଙ୍କା ଦେୟ ଦେବାକୁ ପଡୁଛି। ଯାହାକୁ ଏବେ ମଧ୍ୟ ମାଇଁଆଧାର ପୋର୍ଟାଲରେ ମାଗଣାରେ କରାଯାଇପାରିବ। ତେବେ କହିରଖୁ କି ମାଗଣା ଆଧାର ଅପଡେଟ ସୁବିଧା କେବଳ ଅନଲାଇନ୍ ମିଳୁଛି। କିନ୍ତୁ ଆପଣଙ୍କୁ ଯଦି ଆଇରୀସ କିମ୍ବା ବାୟୋମେଟ୍ରିକ ଅପଡେଟ କରିବାକୁ ଥିବ, ସେଥିପାଇଁ ଆଧାର ସେଣ୍ଟରକୁ ଯିବାକୁ ପଡିବ।
ଆଧାର ଅପଡେଟ କରିବାର ପ୍ରକ୍ରିୟା ବହୁତ ସରଳ। ଏଥିପାଇଁ ଆପଣଙ୍କୁ ୟୁଆଇଡିଏଆଇ ୱେବସାଇଟ https://uidai.gov.in/ ରେ ଲଗଇନ୍ କରିବାକୁ ପଡିବ।
ଏହାପରେ ହୋମ ପେଜରେ ମାଇଁ ଆଧାର ପୋର୍ଟାଲରେ ଯାଇ ରେଜିଷ୍ଟର ମୋବାଇଲ ନମ୍ବର ଉପରେ ଓଟିପି ବ୍ୟବହାର କରି ଲଗଇନ କରନ୍ତୁ। ଏହାପରେ ନିଜର ସମସ୍ତ ତଥ୍ୟ ଯାଞ୍ଚ କରନ୍ତୁ, ଯଦି ତାହା ଠିକ ଅଛି, ତେବେ ଠିକ ଲେଖା ଥିବା ବକ୍ସରେ ଟିକ୍ କରନ୍ତୁ। ସେହିପରି ଡେମୋଗ୍ରାଫିକ ତଥ୍ୟ ଭୁଲ ଥିଲେ ଡ୍ରପ-ଡାଉନ ଡକ୍ୟୁମେଣ୍ଟ ଉପରେ କିକ୍ କରି ଠିକ ଡକ୍ୟୁମେଣ୍ଟ ଅପଲୋଡ଼ କରନ୍ତୁ। ଏହି ଡକ୍ୟୁମେଣ୍ଟକୁ ଜେପିଇଜି, ପିଏନଜି ଏବଂ ପିଡିଏଫ ହୋଇଥିବା ଦରକାର।