ପ୍ୟାରିସ୍,୫।୧୦(ଏପି): ୧୨ଥର ଫ୍ରେଞ୍ଚ୍ ଓପନ୍ ଟାଇଟଲ ହାସଲ କରିଥିବା ସ୍ପେନ୍ ଅଭିଜ୍ଞ ଟେନିସ ତାରକା ରାଫାଲ ନାଡାଲ ଏଥର ମଧ୍ୟ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ରବିବାର ଅନୁଷ୍ଠିତ ପୁରୁଷ ସିଙ୍ଗଲ୍ସ କ୍ୱାର୍ଟର ଫାଇନାଲରେ ଦ୍ୱିତୀୟ ସିଡ୍ ନାଡାଲ ଆମେରିକାର ସେବାଷ୍ଟିଆନ କୋଡ୍ରାଙ୍କୁ ୬-୧, ୬-୧, ୬-୨ ସିଧାସଳଖ ସେଟ୍ରେ ପରାସ୍ତ କରି ଅଗ୍ରଗତି କରିଛନ୍ତି। ନାଡାଲ କ୍ରମାଗତ ଚତୁର୍ଥ ପ୍ରେଞ୍ଚ୍ ଓପନ ଟାଇଟଲ ହାସଲ ଲକ୍ଷ୍ୟରେ ରହିଛନ୍ତି। ୨୦ ବର୍ଷୀୟ ଆମେରିକାନ କ୍ୱାଲିଫାୟର କୋଡ୍ରା ଅବଶ୍ୟ ନାଡାଲଙ୍କୁ ଚ୍ୟାଲେଞ୍ଜ୍ ଦେବାରେ ବିଫଳ ହୋଇଥିଲେ। ନାଡାଲ କ୍ୱାର୍ଟରରେ ଇଟାଲୀର ୧୯ ବର୍ଷୀୟ ଖେଳାଳି ଜାନିକ୍ ସିନରଙ୍କୁ ଭେଟିବେ। ବିଶ୍ୱର ୭୫ ନମ୍ବର ଖେଳାଳି ସିନର ଅନ୍ୟଏକ ଚତୁର୍ଥ ରାଉଣ୍ଡ ମ୍ୟାଚ୍ରେ ଷଷ୍ଠ ସିଡ୍ ଜର୍ମାନୀର ଆଲେକଜାଣ୍ଡାର ଭେଭେରେଭଙ୍କୁ ୬-୩, ୬-୩, ୪-୬, ୬-୩ ସେଟ୍ରେ ହରାଇ ଏକ ବଡ଼ ବିପର୍ଯ୍ୟୟ ଘଟାଇବା ସହ ପ୍ରଥମ ଗ୍ରାଣ୍ଡସ୍ଲାମ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।
କୋଡ୍ରାଙ୍କ ପ୍ରଦର୍ଶନକୁ ନାଡାଲ ପ୍ରଶଂସା କରିଛନ୍ତି। ତାଙ୍କର ଭବିଷ୍ୟତ ଉଜ୍ଜ୍ୱଳ ବୋଲି ୩୪ ବର୍ଷୀୟ ନାଡାଲ କହିଛନ୍ତି। ବିଜୟୀ ହେବା ପାଇଁ ନାଡାଲା ମାତ୍ର ଏକ ଘଣ୍ଟା ୫୫ ମିନିଟ ସମୟ ଆବଶ୍ୟକ କରିଥିଲେ। ଫ୍ରେଞ୍ଚ୍ ଓପନ୍ର ଗତ ୧୬ଟି ସଂସ୍କରଣରେ ଅଂଶଗ୍ରହଣ କରି ନାଡାଲ ୧୪ଥର ପାଇଁ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।
ସେହିପରି ଟପ୍ ସିଡ୍ ସର୍ବୀୟାର ନୋଭାକ ଜୋକୋଭିଚ୍ ମଧ୍ୟ ଚତୁର୍ଥ ରାଉଣ୍ଡରେ ପ୍ରବେଶ କରିଛନ୍ତି। ସେ ରୁଷିଆର କେ. କାଚାନୋଭଙ୍କୁ ଭେଟିବେ। ତୃତୀୟ ରାଉଣ୍ଡରେ ଜୋକୋଭିଚ୍ ୬-୦, ୬-୩, ୬-୨ ସେଟ୍ରେ ୧୫୩ ର଼୍ୟାଙ୍କର ଖେଳାଳି କଲମ୍ବିଆର ଡାନିଏଲ ଇଲାହି ଗାଲାନଙ୍କୁ ହରାଇ ଅଗ୍ରଗତି କରିଛନ୍ତି। ଏଥିସହ ଜୋକୋଭିଚ୍ କ୍ରମାଗତ ୧୧ଥର ପାଇଁ ଫ୍ରେଞ୍ଚ୍ ଓପନ୍ ଚତୁର୍ଥ ରାଉଣ୍ଡରେ ପ୍ରବେଶ କରିଛନ୍ତି।