କେନ୍ଦ୍ରାପଡ଼ା, ୨୬ା୯ (ଜଗନ୍ନାଥ ଧଳ): କେନ୍ଦ୍ରାପଡ଼ା ଜିଲା ନିକିରେଇ ଥାନା ଅଞ୍ଚଳରେ ନିଶା ସେବନ ସମୟରେ ସାଙ୍ଗଙ୍କ ଛୁରାମାଡରେ ସାଙ୍ଗ ତ୍ରିଲୋଚନ ମଲ୍ଲିକ (୩୦)ଙ୍କ ସୋମବାର ମୃତ୍ୟୁ ହୋଇଛି। ତ୍ରିଲୋଚନଙ୍କ ଘର ଥାନା ଅନ୍ତର୍ଗତ ଧୂମାତ ଶାସନସ୍ଥିତ ଚାରିଗାଁ । ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁଯାୟୀ, ଚାରିଗାଁ ନିକଟ କେନାଲ ବନ୍ଧ ଉପରେ ତ୍ରିଲୋଚନ ଓ ଅନ୍ୟ ୪ଜଣ ମିଶି ନିଶା ସେବନ କରୁଥିଲେ। କୌଣସି କାରଣରୁ ଜଣେ ସାଙ୍ଗ ଉତ୍ତ୍ୟକ୍ତ ହୋଇ ତ୍ରିଲୋଚନଙ୍କୁ ଛୁରାମାଡ଼ କରିଥିଲେ। ଫଳରେ କାନ୍ଧ ଓ ଛାତିରେ ବିଭିନ୍ନ ସ୍ଥାନରେ କ୍ଷତ ହୋଇଥିଲା। ଏହି ସମୟରେ ସାଙ୍ଗମାନେ ଘଟଣାସ୍ଥଳରୁ ଫେରାର ପରେ ସ୍ଥାନୀୟ ଲୋକେ ତାଙ୍କୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ଚିକିତ୍ସା ପାଇଁ ନେଇଥିଲେ। ତେବେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଏ ସମ୍ପର୍କରେ ନିକିରେଇ ଥାନା ଅଧିକାରିଣୀ ଜ୍ୟୋତିର୍ମୟୀ ସେଠୀ କହିଛନ୍ତି, ଘଟଣା ସମ୍ପର୍କରେ ଜାଣିବା ପରେ ତଦନ୍ତ ଆରମ୍ଭ ହୋଇଛି। ଫୋରେନସିକ ବିଭାଗ ଘଟଣାସ୍ଥଳର ଟିକିନିଖି ଅନୁସନ୍ଧାନ ଚଳାଇଛନ୍ତି। ତ୍ରିଲୋଚନଙ୍କ ନାମରେ ଚୋରି, ଅପହରଣ, ଦାଦାଗିରି, ଅସ୍ତ୍ର ରଖିବା ଆଦି ଘଟଣାରେ ଜିଲାରେ ୧୦ରୁ ଊର୍ଦ୍ଧ୍ୱ ମାମଲା ରହିଥିବା ସୂଚନା ଦେଇଛନ୍ତି।