ନୂଆଦିଲ୍ଲୀ: ଆଗାମୀ ୨ ବର୍ଷରେ ଆଉ ୧ କୋଟି ଲୋକଙ୍କୁ ମାଗଣା ଏଲ୍ପିଜି ସଂଯୋଗ ଦେବା ଲାଗି କେନ୍ଦ୍ର ସରକାର ଯୋଜନା ରଖିଛନ୍ତି। ଲୋକଙ୍କୁ ସହଜରେ ଏଭଳି ସଂଯୋଗ ସୁବିଧା ଯୋଗାଇ ଦେବା ଲାଗି ଯୋଜନା କରାଯାଉଥିବା ତୈଳ ସଚିବ ତରୁନ କପୁର ରବିବାର କହିଛନ୍ତି। ଲୋକମାନେ ସେମାନଙ୍କ ଘର ପାଖରେ ଗ୍ୟାସ୍ ସିଲିଣ୍ଡର ରିଫିଲ କରାଇବା ଲାଗି ୩ ଡିଲରଙ୍କ ଏକ ବିକଳ୍ପ ପ୍ରଦାନ କରାଯିବ। ଏହା ପୂର୍ବରୁ ଗୋଟିଏ ଡିଲର ରହିଥିଲେ। ଠିକ୍ ସମୟରେ ଗ୍ୟାସ୍ ଯୋଗାଣରେ ଏହା ସମସ୍ୟା ଉପୁଯାଉଥିଲା। ଗତ ୪ ବର୍ଷ ମଧ୍ୟରେ ଗ୍ରାମାଞ୍ଚଳର ଗରିବ ମହିଳାଙ୍କୁ ଗ୍ୟାସ୍ ସଂଯୋଗ ଦିଗରେ ସରକାର କାମ କରୁଛନ୍ତି। ବର୍ତ୍ତମାନ ୮ କୋଟି ମହିଳାଙ୍କୁ ଏହି ସୁବିଧା ଦିଆଯାଇଛି। ଫଳରେ ଦେଶର ବର୍ତ୍ତମାନ ଗ୍ୟାସ ବ୍ୟବହାରକାରୀ ସଂଖ୍ୟା ୨୯ କୋଟି ଛୁଇଁଛି। ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନାରେ ୧ କୋଟି ସଂଯୋଗ ନେଇ ସରକାର ବଜେଟରେ ଘୋଷଣା କରିଛନ୍ତି। ଉଜ୍ଜ୍ୱଳା ଯୋଜନା ପରେ ଗ୍ୟାସ୍ ସଂଯୋଗ ନ ଥିବା ଘର ସଂଖ୍ୟା କମିଛି। ଯେଉଁ ଲୋକଙ୍କ ନିକଟରେ ସଂଯୋଗ ସୁବିଧା ନାହିଁ ସେମାନଙ୍କୁ ସେବା ଯୋଗାଇ ଦେବା ନେଇ କାର୍ଯ୍ୟକ୍ରମ ହାତକୁ ନିଆଯାଉଛି।