ମେଲବୋର୍ନ,୭।୩: କିମ୍ବଦନ୍ତୀ ଅଷ୍ଟ୍ରେଲିଆନ କ୍ରିକେଟର ଶେନ ଓ୍ବର୍ନ ଶୁକ୍ରବାର ହୃଦଘାତରେ ପ୍ରାଣ ହରାଇଛନ୍ତି। ମୃତ୍ୟୁ ପୂର୍ବରୁ ସେ ତାଙ୍କ ଜୀନର ଅନ୍ତିମ କିଛି ଘଣ୍ଟା କେଉଁ ଭଳି ବିତାଇଥିଲେ, ତାହା କହିଛନ୍ତି ତାଙ୍କର ଜଣେ ବନ୍ଧୁ ଟମ ହଲ। ସେ ଥାଇଲାଣ୍ଡର କୋ ସାମୁଇସ୍ଥିତ ଭିଲାରେ ରହୁଥିଲେ, ଯେଉଁ ରିଜର୍ଟର ଏକ ରୁମ୍ରୁ ଓ୍ବର୍ନଙ୍କୁ ଅଚେତ ଅବସ୍ଥାରେ ଉଦ୍ଧାର କରାଯାଇଥିଲା।
‘ଦି ସ୍ପୋର୍ଟିଂ ନ୍ୟୁଜ’ ଓ୍ବେବସାଇଟ୍ର ମୁଖ୍ୟ କାର୍ଯ୍ୟକାରୀ ହଲ ଲେଖିଛନ୍ତି, “ କୌଣସି ଅସାଧାରଣ ପରିସ୍ଥିତି ନ ଥିଲା। ମୋ ସହ କଥାବାର୍ତ୍ତା ହେବା ପରେ ଟିଭିରେ କ୍ରିକେଟ ଦେଖିଥିଲେ। ଅଷ୍ଟ୍ରେଲିଆ ଓ ପାକିସ୍ତାନ ମଧ୍ୟରେ ଚାଲିଥିବା ଟେଷ୍ଟ ଆରମ୍ଭ ହୋଇ ନ ଥିଲା। ତଥାପି ସେ ଦେଖୁଥିଲେ। ସେ କଦାପି କ୍ରିକେଟଠାରୁ ଦୂରେଇ ରୁହନ୍ତି ନାହିଁ”।
କିଛି ସମୟ ମ୍ୟାଚ୍ ଦେଖିବା ପରେ ସେ ରୁମ୍ରୁ ନିଜର କିଛି କ୍ରିକେଟ ପୋଷାକ ଆଣିଥିଲେ। ଶେନ ଗତ କିଛି ବର୍ଷ ହେଲା ମୋ ସହ ଦି ସ୍ପୋର୍ଟିଂ ନ୍ୟୁଜ ପାଇଁ କାମ କରୁଥିଲେ। ସେ ମୋତେ ୨୦୦୫ ଆଶେସ ଟେଷ୍ଟ ସିରିଜ୍ରେ ବ୍ୟବହାର କରିଥିବା ଜମ୍ପର ଦେଖାଇଥିଲେ। ତାଙ୍କ ୨୦୦୮ ଆଇପିଏଲ ଶାର୍ଟ, ଦିନିକିଆ ଶାର୍ଟ ଏବଂ କ୍ୟାପ୍କୁ ଅଷ୍ଟ୍ରେଲିଆ ଓ ୟୁକେରେ ଟିଏସ୍ଏନ୍ କାର୍ଯ୍ୟାଳୟରେ ରଖିବାକୁ କହିଥିଲେ। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ପ୍ରଥମ ସିଜନ କଥା କହିଥିଲେ। ସେଥର ତାଙ୍କ ନେତୃତ୍ୱାଧୀନ ରାଜସ୍ଥାନ ରୟାଲ୍ସ ଚାମ୍ପିୟନ ହୋଇଥିଲା। ଏଭଳି ଆଲୋଚନା ପରେ ତୁରନ୍ତ ରୁମ୍କୁ ଯାଇ ଖାଇବା ଆରମ୍ଭ କରିଥିଲେ। ସେ ଟୋଷ୍ଟରେ ଅଷ୍ଟ୍ରେଲିଆର ପାରମ୍ପରିକ ଭେଜେମାଇଟ୍ ଲଗାଇଥିଲେ ବୋଲି ଓ୍ବେବସାଇଟ୍ରେ ହଲ ଉଲ୍ଲେଖ କରିଛନ୍ତି।
ଖାଦ୍ୟ ଗ୍ରହଣ କରିବାର କିଛି ସମୟ ପରେ ତାଙ୍କ ଛାତିରେ ଯନ୍ତ୍ରଣା ହୋଇଥିଲା। ପୂର୍ବରୁ ସେ ଆସ୍ଥମା ଓ ହୃଦୟ ଜନିତ ସମସ୍ୟାରେ ପୀଡ଼ିତ ଥିଲେ ବୋଲି ଥାଇ ପୋଲିସ ପକ୍ଷରୁ କୁହାଯାଇଛି।
ଓ୍ବର୍ନ ଥାଇଲାଣ୍ଡ ଯିବା ପୂର୍ବରୁ ଛାତିରେ ଯନ୍ତ୍ରଣା ଓ ନିଶ୍ୱାସ ନେବାରେ କଷ୍ଟ ହେଉଥିବାରୁ ଡାକ୍ତରଙ୍କୁ ପରାମର୍ଶ କରିଥିଲେ। କିନ୍ତୁ ଏ ସମ୍ପର୍କରେ ଜାଣି ନ ଥିଲେ ତାଙ୍କ ସହ ଅଷ୍ଟ୍ରେଲିଆରୁ ଥାଇଲାଣ୍ଡ ଗସ୍ତ କରିଥିବା ବନ୍ଧୁମାନେ ତାଙ୍କ ସହ ଅଷ୍ଟ୍ରେଲିଆରୁ ଥାଇଲାଣ୍ଡ ଗସ୍ତ କରିଥିବା ବନ୍ଧୁମାନେ। ସେମାନେ ଓ୍ବର୍ନଙ୍କୁ ବଞ୍ଚାଇବା ପାଇଁ ଯଥା ସମ୍ଭବ ପ୍ରୟାସ କରିଥିଲେ ବୋଲି ହଲ ଲେଖିଛନ୍ତି।
ରବିବାର ତାଙ୍କ ମୃତଦେହ ବ୍ୟବଚ୍ଛେଦ କରାଯାଇଛି। କିନ୍ତୁ ତାଙ୍କ ମୃତ୍ୟୁ ପଛର ପ୍ରକୃତ କାରଣ ଏପର୍ଯ୍ୟନ୍ତ ଥାଇ ପୋଲିସ ପକ୍ଷରୁ ସ୍ପଷ୍ଟ କରାଯାଇ ନାହିଁ।