ପ୍ୟାରିସ୍,୧୩।୬: ଫ୍ରେଞ୍ଚ୍ ଓପନ ମହିଳା ସିଙ୍ଗଲ୍ସ ଇଭେଣ୍ଟରେ ଚେକ୍ ଗଣରାଜ୍ୟର ବାର୍ବୋରା କ୍ରେଜିକୋଭା ଚାମ୍ପିୟନ ହୋଇଛନ୍ତି। ଶନିବାର ଅନୁଷ୍ଠିତ ଫାଇନାଲ ମୁକାବିଲାରେ ଅଣସିଡ୍ ୨୫ ବର୍ଷୀୟ କ୍ରେଜିକୋଭା ୬-୧, ୨-୬, ୬-୪ ସେଟ୍ରେ ୩୧ତମ ସିଡ୍ ରୁଷିଆର ଆନାସ୍ତାସିଆ ପାଭଲ୍ୟୁଚେଙ୍କୋଭାଙ୍କୁ ପରାସ୍ତ କରି ଟାଇଟଲ ହାସଲ କରିଛନ୍ତି। ଏଥିସହ କ୍ରେଜିକୋଭା ତାଙ୍କ କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ ଟାଇଟଲ ହାସଲ କରିଛନ୍ତି। ୧୯୮୧ ପରେ ସେ ପ୍ରଥମ ଚେକ୍ ଖେଳାଳିଭାବେ ଫ୍ରେଞ୍ଚ୍ ଓପନ ଜିତିଛନ୍ତି। ପୂର୍ବରୁ ହାନା ମାଡିଲକୋଭା ଏହି ସଫଳତା ହାସଲ କରିଥିଲେ। କ୍ରେଜିକୋଭା ସେମିଫାଇନାଲରେ ୧୭ତମ ସିଡ୍ ଗ୍ରୀସ୍ର ମାରିଆ ସାକାରିଙ୍କୁ ୭-୫, ୪-୬, ୯-୭ ସେଟ୍ରେ ପରାସ୍ତ କରି ଫାଇନାଲରେ ପ୍ରବେଶ କରିଥିଲେ। ସେହିପରି ପାଭଲ୍ୟୁଚେଙ୍କୋଭା ସ୍ଲୋଭେନିଆର ତାମରା ଜିଡାନସେକଙ୍କୁ ୭-୫, ୬-୩ ସେଟ୍ରେ ହରାଇ ଫାଇନାଲକୁ ଉଠିଥିଲେ।