ପ୍ୟାରିସ, ୯।୧୦-ପୋଲାଣ୍ଡର ଇଗା ସ୍ବିଟେକ ଚଳିତ ଫ୍ରେଞ୍ଚ୍ ଓପନ ଗ୍ରାଣ୍ଡସ୍ଲାମ ଟେନିସ ମହିଳା ସିଙ୍ଗଲ୍ସ ଫାଇନାଲରେ ପ୍ରବେଶ କରିଛନ୍ତି। ଫାଇନାଲରେ ସେ ୪ ନମ୍ବର ଖେଳାଳି ସୋଫିଆ କେନିନଙ୍କୁ ଭେଟିବେ। ଦ୍ୱିତୀୟ ସେମିଫାଇନାଲରେ କେନିନ୍ ୭ ନମ୍ବର ଖେଳାଳି ପେତ୍ରା କ୍ୱିଟୋଭାଙ୍କୁ ୬-୪, ୭-୫ ସେଟ୍ରେ ପରାସ୍ତ କରିଛନ୍ତି। ବିଶ୍ୱ ର଼୍ୟାଙ୍ଗିଙ୍ଗର ୫୪ତମ ସ୍ଥାନରେ ଥିବା ସ୍ବିଟେକ ଗୁରୁବାର ଅନୁଷ୍ଠିତ ପ୍ରଥମ ସେମିଫାଇନାଲରେ ୧୩୧ତମ ର଼୍ୟାଙ୍ଗ୍ପ୍ରାପ୍ତ ଆର୍ଜେଣ୍ଟିନାର ନାଦିଆ ପୋଡୋରୋସ୍କାଙ୍କୁ ସିଧାସଳଖ ୬-୨, ୬-୧ ସେଟ୍ରେ ପରାସ୍ତ କରିଥିଲେ। ଏପର୍ଯ୍ୟନ୍ତ ଚମତ୍କାର ପ୍ରଦର୍ଶନ କରି ଆସିଥିବା ପୋଡୋରୋସ୍କା ସେମିଫାଇନାଲରେ କିନ୍ତୁ ସ୍ବିଟେକଙ୍କ ସମକକ୍ଷ ପ୍ରଦର୍ଶନ କରିପାରି ନ ଥିଲେ। ସ୍ବିଟେକ ପ୍ରଥମଥରପାଇଁ କୌଣସି ଗ୍ରାଣ୍ଡସ୍ଲାମ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛନ୍ତି। ପୂର୍ବରୁ ସେ ୨୦୧୯ରେ ଫ୍ରେଞ୍ଚ୍ ଓପନରେ ସର୍ବାଧିକ ୪ର୍ଥ ରାଉଣ୍ଡରେ ପ୍ରବେଶ କରି ପାରିଥିଲେ। ଅଷ୍ଟ୍ରେଲିଆନ ଓପନରେ ସେ ୨୦୧୯ରେ ୨ୟ ରାଉଣ୍ଡରୁ ବିଦାୟ ନେଇଥିବାବେଳେ ୨୦୨୦ରେ ୪ର୍ଥ ରାଉଣ୍ଡ ପର୍ଯ୍ୟନ୍ତ ଯାଇ ପାରିଥିଲେ। ଗତବର୍ଷ ସେ ଓ୍ବିମ୍ବେଲଡନର ପ୍ରଥମ ରାଉଣ୍ଡରୁ ବିଦାୟ ନେଇଥିଲେ। ସେହିପରି ୟୁଏସ ଓପନରେ ସେ ୨୦୧୯ରେ ଦ୍ୱିତୀୟ ଓ ଚଳିତ ବର୍ଷ ତୃତୀୟ ରାଉଣ୍ଡରୁ ବିଦାୟ ନେଇଥିଲେ। ଫ୍ରେଞ୍ଚ୍ ଓପନ ଫାଇନାଲରେ ପ୍ରବେଶ କରି ସେ ଟାଇଟଲ ଜିତିବା ସମ୍ଭାବନା ସୃଷ୍ଟି କରିଛନ୍ତି।