ପୁଣେ,୬।୧୧ : ପୁଣେର ଏକ ହସ୍ପିଟାଲ ’‘ବେଟି ବଚାଓ ମିଶନ’ର ଜୀବନ୍ତ ଉଦାହରଣ ପାଲଟିଛି। କନ୍ୟାଭ୍ରୁଣ ହତ୍ୟା ବିରୋଧରେ ଅଭିଯାନ ଅନ୍ତର୍ଗତ ଏଠାରେ କନ୍ୟା ସନ୍ତାନ ଜନ୍ମ ହେଲେ ହସ୍ପିଟାଲରେ ମାଗଣା ଚିକିତ୍ସା ଯୋଗାଇ ଦିଆଯାଉଛି। ଏହା ବ୍ୟତୀତ ଏହି ଡାକ୍ତରଖାନା ଲୋକଙ୍କୁ ଗର୍ଭପାତ ବିରୁଦ୍ଧରେ ସଚେତନ କରାଯାଉଛି।
ଗତ ୧୧ ବର୍ଷ ମଧ୍ୟରେ ପୁଣେର ହାଡପ୍ସରଠାରେ ଥିବା ମାର୍ଟିନିଟି ମଲ୍ଟି ସ୍ପେସିଆଲିଟି ହସ୍ପିଟାଲରେ ୨୪୦୦ରୁ ଅଧିକ କନ୍ୟା ସନ୍ତାନଙ୍କୁ ମାଗଣାରେ ପ୍ରସବ କରାଯାଇଛି। ଡାକ୍ତରଖାନାର ଡାକ୍ତର ଗଣେଶ ରାଖ କହିଛନ୍ତି ଯେ ଏଥିପାଇଁ ସେ ଗର୍ଭବତୀ ପରିବାର ସଦସ୍ୟଙ୍କଠାରୁ ଗୋଟିଏ ପଇସା ମଧ୍ୟ ନେଇ ନାହାଁନ୍ତି।
ଡାକ୍ତର ରାଖ କହିଛନ୍ତି ଯେ କନ୍ୟାଭ୍ରୁଣ ହତ୍ୟା ବିରୋଧରେ ଅଭିଯାନ ଅର୍ନ୍ତଗତ ଆମେ ଏହି ପଦକ୍ଷେପ ୨୦୧୨ ରେ ଆରମ୍ଭ କରିଥିଲୁ। ପରେ ଅନେକ ରାଜ୍ୟ ଏବଂ ଆଫ୍ରିକୀୟ ଦେଶ ଏଥିରେ ଯୋଗ ଦେଇଥିଲେ। ଯଦି କନ୍ୟା ସନ୍ତାନ ଜନ୍ମ ହୁଅନ୍ତି, ତେବେ ଆମେ ସମ୍ପୂର୍ଣ୍ଣ ଚିକିତ୍ସା ଖର୍ଚ୍ଚ ମାଗଣାରେ କରିଥାଉ। ସେ କହିଛନ୍ତି ଯେ ଏହି ସକରାତ୍ମକ ପଦକ୍ଷେପ ଯୋଗୁଁ ଆଖପାଖ ଅଞ୍ଚଳରେ କନ୍ୟାଭ୍ରୁଣ ହତ୍ୟା ମାମଲାରେ ହ୍ରାସ ଘଟିଛି।