ପ୍ୟାରିସ୍,୨୮ା୯ (ଏପି): ବର୍ଷର ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ କୁହାଯାଉଥିବା ଫ୍ରେଞ୍ଚ୍ ଓପନ୍ର ମୁଖ୍ୟ ଡ୍ର’ ରବିବାରଠାରୁ ଆରମ୍ଭ ହୋଇଛି। ପ୍ରଥମ ରାଉଣ୍ଡରେ କେତେଜଣ ସିଡେଡ୍ ଖେଳାଳି ବିପର୍ଯ୍ୟୟର ସମ୍ମୁଖୀନ ହୋଇ ବିଦାୟ ନେଇଛନ୍ତି। ପୁରୁଷ ସିଙ୍ଗଲ୍ସରେ ୧୧ତମ ସିଡ୍ ଖେଳାଳି ବେଲଜିୟମର ଡେଭିଡ୍ ଗଫିନ୍ ପ୍ରଥମ ରାଉଣ୍ଡରେ ପରାସ୍ତ ହୋଇ ବିଦାୟ ନେଇଛନ୍ତି। ସେ ୧୯ ବର୍ଷୀୟ ଇଟାଲୀ ଖେଳାଳି ଜାନ୍ନିକ ସିନରଙ୍କଠାରୁ ୭-୫, ୬-୦, ୬-୩ ସେଟ୍ରେ ପରାସ୍ତ ହୋଇଛନ୍ତି। ସିନର ଦ୍ୱିତୀୟଥର ପାଇଁ ଗଫିନ୍କୁ ହରାଇଛନ୍ତି। ଏହାପୂର୍ବରୁ ସେ ରୋଟ୍ଟରଡାମ ହାର୍ଡକୋର୍ଟ ଟୁର୍ନାମେଣ୍ଟରେ ମଧ୍ୟ ଗଫିନଙ୍କୁ ହରାଇଥିଲେ। ସେହିପରି ଆମେରିକାର ୨୧ତମ ସିଡ୍ ଖେଳାଳି ଜନ୍ ଇସ୍ନର ୬-୪, ୬-୧, ୬-୩ ସେଟ୍ରେ ସ୍ଥାନୀୟ ଖେଳାଳି ଏଲିଅଟ୍ ବେଞ୍ଚେଟ୍ରିଟ୍ଙ୍କ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ସେ ଏବେ ଆମେରିକାର ସେବାଷ୍ଟିଆନ୍ କୋଡ୍ରାଙ୍କୁ ଭେଟିବେ। କୋଡ୍ରା ପ୍ରଥମ ରାଉଣ୍ଡରେ ଇଟାଲୀର ଆଣ୍ଡ୍ରି ସିପ୍ପିଙ୍କୁ ମାରାଥନ ୬-୨, ୪-୬, ୬-୩, ୬-୩ ସେଟ୍ରେ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ସେହିପରି ଜାପାନର କେଇ ନିଶିକୋରୀ ୧-୬, ୬-୧, ୭-୬, ୧-୬, ୬-୪ ମାରାଥନ ସେଟ୍ରେ ବ୍ରିଟେନର ଡାନିଏଲ ଇଭାନ୍ସଙ୍କୁ ହରାଇ ଦ୍ୱିତୀୟ ରାଉଣ୍ଡକୁ ଉଠିଛନ୍ତି।
ଭେନସଙ୍କ ବିପର୍ଯ୍ୟୟ: ଦ୍ୱିତୀୟ ରାଉଣ୍ଡରେ ହାଲେପ୍, ଆଜାରେଙ୍କା
ଫ୍ରେଞ୍ଚ୍ ଓପନ ମହିଳା ସିଙ୍ଗଲ୍ସ ଇଭେଣ୍ଟରେ ବେଲାରୁଷର ଭିକ୍ଟୋରିଆ ଆଜାରେଙ୍କା ପ୍ରଥମ ରାଉଣ୍ଡରେ ବିଜୟୀ ହୋଇଛନ୍ତି। ୧୦ମ ସିଡ୍ ମାନ୍ୟତା ପାଇଥିବା ଆଜାରେଙ୍କା ୬-୧, ୬-୨ ସେଟ୍ରେ ମୋଣ୍ଟେନେଗ୍ରୋର ଡାଙ୍କା କୋଭିନିକଙ୍କୁ ସହଜରେ ହରାଇ ଦ୍ୱିତୀୟ ରାଉଣ୍ଡକୁ ଉଠିଛନ୍ତି। ଦ୍ୱିତୀୟ ରାଉଣ୍ଡରେ ଆଜାରେଙ୍କା ସ୍ଲୋଭାକିଆର ଆନ୍ନା କାରୋଲିନା ସିମିଏଡୋଲଭାଙ୍କୁ ଭେଟିବେ। ଆନ୍ନା ପ୍ରଥମ ରାଉଣ୍ଡରେ ଆମେରିକାର ଭେନସ ଓ୍ବିଲିୟମ୍ସଙ୍କୁ ୬-୪, ୬-୪ ସେଟ୍ରେ ହରାଇ ବିପର୍ଯ୍ୟୟ ଘଟାଇଛନ୍ତି।
ସେହିପରି ଭାରତୀୟ ବଂଶୋଦ୍ଭବ ଖେଳାଳି ଅଷ୍ଟ୍ରେଲିଆର ଅସ୍ତ୍ର ଶର୍ମା ମଧ୍ୟ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ୨୫ ବର୍ଷୀୟ ଅସ୍ତ୍ର ପ୍ରଥମ ରାଉଣ୍ଡରେ ରୁଷିଆର ଆନ୍ନା ବ୍ଲିଙ୍କୋଭାଙ୍କୁ ୬-୩, ୨-୬, ୭-୫ ସେଟ୍ରେ ପରାସ୍ତ କରି ଅଗ୍ରଗତି କରିଛନ୍ତି। ଦ୍ୱିତୀୟ ରାଉଣ୍ଡରେ ସେ ରୁଷିଆର ଏକାଟେରିନା ଆଲେକ୍ଜାଣ୍ଡ୍ରୋଭାଙ୍କୁ ଭେଟିବେ। ଏକାଟେରିନା ପ୍ରଥମ ରାଉଣ୍ଡରେ ମାଡିନସନ ଇଂଗିଲିସ୍ଙ୍କୁ ୬-୩, ୬-୩ ସେଟ୍ରେ ହରାଇ ଦ୍ୱିତୀୟ ରାଉଣ୍ଡକୁ ଉଠିଛନ୍ତି। ସେହିପରି ଟପ୍ସିଡ୍ ମାନ୍ୟତା ପାଇଥିବା ରୋମାନିଆର ସିମୋନା ହାଲେପ ନିଜ ଜନ୍ମଦିନରେ ୬-୪, ୬-୦ ସେଟ୍ରେ ସ୍ପେନ୍ର ସାରା ସୋରିବ୍ସ ଟୋର୍ମୋଙ୍କୁ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି।