ପରିବେଶ ପ୍ରଦୂଷଣ ଯୋଗୁ ହେଉ ଅଥବା ଥଣ୍ଡା ପାଇଁ ଅନେକଙ୍କର ବାରମ୍ବାର ଛିଙ୍କ ହୋଇଥାଏ। ଫଳରେ କୌଣସି କାମରେ ମନ ଲାଗେନି କି କାହା ସହିତ ଭଲରେ ପଦେ କଥା ହେବାକୁ ବି ଇଚ୍ଛା ହୁଏନି। ମନରେ ଚିଡ଼ିଚିଡ଼ାପଣ ଆସେ। କିନ୍ତୁ ଜାଣନ୍ତି କି ଏମିତି କିଛି ସହଜ ଘରୋଇ ଉପାୟ ରହିଛି, ଯାହାକୁ ଆପଣାଇ ଏହି ସମସ୍ୟାରୁ ଆରାମରେ ମୁକ୍ତି ପାଇହେବ। ଯେମିତିକି: ଅଧା ଚାମଚ ମହୁରେ ଅଳ୍ପ କିଛି ଅଳେଇଚ ଗୁଣ୍ଡ ଏବଂ କେଇବୁନ୍ଦା ଲେମ୍ବୁ ରସ ମିଶାଇ ଦିନକୁ ୨/୩ ଥର ଖାଇଲେ ଛିଙ୍କ ସମସ୍ୟାରୁ ଅନେକାଂଶରେ ଉପଶମ ମିଳିଥାଏ ବୋଲି ବିଶ୍ୱାସ ରହିଛି। ସେହିପରି ଉଷୁମ ପାଣିର ବାମ୍ଫ ନେଲେ ମଧ୍ୟ ଛିଙ୍କ ହେବା ବହୁ ମାତ୍ରାରେ କମିଯାଏ ବୋଲି କୁହାଯାଏ। ହଳଦୀ ମିଶା ଉଷୁମ କ୍ଷୀର ପିଇଲେ ଶରୀରରେ ରୋଗପ୍ରତିରୋଧକ ଶକ୍ତି ବୃଦ୍ଧି ହୋଇଥାଏ। ଫଳରେ ସହଜରେ ଥଣ୍ଡା ହୁଏ ନାହିଁ କି ଛିଙ୍କ ମଧ୍ୟ ହୋଇ ନଥାଏ। ଏମିତିକି ଛିଙ୍କ ହେଉଥିବା ସମୟରେ ମଧ୍ୟ ଏହି କ୍ଷୀର ପିଇବା ଅନେକ ଉପକାରରେ ଆସିଥାଏ। ତା’ଛଡ଼ା ଅଦା, ତୁଳସୀ, ଗୋଲମରିଚ ପକା ହୋଇଥିବା କଡ଼ା ଚା’ ପିଇଲେ ବି ଛିଙ୍କ ସମସ୍ୟାରୁ ବହୁ ମାତ୍ରାରେ ମୁକ୍ତି ମିଳିଥାଏ। ଏସବୁବ୍ୟତିତ ଗୁଆ ଘିଅରେ ଗୋଲମରିଚ ଗୁଣ୍ଡ ଏବଂ କିଛି ତୁଳସୀ ପତ୍ର ମିଶାଇ ଖାଇଲେ ବି ଏହି ସମସ୍ୟା ଶୀଘ୍ର ଭଲ ହୋଇଯାଏ ବୋଲି ଅନେକଙ୍କର ମତ ରହିଛି। ଏହାଛଡ଼ା ସବୁଠୁ ବଡ଼ କଥା ହେଉଛି ଛିଙ୍କ ଦ୍ୱାରା ମଧ୍ୟ ଜଣଙ୍କ ଠାରୁ ଅନ୍ୟ ଜଣଙ୍କୁ ଜୀବାଣୁ ସଂକ୍ରମଣ ହେବାର ଯଥେଷ୍ଟ ସମ୍ଭାବନା ରହିଥାଏ। ତେଣୁ ଏ କ୍ଷେତ୍ରରେ ଛିଙ୍କ ହେଉଥିବା ବ୍ୟକ୍ତି ମାସ୍କ ବ୍ୟବହାର କରିବା ଏକ ଉତ୍ତମ ସମାଧାନ।