ପ୍ୟାରିସ୍,୫।୧୦(ଏପି): ଫ୍ରେଞ୍ଚ୍ ଓପନ୍ ମହିଳା ସିଙ୍ଗଲ୍ସରେ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଛି। ଟପ୍ସିଡ୍ ମାନ୍ୟତା ପାଇଥିବା ରୋମାନିଆର ସିମୋନ ହାଲେପ୍ ରବିବାର ଚତୁର୍ଥ ରାଉଣ୍ଡରେ ପରାସ୍ତ ହୋଇ ବିଦାୟ ନେଇଛନ୍ତି। ପୋଲାଣ୍ଡର ୧୯ ବର୍ଷୀୟା ଖେଳାଳି ଇଗା ସ୍ବିଟେକ ୬-୧, ୬-୨ ସେଟ୍ରେ ହାଲେପଙ୍କୁ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଏଥିସହିତ ସେ କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ କ୍ୱାର୍ଟର ଫାଇନାଲକୁ ଉଠିଛନ୍ତି। ହାଲେପ୍ କ୍ରମାଗତ ୧୭ଟି ମ୍ୟାଚ୍ ଜିତିବା ପରେ ପରାଜୟର ସମ୍ମୁଖୀନ ହୋଇଛନ୍ତି। ମାତ୍ର ୨୬ ମିନିଟ୍ରେ ହାଲେପ୍ ପ୍ରଥମ ସେଟ୍ରେ ପରାଜୟବରଣ କରିଥିଲେ। ଏହାପରେ ପ୍ରବଳ ପ୍ରୟାସ କରିଥିଲେ ମଧ୍ୟ ହାଲେପ ଦ୍ୱିତୀୟ ସେଟ୍ରେ ପରାସ୍ତ ହୋଇଥିଲେ। ସ୍ବିଟେକ ଏବେ କ୍ୱାର୍ଟରରେ ଇଟାଲୀର ମାର୍ଟିନ ଟ୍ରେଭିସାନଙ୍କୁ ଭେଟିବେ। ଟ୍ରେଭିସାନ ଅନ୍ୟଏକ ଚତୁର୍ଥ ରାଉଣ୍ଡ ମ୍ୟାଚ୍ରେ ୬-୪, ୬-୪ ସେଟ୍ରେ ଡଚ୍ ପଞ୍ଚମ ସିଡ୍ ଖେଳାଳି କିକି ବର୍ଟେନ୍ସଙ୍କୁ ପରାସ୍ତ କରି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ସ୍ବିଟେକଙ୍କ ଆକ୍ରମଣାତ୍ମକ ପ୍ରଦର୍ଶନକୁ ହାଲେପ ପ୍ରଶଂସା କରିଛନ୍ତି। ଯୋଜନା ଅନୁଯାୟୀ ଭଲ ପ୍ରଦର୍ଶନ କରିଥିଲି ଓ ହାଲେପ୍ଙ୍କୁ ହରାଇ ଥିବା ବିଶ୍ୱାସ କରିପାରୁ ନାହିଁ ସ୍ବିଟେକ କହିଛନ୍ତି।
ସେହିପରି ମହିଳା ସିଙ୍ଗଲ୍ସ ଅନ୍ୟଏକ କ୍ୱାର୍ଟର ଫାଇନାଲରେ ତୃତୀୟ ସିଡ୍ ଏଲିନା ଭିଟୋଲିନା ଓ ଆର୍ଜେଣ୍ଟିନାର ନାଡିଆ ପୋଡୋରୋସ୍କା ପରସ୍ପରକୁ ଭେଟିବା ସ୍ପଷ୍ଟ ହୋଇଛି। ଭିଟୋଲିନା ଚତୁର୍ଥ ରାଉଣ୍ଡରେ ୬-୧, ୬-୩ ସେଟ୍ରେ ପରାସ୍ତ କରି କ୍ୱାର୍ଟରକୁ ଉଠିଛନ୍ତି। ସେହିପରି ଅନ୍ୟଏକ ଚତୁର୍ଥ ରାଉଣ୍ଡ ମୁକାବିଲାରେ ନାଡିଆ ଚେକ ଗଣରାଜ୍ୟର ବାରବୋରା କ୍ରେଜ୍ସିକୋଭାଙ୍କୁ ୨-୬, ୬-୨, ୬-୩ ସେଟରେ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।