ଗୁଣପୁର,୮।୬(ଡି.ଏନ୍.ଏ.): ଅଶ୍ଲୀଳ ରେକର୍ଡ ଡ୍ୟାନ୍ସ ଉପରେ ଲଗାମ ଲାଗି ପାରୁନାହିଁ । ଯାତ୍ରା ନାମରେ ଚାଲିଛି ଅଙ୍ଗ ପ୍ରଦର୍ଶନ। ରାୟଗଡା ଜିଲା ଗୁଣପୁର ଏବଂ ରାମନାଗୁଡାର ବିଭିନ୍ନ ଗ୍ରାମାଞ୍ଚଳରେ ଏଭଳି ବେଧଡ଼କ କାରବାର ଚାଲିଛି। ବିଭିନ୍ନ ପର୍ବପର୍ବାଣି ଆଳରେ ଗଁା ଗଁାରେ ଏହା ଚାଲୁଛି। ତାହାକୁ ବନ୍ଦ କରିବାକୁ ବିଭିନ୍ନ ସଂଗଠନ ପକ୍ଷରୁ ଦାବି ହୋଇଛି। ନାମକୁ ମାତ୍ର ବେଳେବେଳ ଧରପଗଡ଼ କରାଯାଏ। ହେଲେ ଆଖିଦୃଶିଆ ପଦକ୍ଷେପ ଗ୍ରହଣ କରାଯାଉ ନ ଥିବା ଅଭିଯୋଗ ହୋଇଛି। ଏହି ରେକର୍ଡ ଡ୍ୟାନ୍ସରେ ରାଜ୍ୟ ଏବଂ ରାଜ୍ୟ ବାହାର ଅଞ୍ଚଳରୁ ଯୁବତୀମାନଙ୍କୁ ଦଲାଲମାନେ ଆଣି ନଚାଇଥାନ୍ତି। ଯୁବତୀମାନେ ନିଜ ପେଟପାଟଣା ପାଇଁ ଏପରି କରିବାକୁ ବାଧ୍ୟ ହେଉଥିବାବେଳେ ଦଲାଲମାନେ ଏଥିରେ ମାଲାମାଲ ହେଉଛନ୍ତି। ଗୁଣପୁର ପୋଲିସ ପଗଡବିଲିରେ ରାଧାକୃଷ୍ଣ ମନ୍ଦିର ବାର୍ଷିକ ଉତ୍ସବ ଲାଗି ରେକର୍ଡ ଡ୍ୟାନ୍ସ କରିବାକୁ ଆସିଥିବା ୬ ଜଣ ଯୁବତୀଙ୍କ ସମେତ ଭୁବନେଶ୍ୱର ନୟାପଲ୍ଲୀ ଅଞ୍ଚଳର ସନ୍ତୋଷ ସାହୁଙ୍କୁ ଗିରଫ କରିଛନ୍ତି। ଯୁବତୀମାନେ ଭୁବନେଶ୍ୱର, କଟକ, ମୟୂରଭଞ୍ଜ ଏବଂ ଓଡଗଁା ଅଞ୍ଚଳର ବୋଲି ଜଣାପଡିଛି। ସେମାନଙ୍କୁ ରବିବାର ଗିରଫ କରାଯାଇଥିବାବେଳେ ମଙ୍ଗଳବାର ଗୁଣପୁର ଏସ୍ଡିଜେଏମ୍ଙ୍କ ନିକଟରେ ହାଜର କରାଯାଇଛି। ୭ ଜଣ ଅଭିଯୁକ୍ତଙ୍କୁ ପୋଲିସ ଆଇପିସି ଦଫା ୨୯୪, ୧୧୪ ଏବଂ ୩୪ରେ ଗିରଫ କରି କୋର୍ଟ ଚାଲାଣ କରିଛି। ଗିରଫର ୨ଦିନ ପର୍ଯ୍ୟନ୍ତ ୬ଜଣ ଯୁବତୀଙ୍କୁ ଥାନାରେ ରଖିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଗିରଫ ୭ ଜଣଙ୍କୁ କୋର୍ଟ ଚାଲାଣ କରାଯିବା ପରେ ଏସ୍ଡିଜେଏମ୍ ସେମାନଙ୍କୁ ଜାମିନରେ ଛାଡଥିବା ଅଭିଯୁକ୍ତଙ୍କ ଓକିଲ ଅକ୍ଷୟ ଶତପଥୀ ସୂଚନା ଦେଇଛନ୍ତି।
ସୂଚନାଥାଉକି ଗଜପତି, ରାୟଗଡ଼ା ଓ କୋରାପୁଟ ଭଳି ଆଦିବାସୀ ଅଧ୍ୟୁଷିତ ଜିଲାର ଆଭ୍ୟନ୍ତରୀଣ ଅଞ୍ଚଳରେ ଏପରି ଅଶ୍ଲୀଳ ନୃତ୍ୟର ଆୟୋଜନ କରାଯାଉଛି। ସ୍ଥାନୀୟ ଅଞ୍ଚଳର ପ୍ରଭାବଶାଳୀ ବ୍ୟକ୍ତିମାନେ ପୋଲିସ ସହାୟତାରେ ଏପରି କାର୍ଯ୍ୟକ୍ରମର ଆୟୋଜନ କରୁଛନ୍ତି। ଏଥିରେ ଟିକେଟ ବ୍ୟବସ୍ଥା ମଧ୍ୟ ରହୁଛି। ଏଥିରୁ ବିପୁଳ ପରିମାଣର ଅର୍ଥ ଆଦାୟ ହେଉଛି, ଯାହାର ସିଂହଭାଗ ପୋଲିସ ବରିଷ୍ଠ ଅଧିକାରୀମାନଙ୍କ ପାଖରେ ପହଞ୍ଚୁଛି। ଆୟୋଜନରେ ଭାଗ ନେଉଥିବା ଦର୍ଶକଙ୍କୁ ଉକ୍ତ ନୃତ୍ୟର ଭଡିଓ ଉତ୍ତୋଳନ କରିବାକୁ ବାରଣ କରାଯାଉଛି। ଏଥିପାଇଁ ଦର୍ଶକଙ୍କ ଉପରେ ତୀକ୍ଷ୍ମ ନଜର ରଖାଯାଉଛି। ଭିଡିଓ ଉତ୍ତୋଳନ କଲେ ଗୁଳି କରି ହତ୍ୟା କରାଯିବାକୁ ମଧ୍ୟ ଆୟୋଜକମାନେ ଧମକ ଦେଉଥିବା କିଛିଦିନ ତଳେ ଗଜପତି ଜିଲାରୁ ଆସିଥିବା ଏକ ଅଭିଯୋଗରୁ ଜଣାପଡିଛି।