ପ୍ୟାରିସ୍,୧୧।୧୦(ଏପି): ପୋଲାଣ୍ଡ ଟିନ୍ଏଜର ଇଗା ସ୍ବିଟେକ ଏଥର ଫ୍ରେଞ୍ଚ୍ ଓପନ ଟାଇଟଲ ହାସଲ କରିଛନ୍ତି। ମହିଳା ସିଙ୍ଗଲ୍ସ ଇଭେଣ୍ଟରେ ଅଣସିଡ୍ ସ୍ବିଟେକ ଆମେରିକାର ଚତୁର୍ଥ ସିଡ୍ ଖେଳାଳି ସୋଫିଆ କେନିନଙ୍କୁ ପରାସ୍ତ କରି ପ୍ରଥମ ପୋଲାଣ୍ଡ ଖେଳାଳିଭାବେ ଗ୍ରାଣ୍ଡସ୍ଲାମ ଟାଇଟଲ ଜିତି ରେକର୍ଡ କରିଛନ୍ତି। ଶନିବାର ଫିଲିପ୍ ଚାଟ୍ରିଏର କୋର୍ଟରେ ଅନୁଷ୍ଠିତ ଫାଇନାଲ ମ୍ୟାଚ୍ରେ ୧୯ ବର୍ଷୀୟ ସ୍ବିଟେକ ୬-୪, ୬-୧ ସେଟ୍ରେ ବିଜୟୀ ହୋଇ ବାଜି ମାରିଛନ୍ତି। କ୍ଲେ କୋର୍ଟରେ ଖେଳାଯାଉଥିବା ଏହି ଟୁର୍ନାମେଣ୍ଟରେ ସେ ଗୋଟିଏ ହେଲେ ବି ସେଟ୍ ଡ୍ରପ୍ କରି ନ ଥିଲେ। ମନିକା ସେଲେସଙ୍କ ପରେ ସେ ସର୍ବକନିଷ୍ଠ ବିଜେତା ସାବ୍ୟସ୍ତ ହୋଇଛନ୍ତି। ପୂର୍ବରୁ ସେଲେସ ୧୯୯୨ରେ ସର୍ବକନିଷ୍ଠ ଖେଳାଳି ଭାବେ ଫ୍ରେଞ୍ଚ୍ ଓପନ୍ ଚାମ୍ପିୟନ ହୋଇଥିଲେ। ଲୋଏଷ୍ଟ ର଼୍ୟାଙ୍କ (୫୪ ନମ୍ବର) ଖେଳାଳିଭାବେ ବିଜୟୀ ହୋଇ ସେ ରେକର୍ଡ କରିଛନ୍ତି।
ଦୁଇବର୍ଷ ତଳେ ସ୍ବିଟେକ ଓ୍ବିମ୍ବେଲଡନ ଜୁନିୟର ଟାଇଟଲ ହାସଲ କରିଥିଲେ। ବିଶ୍ୱ ର଼୍ୟାଙ୍କିଙ୍ଗ୍ର ୫୪ତମ ସ୍ଥାନରେ ରହି ଗ୍ରାଣ୍ଡସ୍ଲାମ ଜିତି ସେ ରେକର୍ଡ କରିଛନ୍ତି। ନିଜ ପ୍ରଦର୍ଶନରେ ସେ ଖୁସି ଜାହିର କରିଛନ୍ତି। ଅପରପକ୍ଷରେ ଅଷ୍ଟ୍ରେଲିଆନ୍ ଓପନ୍ ଟାଇଟଲ ଜିତିଥିବା ୨୧ ବର୍ଷୀୟ ସୋଫିଆ କେନିନ୍ ଦ୍ୱିତୀୟ ଗ୍ରାଣ୍ଡସ୍ଲାମ ଟାଇଟଲ ହାସଲ ଲକ୍ଷ୍ୟରେ ଥିଲେ ମଧ୍ୟ ତାଙ୍କୁ ଶେଷରେ ନିରାଶ ହେବାକୁ ପଡିଛି। ପୂର୍ବରୁ ସ୍ବିଟେକ୍ ସେମିଫାଇନାଲରେ ଆର୍ଜେଣ୍ଟିନାର ନାଡିଆ ପୋଡୋରୋସ୍କାଙ୍କୁ ୬-୨, ୬-୧ ସେଟ୍ରେ ହରାଇ ଫାଇନାଲରେ ପ୍ରବେଶ କରିଥିଲେ। ସେହିପରି କେନିନ ସେମିରେ ୬-୪, ୭-୫ ସେଟ୍ରେ ଚେକ ଗଣରାଜ୍ୟର ପେଟ୍ରା ଭିଟୋଭାଙ୍କୁ ହରାଇ ଫାଇନାଲରେ ପ୍ରବେଶ କରିଥିଲେ।