ନୂଆଗାଁ,୯ା୫(ଡି.ଏନ.ଏ.) : ପ୍ରତି ଗାଁର ଘରକୁ ଘର ପାନୀୟ ଜଳ ଯୋଗାଇଥିବା ନେଇ ସରକାର କହୁଛନ୍ତି। ହେଲେ ଦେଶକୁ ଇଂରେଜ ଶାସନରୁ ମୁକୁଳାଇ ସ୍ବାଧୀନତା ଆଣିବାକୁ ନିଜ ଜୀବନକୁ ଝାସ ଦେଇଥିବା ସଂଗ୍ରାମୀ ଗାଁକୁ ପାନୀୟ ଜଳ ଯୋଗାଇବାରେ ପ୍ରଶାସନ ବିଫଳ ହୋଇଛି। ଏପରି ଅଭିଯୋଗ ନୟାଗଡ଼ ଜିଲା ନୂଆଗାଁ ବ୍ଲକ ପାରାଢିପି ପଞ୍ଚାୟତ ଗୌଡଥୁଆବାରୀବାସୀ କରିଛନ୍ତି। ଗାଁ ପାଖ ଦେଇ ବହି ଯାଇଥିବା ଡାହୁକା ନଦୀର ଜଳକୁ ଭରସା କରି ସଂଗ୍ରାମୀଙ୍କ ଉତ୍ତରାଧିକାରୀ ଚଳୁଛନ୍ତି।
ଦେଶକୁ ସ୍ବାଧୀନତା ଆଣିବାକୁ ଥୁଆବାରୀ ଏବଂ ଗୌଡ଼ଥୁଆବାରୀ ଗ୍ରାମର ୬୦ରୁ ଊର୍ଦ୍ଧ୍ୱ ସଂଗ୍ରାମୀ ଇଂରେଜ ସହ ଲଢ଼େଇ କରିବା ସହ ନିଜ ଜୀବନକୁ ଝାସ ଦେଇଥିଲେ। କିଏ ଜେଲ ଭିତରେ ରହି ମୃତ୍ୟୁବରଣ କରିଥିଲେ ତ କିଏ ଇଂରେଜ ପୋଲିସଙ୍କ ଗୁଳିମାଡ଼ରେ ବଳି ପଡ଼ିଥିଲେ। ଆଉ କାହାକୁ ଜେଲ ଭିତରେ ଖାଇବାକୁ ନ ଦେଇ ମାରି ଦିଆଯାଇଥିଲା। ସବୁ କଷ୍ଟକୁ ଭୁଲି ଦେଶକୁ ସ୍ବାଧୀନ କରିବାକୁ ଅହରହ ଲତ୍ଇେ କରିଥିଲେ ଥୁଆବାରୀବାସୀ। ସେହି ଗାଁ ଥୁଆବାରୀକୁ ପ୍ରଶାସନ ଅଣଦେଖା କରିଥିବା ନେଇ ବାରମ୍ବାର ଅଭିଯୋଗ ହୋଇ ଆସୁଛି। ଅକ୍ଟୋବର ୧୦ରେ କେବଳ ସଂଗ୍ରାମୀମାନଙ୍କ ଉଦ୍ଦେଶ୍ୟରେ ପ୍ରଶାସନ ପକ୍ଷରୁ ତୋପ ସଲାମୀ ଦେଇ ନିଜର କର୍ତ୍ତବ୍ୟ ସାରି ଦେଉଛନ୍ତି। ସ୍ବାଧୀନତାର ୭୫ ବର୍ଷ ପୂର୍ତ୍ତୀ ଅବସରରେ ସରକାର ଆଜାଦି କା ଅମୃତ ମହୋତ୍ସବ ପାଳନ କରୁଥିବା ବେଳେ ସଂଗ୍ରାମୀଙ୍କ ଉତ୍ତରାଧିକାରୀମାନଙ୍କ ପାଇଁ ପାନୀୟ ଜଳ ଯୋଗାଇ ଦେବାରେ ପ୍ରଶାସନ ଅସମର୍ଥ ହୋଇଛି। ଗୌଡ଼ଥୁଆବାରୀ ଗାଁରେ ୫୫ ପରିବାରର ପ୍ରାୟ ୨୫୦ ଲୋକ ବାସବାସ କରୁଥିବା ବେଳେ ସେମାନଙ୍କ ବ୍ୟବହାର ପାଇଁ ୩ ଟି ନଳକୂଅ ଖୋଳାଯାଇଛି। ହେଲେ ଉକ୍ତ ନଳକୂଅଗୁଡ଼ିକର ପାଣି ପିଇବା ଓ ରୋଷେଇ କରିବା ଅନୁପଯୁକ୍ତ। କେଉଁ ନଳକୂଅରୁ ଲୁହାଗୁଣ୍ଡ ମିଶ୍ରିତ ପାଣି ବାହାରୁଛି ତ କେଉଁ ନଳକୂଅ ଖରାଦିନ ହେଲେ ଶୁଖି ଯାଉଛି। ଫଳରେ ପାଣି ଟୋପେ ପାଇଁ ଡହଳ ବିକଳ ହେଉଥିବା ଭରତ ସାହୁ, ଶଙ୍କର ପରିଡ଼ା, ଶତ୍ରୁଘ୍ନ ସାହୁ, ରାଉଳ ନାୟକ, ମାଧବ ସାହୁ ପ୍ରମୁଖ ଗ୍ରାମବାସୀ କହିଛନ୍ତି। ଗାଁ ପାଖ ଦେଇ ବହି ଯାଇଥିବା ଡାହୁକା ନଦୀକୁ ସକାଳ ହେଲେ ଗାଁର ମହିଳାମାନେ ଗରା, ମାଠିଆ, ଡେକଚି ଧରି ସେଠାରେ ଚୁଆ ଖୋଳି ପାଣି ସଂଗ୍ରହ କରୁଛନ୍ତି। ଏ ଘଟଣା ଦିନେ କି ଦୁଇଦିନ ନୁହଁ, ବର୍ଷ ତମାମ ଚାଲିଛି। ଏହା ମହିଳାମାନଙ୍କର ନୀତି ଦିନିଆ କାମ ହୋଇଗଲାଣି। ବାରମ୍ବାର ଅଭିଯୋଗ ପରେ ଗ୍ରାମ ପରିମଳ ଓ ଜଳଯୋଗାଣ (ଆରଡବ୍ଳୁଏସ୍ଏସ୍) ବିଭାଗ ପକ୍ଷରୁ ବୋର୍ ନଳକୂପ ଖୋଳି ଦେଇ ବିଭାଗ ଚୁପ ହୋଇ ବସିଛି। ପାଣି ଯୋଗାଇ ଦେବା ବାବଦରେ ଆରଡବ୍ଲୁଏସ୍ଏସ୍ କନିଷ୍ଠ ଯନ୍ତ୍ରୀ ଜ୍ୟୋତିରଞ୍ଜନ ବେହେରାଙ୍କୁ ପଚାରିବାରେ ପାଣି ଯୋଗାଇବାକୁ ଆମ ପାଖରେ ପାଣି ମଟର ଅଛି କିନ୍ତୁ ବିଦ୍ୟୁତ ସଂଯୋଗ କରାଯାଉ ନ ଥିବାରୁ ପାଣି ଯୋଗାଇବା ସମ୍ଭବ ହେଉନାହିଁ। ଯେତେ ଶୀଘ୍ର ବିଦ୍ୟୁତ୍ ସଂଯୋଗ କରାଯିବ ଆମେ ପାଣି ଯୋଗାଇ ଦେବୁ ବୋଲି ସେ କହିଛନ୍ତି।
