ପ୍ୟାରିସ,୧୨।୩ : ପେନସନ ବ୍ୟବସ୍ଥାରେ ସଂସ୍କାର ଆଣିବା ପାଇଁ ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କ ସରକାର ଆଣିଥିବା ବିଲକୁ ସିନେଟ ଅନୁମୋଦନ କରିଛି। ଶନିବାର ବିଳମ୍ବିତ ରାତିରେ ସିନେଟ ଏହି ସଂସ୍କାର ବିଲ ଅନୁମୋଦନ କରିବାକୁ ଭୋଟ ଦେଇଥିଲା। ମାକ୍ରୋନଙ୍କର ଦ୍ୱିତୀୟ କାର୍ଯ୍ୟକାଳର ମୂଳଦୁଆ ବୋଲି ବିବେଚନା କରାଯାଉଥିବା ଏହି ନୀତିକୁ ସାରା ଦେଶରେ ବିରୋଧ କରାଯାଉଛି। ସଂସ୍କାର ଅନୁଯାୟୀ ଅବସର ବୟସ ୬୨ ରୁ ୬୪ ବର୍ଷକୁ ବୃଦ୍ଧି କରାଯିବ। ଯାହାକୁ ଲୋକମାନେ ସପ୍ତାହେ ଧରି ରାସ୍ତାରେ ବିରୋଧ କରିଆସୁଛନ୍ତି।
ସିନେଟରେ ବିଲ ସପକ୍ଷରେ ୧୯୫ ଭୋଟ ପଡ଼ିଥିବାବେଳେ ବିରୋଧରେ ୧୧୨ ଭୋଟ ପଡ଼ିଥିଲା। ଏହି ଭୋଟ ପରେ ପେନସନ ବ୍ୟବସ୍ଥାରେ ସଂସ୍କାର ଆଣିବା ପାଇଁ ଦେଶ ଏକ ନୂତନ ନିୟମର ନିକଟତର ହୋଇଛି। ବର୍ତ୍ତମାନ ଏକ କମିଟି ଏକ ଚୂଡ଼ାନ୍ତ ଡ୍ରାଫ୍ଟ ପ୍ରସ୍ତୁତ କରିବେ, ଯାହା ଚୂଡ଼ାନ୍ତ ଭୋଟ ପାଇଁ ଉଭୟ ସିନେଟ ଏବଂ ଜାତୀୟ ସଭାରେ ଉପସ୍ଥାପିତ ହେବ ।
ପେନସନ ବିଲରେ ସଂସ୍କାରକୁ ଅନେକ ଲୋକ ଯୁବବର୍ଗମାନଙ୍କ ପ୍ରତି ଅନ୍ୟାୟ ବୋଲି ଭାବୁଛନ୍ତି। ସଂସ୍କାର ସମ୍ପର୍କରେ ପ୍ରତିବାଦକାରୀ ଯୁବବର୍ଗ କହିଛନ୍ତି ଯେ ଯଦି ଅବସର ବୟସ ବୃଦ୍ଧି ହୁଏ ତେବେ ଯୁବବର୍ଗମାନଙ୍କ ପାଇଁ ନୂତନ ଚାକିରି ସଂଖ୍ୟାରେ ହ୍ରାସ ଘଟିବ।
